Nkhababikira ku Montreal, msumba ukuru wa Quebec, Canada. Mu nyumba yakwithu tili kubabika ŵana ŵanayi. Ŵapapi ŵithu ŵakatilera makora chomene ndipo tikakhalanga ku Rosemont. Tose tikakhalanga mwakukondwa kweniso mwamtende.

 Apo nkhaŵa munyamata, nkhatemwanga chomene Baibolo. Nkhukumbuka kuti apo nkhaŵa na vyaka 12, nkhakondwa chomene nati naŵerenga nkhani ya Yesu mu Tesitamenti Lasono. Nkhakhwaskika chomene nati naŵerenga kuti Yesu wakatemwanga chomene ŵanthu na kuŵalengera lusungu ndipo nkhakhumba kuŵa nga ndiyo. Chachitima ntchakuti, maghanoghano agha ghakasintha nati namba kuchezga na ŵanthu ŵankharo yiheni.

 Adada ŵakimbanga chitoliro. Iwo ŵakanipa chitoliro ichi kweniso ŵakanisambizga kwimba ndipo umoyo wane wose ukagona pa sumu. Nkhatemwanga chomene sumu ndipo pati pajumpha nyengo nkhamba kwimba gitara. Ine na ŵabwezi ŵane tikapanga bandi, ndipo tikimbanga sumu zachiwawa. Ŵanthu ŵanyake awo ŵakumanya vyakwimba ŵakawona kuti nkhwimba makora, ndipo ŵakanipempha kuti ŵanovwire kuti sumu zane zimanyikwe. Kampani yakujambura sumu yikanilemba ganyu. Sumu zane zikamanyikwa chomene ndipo zikatchuka pa wayilesi ku Quebec.

 Nkhawonanga nga maloto ghane ghafiskika. Nkhatchuka chomene nichali munyamata, nkhasanganga ndalama zinandi ndipo nkhachitanga chilichose icho nakhumba. Muhanya nkhalutanga ku gimu, ŵanthu ŵakanichitanga maintavyu, kusayinira zina lane pa katundu wa makampani ghakupambanapambana, kweniso kuwoneka pa TV. Usiku, tikachitanga mashowo na kuluta ku mapate. Nkhamwanga moŵa na munkhwala wakutimbanizga wongo kuti nileke kuchita soni pa wumba para nkhwimba. Nkhachitanga vinthu mwambura kupwelelerako ndipo nkhaŵa na nkharo yiheni yaukazuzi.

 Ŵanyake ŵakadokeranga ivyo nkhachitanga chifukwa nkhawonekanga kuti nkhukondwa chomene. Kweni ndimo vikaŵira yayi, nkhajipulikanga wawakawaka, chomenechomene para nili nekha. Nkhasuzgikanga maghanoghano kweniso nkhenjerwanga. Chachitima ntchakuti, apo vinthu vikendanga makora, ŵanalume ŵaŵiri awo ŵakanovwiranga pa nkhani yakwimba ŵakafwa na nthenda ya AIDS. Mutu ukayima! Nangauli nkhatemwanga kwimba, kweni ivyo vikachitikanga vikaniseluskanga chomene.

 Nangauli ine vikaniyenderanga, kweni nkhamanyanga kuti vinthu vikwenda makora yayi mu charu. Nkhajifumbanga kuti: Chifukwa wuli vinthu vyambura urunji vikuchitika? Chifukwa wuli Chiuta wakuleka kuchitapo kanthu? Kanandi nkhalombanga kwa Chiuta kuti nisange mazgoro. Zuŵa linyake nkhapumulanga, ndipo nkhambiraso kuŵerenga Baibolo. Nangauli ivyo nkhaŵerenga nkhavipulikiskanga yayi, kweni nkhawona kuti charu chili pafupi kumara.

 Zuŵa linyake apo nkhaŵerenganga Baibolo, nkhamanya kuti Yesu wakaziŵizga kurya mazuŵa 40. (Mateyu 4:1, 2) Nkhaghanaghana kuti usange nane ndimo ningachitira, panji Chiuta wangajivumbura kwa ine. Ntheura nkhatema zuŵa. Masabata ghaŵiri pambere nindambe kuziŵizga kurya, Ŵakaboni ŵa Yehova ŵaŵiri ŵakawodira pa nyumba pane. Nkhaŵapokelera makora chomene. Nkhalaŵisiska Kaboni yumoza, zina lake Jacques, ndipo nkhafumba kuti, “Kasi tingamanya wuli kuti tili mu mazuŵa ghaumaliro wa charu ichi?” Pakunizgora wakanijulira Baibolo pa 2 Timote 3:1-5. Nkhaŵaphurunga na mafumbo ghanandi, ndipo nkhakhorwa na mazgoro ghawo chifukwa ghakafumanga mu Malemba. Ivi vikanikondweska chomene. Ŵakati ŵachezga nane maulendo ghachoko waka, nkhawamo kuti palije chifukwa chakuti niziŵizgire kurya.

 Ŵakaboni ŵa Yehova ŵakamba kusambira nane Baibolo nyengo zose. Pamanyuma, nkhameta sisi zane zitali ndipo nkhamba kusopa pa Nyumba ya Ufumu ya uko nkhakhalanga. Nati naluta kukasopa ŵakanipokelera makora chomene ndipo nkhakhorwa kuti nasanga unenesko.

 Nkheneranga kusintha vinthu vinyake ivyo nkhachitanga kuti nambe kulondezga ivyo nkhasambiranga mu Baibolo. Chakwamba, nkheneranga kuleka kugwiliskira ntchito munkhwala wakutimbanizga wongo kweniso nkharo yane yawakawaka. Nkheneranga kuleka kujighanaghanira nekha na kwamba kughanaghanira ŵanthu. Pakuti nkhaleranga nekha ŵana ŵaŵiri, nkheneranga kusambira kuŵapwelelera makora mwakuthupi kweniso mwauzimu. So nkhaleka vyakwimba ndipo nkhasanga ntchito pa fakitare iyo nkhapokeranga ndalama zichoko.

 Chikaŵa chipusu yayi kuti nisinthe. Apo nkhalekanga munkhwala wakutimbanizga wongo, nkhasuzgika chomene. Nkhalwara kweniso nkhaŵa na chibaba. (Ŵaroma 7:19, 21-24) Nkhasuzgika chomene kuti nileke nkharo yane yawakawaka. Kweniso ntchito iyo nkhasanga yikaŵa yakuvuska, ndipo malipiro ghakaŵa ghachoko chomene. Nkhatoranga myezi yitatu kuti nisange ndalama izo nkhasanganga mu maora ghaŵiri pera apo nkhaŵa wakwimba.

 Lurombo ndilo lukanovwira kuti nizizipizge pa nyengo iyi. Kweniso kuŵerenga Baibolo nyengo zose kukanovwira chomene. Pali mavesi ghanyake gha mu Baibolo agho ghakanovwira chomene. Lemba lakwamba nda 2 Ŵakorinte 7:1 ilo likuchiska Ŵakhristu wose kuti ‘ŵajitozge ku ukazuzi wose wa thupi na wauzimu.’ Lemba linyake ilo likanikhukiska kuti ningaleka nkharo yiheni nda Ŵafilipi 4:13 ilo likuti: “Mu vinthu vyose, nkhusanga nkhongono mwa uyo wakunipa nkhongono.” Yehova Chiuta wakazgora malurombo ghane ndipo wakanovwira kupulikiska na kuchita ivyo Baibolo likusambizga. Ivi vikapangiska kuti nijipeleke kwa Yehova. (1 Petrosi 4:1, 2) Mu 1997 nkhabatizika na kuŵa Kaboni wa Yehova.

 Nkhugomezga kuti nilutilirenge na ivyo nkhachitanga kale, mphanyi ŵali kuwundira. Kweni sono, ndipo nkhukondwa zanadi! Yehova wali kunitumbika chomene, wali kunipa mwanakazi muwemi chomene, Elvie. Ine na muwoli wane tikukondwa kusambizga ŵanthu Baibolo nyengo zose. Ivi vikunikondweska chomene ndipo nkhukhorwa na umoyo wane. Nkhuwonga chomene Yehova pakuniguza kuti niŵe mubwezi wake.​—Yohane 6:44.