Ezekiyeli 5:1-17
5 “Kweni iwe, mwana wa munthu, utore lupanga lwakuthwa kuti luŵe nga ntchakumetera. Meta kumutu wako na mwembe wako, na kutora sikelo kuti ulipime na kuligaŵa patatu.
2 Chigaŵa chimoza cha vigaŵa vitatu wotche pa moto mukati mwa msumba para mazuŵa gha kuzingilizga msumba ghamara.+ Utoreso chigaŵa chinyake cha vigaŵa vitatu na kuchitimba na lupanga kuzingilizga msumba wose,+ ndipo chigaŵa chaumaliro uchiwuluske mu mphepo, ine nizamusolora lupanga kuŵachimbizga.+
3 “Utoreposo sisi lichoko waka na kulivunga mu chakuvwara chako.
4 Utoreposo linyake na kuliponya pa moto kuti linyeke thibu. Pa moto uwu pazamufuma moto uwo uzamuthandazgikira ku nyumba yose ya Israyeli.+
5 “Ichi ndicho Fumu Yikuru Yehova yayowoya: ‘Uyu ni Yerusalemu. Namuŵika pakati pa mitundu, wazingilizgika na vyaru vinyake.
6 Kweni wagalukira vyeruzgo vyane na malango ghane, wachita uheni ukuru chomene kuluska ŵamitundu na vyaru ivyo vyamuzingilizga.+ Ŵakana vyeruzgo vyane ndipo ŵakwenda mu malango ghane chara.’
7 “Ntheura ichi ndicho Fumu Yikuru Yehova yayowoya: ‘Pakuti ukaŵa wakusuzga chomene kuluska ŵamitundu awo ŵakakuzingilizga, ndipo ukenda chara mu malango ghane nesi kulondezga vyeruzgo vyane, kweni ukalondezga vyeruzgo vya ŵamitundu awo ŵakakuzingilizga,+
8 ntheura ichi ndicho Fumu Yikuru Yehova yayowoya: “Sono ine nkhwimikana nawe, iwe msumba,+ ndipo ine nizenge na cheruzgo mukati mwako pamaso pa ŵamitundu.+
9 Nikuchitirenge chinthu icho nindakuchitirepo nakale ndipo nizamuchichitaso chara chanthena ichi, chifukwa cha vyakuchita vyako vyose vyaukazuzi.+
10 “‘“Ntheura ŵadada pakati pinu ŵazamurya ŵana ŵawo,+ ndipo ŵana ŵazamurya ŵawiskewo. Ine nizenge na cheruzgo pakati pinu ndipo mose mwaŵakukhalapo nizamumumbininiskirani mu vigaŵa vyose.”’*+
11 “Fumu Yikuru Yehova yayowoya kuti, ‘Ntheura, umo ine niliri wamoyo, chifukwa chakuti iwe ukafipiska malo ghane ghakupatulika na vikozgo vyako vyaukazuzi ndiposo na vyakuchita vyako vyose vyaunyankhasi,+ naneso nikukanenge. Jiso lane likuchitirenge chitima chara ndipo nikulongorenge chiwuravi chara.+
12 Chigaŵa chimoza cha vigaŵa vitatu vya imwe chifwenge na nthenda zakwambukira panji kuparanyika na njara pakati pako. Chigaŵa chinyake chiwenge na lupanga+ kuzingilizga iwe. Ndipo nimbininiskirenge chigaŵa chaumaliro ku vigaŵa vyose,* nisolorenge lupanga kuti niŵachimbizge.+
13 Penepapo ukali wane uzamumara, kutukutwa kwane pa iwo kuzamutuna, ndipo nizamukhorwa.+ Para nafiska kutukutwa kwane pa iwo, ŵazamumanya kuti ine Yehova, nayowoya chifukwa chakuti nkhukhumba kuti ŵanthu ŵasopenge ine pera.+
14 “‘Nikuzgorenge malo ghakuparanyika ndiposo chinthu icho ŵanthu ŵachiyowoyerenge msinjiro pakati pa ŵamitundu awo ŵakuzingilizga na mu maso gha waliyose uyo wakujumpha pafupi.+
15 Uŵenge chinthu chakuyowoyereka msinjiro na chakunyozeka,+ chakuwonerapo chakuchenjezga na chakutenthemeska ku ŵamitundu awo ŵakuzingilizga, para nakweruzga mwaukali na mwakukwiya, ndipo nakupa vilango viheni chomene. Ine Yehova nayowoya.
16 “‘Niŵatumirenge mivi yakukoma ya njara kuti yiŵaparanye. Mivi iyo nitumenge yimuparanyaninge.+ Niphyorenge tumakuni* twako twa vingwa*+ na kuchitiska njara yikuru pakati pako.
17 Nikutumirenge njara na vikoko vyakofya,+ ndipo vizamumara ŵana ŵako. Nthenda zakwambukira na kuthiska ndopa vikunyekezgenge, ndipo nizenge na lupanga pa iwe.+ Ine Yehova nayowoya.’”
Mazgu Ghamusi
^ Mazgu gheneko, “ku mphepo zose.”
^ Mazgu gheneko, “ku mphepo zose.”
^ Panyake ŵakunena tumakuni uto ŵakatungangako vingwa.
^ Panji kuti, “chakurya.”
