Salimo 135:1-21
135 Lumbani Ya!*
Lumbani zina la Yehova,Pelekani malumbo, imwe ŵateŵeti ŵa Yehova,+
2 Imwe mukwimilira mu nyumba ya Yehova,Mu maluŵaza gha nyumba ya Chiuta withu.+
3 Lumbani Ya, pakuti Yehova ni muwemi.+
Yimbirani malumbo zina lake, chifukwa ntchakukondweska.
4 Pakuti Ya wajisolera Yakhobe,Israyeli kuŵa chuma chake chapadera.+
5 Pakuti nkhumanya makora kuti Yehova ni mukuru,Fumu yithu njikuru kuluska ŵachiuta ŵanyake wose.+
6 Yehova wakuchita chilichose icho wakhumba+Kuchanya na pa charu chapasi, mu nyanja na ndimba zose za maji.
7 Wakukwezga mabingu kufuma ku vigoti vya charu.Wakumwetuska ŵaleza para vula yikuwa.Wakufumiska mphepo mu nthamba zake.+
8 Wakakoma ŵana ŵakwamba kubabika ŵa mu Eguputo,Ŵa ŵanthu na vinyama wuwo.+
9 Wakatuma vimanyikwiro na minthondwe pakati pako, we Eguputo,+Pa Farawo na ŵateŵeti ŵake wose.+
10 Wakatimba ŵamitundu ŵanandi+Na kukoma mathemba ghankhongono,+
11 Sihoni themba la Ŵaamori,+Ogi themba la Bashani,+Na maufumu ghose gha mu Kenani.
12 Wakapeleka charu chawo kuŵa chiharo,Chiharo kwa Israyeli, ŵanthu ŵake.+
13 A Yehova, zina linu likukhalilira muyirayira.
A Yehova, lumbiri* lwinu lukukhalilira mu miwiro yose.+
14 Pakuti Yehova wavikilirenge* ŵanthu ŵake,+Wachitirenge chiwuravi ŵateŵeti ŵake.+
15 Ŵangoza ŵa ŵamitundu ni siliva na golide,Mulimo wa mawoko gha ŵanthu.+
16 Mulomo ŵali nawo kweni ŵakuyowoya yayi.+Maso, kweni ŵakuwona chara.
17 Makutu ŵali nagho kweni ŵakupulika chara.
Mulije mvuchi mu mulomo wawo.+
18 Ŵanthu awo ŵakuŵapanga ŵaŵenge nga ndiwo,+Na wose awo ŵakuŵathemba.+
19 Lumba Yehova, iwe nyumba ya Israyeli.
Lumba Yehova, iwe nyumba ya Aroni.
20 Iwe nyumba ya Levi, lumba Yehova.+
Lumbani Yehova, imwe mukopa Yehova.
21 Yehova walumbike kufuma ku Ziyoni,+Mweneuyo wakukhala mu Yerusalemu.+
Lumbani Ya!+
Mazgu Ghamusi
^ Panji kuti, “Aleluya.” “Ya” nkhudumura kwa zina lakuti Yehova.
^ Panji kuti, “zina.” Mazgu gheneko, “chikumbusko.”
^ Panji kuti, “wimirenge.”
