Ŵana awo mbalara ŵali na udindo wakuwoneseska kuti ŵapapi ŵawo awo mbachekuru ŵakupwelereka. Baibolo likuti ŵana “aŵa ŵasambire dankha kusopa Chiuta mwakujipeleka mu nyumba zawo na kuŵawezgera vyakwenelera ŵapapi . . . , pakuti ichi chikukondweska Chiuta.” (1 Timote 5:4) Para ŵana awo mbalara ŵakupwelera makora ŵapapi ŵawo awo mbachekuru ndikuti ŵakupulikira dango la mu Baibolo lakuti ŵachindikenge ŵapapi ŵawo.​—Ŵaefeso 6:2, 3.

 Baibolo likuyowoya mwakudunjika yayi za umo tingapwelelera ŵapapi awo mbachekuru. Ndipouli, likupeleka viyelezgero vya ŵanalume na ŵanakazi ŵachipulikano awo ŵakapwelelera makora ŵapapi ŵawo awo ŵakaŵa ŵachekuru. Likupelekaso ulongozgi wakovwira ku awo ŵakupwelelera ŵachekuru.

•  Umo ŵanyake mu nyengo yakale ŵakapweleleleranga ŵapapi ŵawo awo ŵakaŵa ŵachekuru

•  Kasi mu Baibolo muli ulongozgi wuli wakuzirwa uwo ungawovwira awo ŵakupwelelera ŵachekuru?

•  Kasi Baibolo likuti ŵapapi awo mbachekuru ŵakwenera kupwelelekera pa nyumba pawo?

 Ŵakaŵapweleleranga munthowa zakupambanapambana kuyana na umo vinthu vikaŵira paumoyo wawo.

•  ● Yosefe wakakhalanga kutali na adada ŵake a Yakhobe awo ŵakaŵa ŵachekuru. Apo vinthu vikaŵa makora kwa iyo, wakanozga vyakuti adada ŵake ŵasamire kufupi na uko iyo wakakhalanga. Pamanyuma Yosefe ŵakaŵasangira pakukhala adada ŵake, kuŵaryeska na kuŵavikilira.—Genizesi 45:9-11; 47:11, 12.

•  ● Rute wakasamira ku charu cha amamavyara ŵake ndipo wakalimbikiranga ntchito kuti waŵapwelelere.

•  ● Yesu, wati wakhala pachoko kufwa, wakamupa munthu munyake udindo wakupwelelera amama ŵake a Mariya, awo ŵakwenera kuti ŵakaŵa chokoro.—Yohane 19:26, 27. a

 Mu Baibolo muli fundo izo zingawovwira awo ŵakupwelelera ŵachekuru kuti ŵatonde masuzgo agho ghakuŵapo para ŵakuŵapwelelera.

•  ● Chindika ŵapapi ŵako.

   Ivyo Baibolo likuyowoya: “Chindika awuso na anyoko.”—Ekisodo 20:12.

   Umo mungalondezgera fundo iyi. Longorani kuti mukuchindika ŵapapi ŵinu mwakuŵapa wanangwa wakuchita ivyo ŵakukhumba kuyana na umo vinthu viliri kwa iwo. Ŵalekani kuti ŵasankhengenge ŵekha pankhani ya umo mungaŵapwelelelera. Panyengo yimozamoza longorani kuti mukuŵachindika pakuchita ivyo imwe mungafiska kuti muŵawovwire.

•  ● Mupulikiskenge na kugowoka.

   Ivyo Baibolo likuyowoya: “Munthu wamahara wakuwezgako ukali wake, ndipo mbutozi kwa iyo kusulako maubudi.”—Zintharika 19:11.

   Umo mungalondezgera fundo iyi. Para ŵapapi ŵinu awo mbachekuru ŵayowoya chinyake icho chamukhuŵazgani panji chakulongora kuti ŵakuwonga yayi ivyo mukuŵachitira, jifumbani kuti, ‘Kasi ningajipulika wuli niŵenge muchekuru nga ndiwo?’ Para mukupulikiska na kugowoka mungagega kunangirathu vinthu.

•  ● Penjani wovwiri ku ŵanji.

   Ivyo Baibolo likuyowoya: “Vinthu vikulongosoka yayi para palije kudumbiskana, kweni vinthu vikwenda makora para pali ŵakupeleka fundo ŵanandi.”—Zintharika 15:22.

   Umo mungalondezgera fundo iyi. Fufuzani umo mungachitira na masuzgo gha mu thupi agho ŵapapi ŵinu ŵali nagho. Wonani para uko mukukhala kuli vinthu ivyo vingaŵawovwira pa suzgo lawo. Dumbiskanani na ŵanji awo ŵali kupwelelerapo ŵapapi awo mbachekuru. Para muli na ŵabali ŵinu ŵa mbumba yimoza mungachita makora kudumbiskana nga ni mbumba vya umo mupwelelelerenge ŵapapi ŵinu.

•  ● Mujiyuyurenge.

   Ivyo Baibolo likuyowoya: “Vinjeru vili na ŵakujiyuyura.”—Zintharika 11:2.

   Umo mungalondezgera fundo iyi. Manyani ivyo mungafiska. Mwachiyelezgero, waliyose nkhongono na nyengo vingamuchepera. Ivi vingakhwaska chomene umo mukuchitira vinthu vinyake pakupwelelera ŵapapi ŵinu. Para vyamusuzgani kusanga ivyo ŵapapi ŵinu ŵachekuru ŵakukhumba, mungachita makora kupempha wovwiri kufuma ku ŵanyinu ŵamumbumba panji ku ŵanthu ŵanyake awo ŵakumanya kupwelelera ŵachekuru.

•  ● Mujipwelelerenge.

   Ivyo Baibolo likuyowoya: “Pakuti palije munthu uyo wakutinkha thupi lake, kweni wakulilyeska na kulipwelelera.”—Ŵaefeso 5:29.

   Umo mungalondezgera fundo iyi. Nangauli muli na udindo wakupwelelera ŵapapi ŵinu, mukweneraso kusanga ivyo imwe mukukhumbikwira na kupwelelera banja linu usange muli munthengwa. Mukwenera kurya makora, kupumura na kugona mwakukwana. (Mupharazgi 4:6) Para vingachitika mungachitaso makora kuluta ku malo ghanyake na kukapumura. Usange mwachita nthena, mbwenu vimuŵiraninge makora kweniso mupwelelerenge makora ŵapapi ŵinu.

 Baibolo likuyowoya mwakudunjika yayi pankhani iyi, kuti ŵana awo mbalara ŵakwenera kupwelelera ŵapapi ŵawo panyumba pawo panji yayi. Mbumba zinyake zikusankha kupwelelera ŵapapi ŵawo awo mbachekuru panyumba pawo. Kweni nyengo yinyake ŵangasankhaso kuti ŵapapi ŵawo ŵakhale ku nyumba izo ŵakupwelelerako ŵachekuru. Mbumba yingachita makora kudumbiskana nthowa yiwemi iyo ŵangapwelelera ŵapapi ŵawo awo mbachekuru.—Ŵagalatiya 6:4, 5.