Ruhanga akaraganiza nabbi Iburahimu ngu omu h’abaijukuru be akaba nagenda kuletera “amahanga gona agomu nsi” emigisa. (Okubanza 22:18) Omwijukuru ogu akaba nagenda kuba oha?

Nk’emyaka 2,000 enyuma, Ruhanga akaha Yesu omwijukuru wa Iburahimu amaani ag’okukora ebyamahano. Ebyamahano ebi bikooleka ngu, omurago Ruhanga yaraganiize Iburahimu ogurukukwata h’amahanga goona, gwali nigugenda kuhikirra kurabira omuli Yesu.​—Abagaratiya 3:14.

Ebyamahano Yesu yakozere bikakonyera abantu kukimanya ngu Ruhanga akaba amukomere kuha abantu emigisa kandi bikooleka n’omulingo Ruhanga akaba nagenda kumukozesa kuha abantu emigisa ey’ebiro n’ebiro. Wetegereze omulingo ebyamahano Yesu yakozere birukwoleka emiringo ye erukusikiriza.

Kufaayo​—Yesu akakiza abarwaire.

Kiro kimu, omugenge akesengereza Yesu kumukiza. Yesu akamukwataho kandi yamugarukamu ati: “Ningonza!” Aho naaho, ebigenge bikamurugaho.​—Marako 1:40-42.

Amakune​—Yesu akaliisa abaali baine enjara.

Yesu akaba atarukugonza abantu barumwe enjara. Emirundi erukuhingura ha gumu, akakora ekyamahano yaliisa enkumi n’enkumi z’abantu kuraba omu kukanyisa emigati entaito hamu n’encu enke. (Matayo 14:17-21; 15:32-38) Hanyuma y’okulya boona bakaiguta kandi eby’okulya bingi bikasigaraho.

Embabazi​—Yesu akahumbuura abafu.

Embabazi zikaletera Yesu kuhumbuura mutabani w’omufakati ow’akaba aine obujune bwingi habw’okufeerwa omwana we omu wenka kandi ow’akaba ataine muntu ondi wena ow’okumurolerra.​—Luka 7:12-15.