1. Kasi Chiuta wakaŵakhozga wuli ŵateŵeti ŵake ŵakugomezgeka mu nyengo yakale?

 MAZGU GHA CHIUTA kanandi ghakulongosora ŵanalume ŵakugomezgeka kuŵa ŵankhongono panji kuti ŵakukhora. Kweni ni nyengo zose yayi apo ŵakajiwonanga kuŵa ŵankhongono. Mwachiyelezgero, Themba Davide nyengo zinyake likajiwonanga kuti ‘ndakukhora nga ni phiri,’ kweni nyengo zinyake likajiwonanga kuti ndakulopwa ndipo ‘likatenthemanga.’ (Sal. 30:7) Nangauli Samusoni wakaŵa na nkhongono zapadera, kweni wakamanyanga kuti kwambura nkhongono zakufuma kwa Chiuta, mbwenu ‘waŵenge wakulopwa nga mbanthu ŵanyake wose.’ (Ŵeru. 14:​5, 6; 16:17) Ŵanalume ŵakugomezgeka aŵa ŵakaŵa ŵakukhora chifukwa chakuti Yehova wakaŵapa nkhongono.

2. Chifukwa wuli mpositole Paulosi wakayowoya kuti ngwakulopwa kweniso ngwankhongono? (2 Ŵakorinte 12:​9, 10)

² Mpositole Paulosi nayo wakamanyanga kuti wakakhumbikwiranga nkhongono zakufuma kwa Yehova. (Ŵazgani 2 Ŵakorinte 12:​9, 10.) Nga umo viliri na taŵanandi ŵa ise, Paulosi wakaŵa na masuzgo mu thupi. (Gal. 4:​13, 14) Nyengo zinyake vikamusuzganga kuchita icho ntchiwemi. (Rom. 7:​18, 19) Ndipo nyengo zinyake wakenjerwanga ndipo wakamanyanga yayi icho chimuchitikirenge. (2 Kor. 1:​8, 9) Ndipouli, apo Paulosi wakaŵa wakulopwa, wakaŵaso wankhongono. Mwawuli? Yehova wakamupa nkhongono izo wakakhumbikwiranga kuti wazizipizge masuzgo agho wakasangananga nagho.

3. Kasi tizgorenge mafumbo wuli mu nkhani iyi?

³ Nase Yehova wakutilayizga kuti watizgorenge ŵankhongono. (1 Pet. 5:10) Kweni kuti Yehova watipe nkhongono, nase tikwenera kuchitapo kanthu. Kuti tipulikiske makora fundo iyi, wonani  chiyelezgero ichi: Injini yingawovwira kuti galimoto yende. Ndipouli, dilayivala wakwenera kudyaka moto kuti galimoto yende. Mwakuyana waka, Yehova ngwakunozgeka kutipa nkhongono izo tikukhumbikwira, kweni tikwenera kuchitapo kanthu kuti watipe. Kasi Yehova watipa vichi kuti tiŵe na nkhongono? Ndipo kasi tikwenera kuchita vichi kuti watipe nkhongono izi? Tisangenge mazgoro gha mafumbo agha, ndipo tiwonenge umo Yehova wakapelekera nkhongono kwa ntchimi Yona, Mariya nyina wa Yesu, na mpositole Paulosi. Tiwonengeso umo Yehova wakupelekera nkhongono ku ŵateŵeti ŵake mazuŵa ghano munthowa yakuyana waka.

4. Kasi tingapokera wuli nkhongono kufuma kwa Yehova?

⁴ Nthowa yimoza iyo Yehova wangamupirani nkhongono, nkhumulomba. Yehova wazgorenge malurombo ghithu pakutipa “nkhongono zakuluska zakawiro.” (2 Kor. 4:7) Kweniso tingasanga nkhongono para tikuŵazga Mazgu ghake na kughanaghanirapo. (Sal. 86:11) Mazgu agho Yehova wakutiphalira mu Baibolo ghali na “nkhongono.” (Heb. 4:12) Para mukulomba kwa Yehova na kuŵazga Mazgu ghake, musangenge nkhongono izo mukukhumbikwira kuti muzizipizge, mulutilire kuŵa ŵakukondwa, panji mufiske uteŵeti uwo ngwakusuzga. Wonani umo Yehova wakakhozgera ntchimi Yona.

5. Chifukwa wuli ntchimi Yona yikakhumbikwiranga kukhozgeka?

⁵ Ntchimi Yona yikakhumbikwiranga nkhongono na kukhozgeka. Yona wakachimbira mulimo wakusuzga uwo Yehova wakamupa. Pa chifukwa ichi, wakakhala pachoko waka kuti wataye umoyo wake pamoza na awo wakaŵa nawo mu ngalaŵa apo kukaŵa chimphepo chikuru. Ŵakwendeska ngalaŵa ŵakati ŵamuponya mu nyanja, chisomba chikuru chikamumira, ndipo wakaŵa mu malo gha mdima munthumbo ya chisomba ichi. Kasi mukughanaghana kuti Yona wakajipulika wuli? Kasi wakaghanaghananga kuti wafwirenge waka mwenemumu? Panji kasi wakaghanaghananga kuti Yehova wamujowora? Yona wakwenera kuti wakenjerwanga chomene.

6. Kuyana na Yona 2:​1, 2, 7, kasi Yona wakasanga wuli nkhongono apo wakaŵa mu nthumbo ya somba?

⁶ Kasi Yona wakachita wuli kuti wasange nkhongono apo wakaŵa mu malo ghayekha mu nthumbo ya chisomba? Chakwamba, wakalomba kwa Yehova. (Ŵazgani Yona 2:​1, 2, 7.) Nangauli wakamupulikira yayi Yehova, kweni Yona wakapera ndipo wakagomezganga kuti Yehova wapulikenge lurombo lwake. Kweniso Yona wakaghanaghanirapo chomene malemba agho wakaŵazgapo kumanyuma. Chifukwa wuli tikuyowoya nthena? Mu lurombo lwake, ulo luli kulembeka mu Yona chaputara 2, wakagwiliskira ntchito mazgu ghanandi ghakuyana waka na agho ghakusangika mu Masalimo. (Mwachiyelezgero, yaniskani lemba la Yona 2:​2, 5 na Salimo 69:1; 86:7.) Vikulongolerathu kuti Yona wakaghamanyanga makora malemba agha. Chifukwa cha kughanaghanirapo pa malemba agha panyengo yakusuzga iyo wakaŵamo, vikamovwira kuti waŵe na chigomezgo chose kuti Yehova wamovwirenge. Pamanyuma, Yona wakawelera ku mtunda wakomira, ndipo sono wakaŵa wakunozgeka kuchita mulimo uwo Yehova wakamutuma.—Yona 2:10–3:4.

7-8. Kasi mubali munyake ku Taiwan wakasanga wuli nkhongono apo wakasangana na viyezgo?

⁷ Chiyelezgero cha Yona chingatovwira para tikukumana na viyezgo vyakupambanapambana. Mwachiyelezgero, Zhiming, b mubali wa ku Taiwan, wakusuzgika na nthenda yinyake. Kweniso ŵamumbumba yakwake ŵakumusuzga chomene chifukwa cha chipulikano chake. Kweni wakusanga nkhongono kufuma kwa Yehova kwizira mu lurombo kweniso kusambira. Iyo wakuti: “Nyengo zinyake para nasangana na masuzgo, nkhwenjerwa chomene mwakuti nkhujipulika nga kuti  ningachita yayi sambiro la namwene.” Kweni iyo wakugomezga Yehova kuti wamovwire. Iyo wakuti: “Chakwamba, nkhulomba kwa Yehova. Kufuma apo, nkhutora mahedifoni ghane na kwamba kutegherezga sumu zithu za Ufumu. Nyengo zinyake, nkhwimbako chapasipasi m’paka mtima ukhale mu malo. Pamanyuma nkhwambapo kusambira.”

⁸ Sambiro la iyomwene lamovwira Zhiming kuti waŵe na nkhongono zakuzizipizgira masuzgo ghakuru agho wakusangana nawo. Mwachiyelezgero, apo ŵakati ŵamupanga opareshoni, nesi munyake wakamuphalira kuti ndopa zake ni zichoko, ndipo wakhumbikwirenge ndopa. Pa usiku wakuti machero ghake ŵamupangenge opareshoni, Zhiming wakaŵazga nkhani yinyake yakukhwaskana na mudumbu uyo ŵakamuchita opareshoni yakuyana na yake. Iyo ndopa zake zikaŵa zichoko chomene kuluska za Zhiming; kweni wakakana kupokera ndopa ndipo wakachira makora waka. Nkhani iyi yikamukhozga Zhiming kuti walutilire kugomezgeka.

9. Kasi mungachita wuli usange mukwenjerwa chomene chifukwa cha chiyezgo icho mwakumana nacho? (Wonaniso vithuzi.)

⁹ Panyengo ya chiyezgo, kasi mukutondeka kulomba kwa Yehova chifukwa cha kwenjerwa chomene? Panji kasi mukujipulika kuti nkhongono mulije zakusambilira? Kumbukani kuti Yehova wakupulikiska makora chomene umo vinthu viliri kwa imwe. Ntheura nanga mungalomba lurombo lupusu waka, gomezgani kuti wamupaninge ivyo mukukhumbikwira nadi. (Efe. 3:20) Usange ntchakusuzga kuŵazga chifukwa chakuti ndimwe mulwari, wakuvuka, panji mukwenjerwa chomene, mungategherezga Baibolo lakuchita kujambura panji mabuku ghithu ghakulongosora Baibolo. Mungategherezgaso yimoza mwa sumu zithu panji kuwonelera mavidiyo pa jw.org. Yehova wakukhumba kumuzgorani ŵankhongono ndipo wachitenge nthena para mukumulomba na kupenjerezga mazgoro gha lurombo lwinu mu Baibolo kweniso mu vinthu vinyake ivyo wakumupani.

10. Kasi ŵabali na ŵadumbu ŵangatikhozga wuli?

¹⁰ Yehova wangagwiliskira ntchito ŵabali na ŵadumbu kutikhozga. Iwo ‘ŵangatisanguluska’ para tikusangana na chiyezgo panji para vikutisuzga kufiska uteŵeti unonono. (Kol. 4:​10, 11)  Tikukhumbikwira ŵabwezi, chomenechomene panyengo izo tili “mu suzgo.” (Zinth. 17:17) Para nkhongono zatimalira, ŵasopi ŵanyithu ŵangatipembuzga panji kutikhozga kuti tilutilire kuteŵetera Yehova mwakugomezgeka. Wonani umo Mariya, mama wa Yesu, wakakhozgekera na ŵasopi ŵanyake.

11. Chifukwa wuli Mariya wakakhumbikwiranga nkhongono?

¹¹ Mariya wakakhumbikwiranga nkhongono kuti wachite khumbo la Yehova. Ghanaghanirani umo wakafipira mtima wati wapika mulimo wakusuzga kufuma kwa mungelo. Wakaŵa kuti wandatengwe; kweni wakaŵa kuti waŵenge na nthumbo. Wakaŵa kuti wandalerepo mwana, kweni wakakhumbikwiranga kuzakapwelelera mwana uyo wazamuŵa Mesiya. Kweniso wakaŵa kuti wandagonanepo na mwanalume, kweni wakakhumbikwiranga kumuphalira Yosefe kuti wali na nthumbo. Ichi chikwenera kuti chikaŵa chakusuzga chomene.—Luka 1:​26-33.

12. Kuyana na Luka 1:​39-45, kasi Mariya wakasanga wuli nkhongono izo wakakhumbikwiranga?

¹² Kasi Mariya wakapokera wuli nkhongono izo wakakhumbikwiranga kuti wafiske mulimo wapadera uwu kweniso wakusuzga? Wakapempha ŵanji kuti ŵamovwire. Mwachiyelezgero, wakafumba mungelo Gabriyeli kuti wamuphalire fundo zakusazgikira zakukhwaskana na mulimo wake. (Luka 1:34) Kufuma apo, “wakaluta mu charu cha mapiri” gha Yuda kukawona mubali wake Elizabeti. Uwu ukaŵa ulendo uwemi chomene. Elizabeti wakamuwonga chomene Mariya, kweniso mwakovwirika na Yehova wakamuphalira Mariya uchimi wakukhozga wakukhwaskana na mwana uyo wazamubaba. (Ŵazgani Luka 1:​39-45.) Mariya wakati Yehova “wachita milimo yankhongono na woko lake.” (Luka 1:​46-51) Yehova wakamukhozga Mariya kwizira mwa Gabriyeli na Elizabeti.

13. Kasi ntchivichi chikachitika mudumbu munyake wati wapempha wovwiri ku ŵabali na ŵadumbu?

¹³ Nga ni Mariya, namwe mungasanga nkhongono kwizira mwa Ŵakhristu ŵanyinu. Dasuri, mudumbu wa ku Bolivia, wakakhumbikwiranga kukhozgeka. Adada ŵake ŵakati ŵaŵagoneka mu chipatala chifukwa cha nthenda yakofya chomene, Dasuri ndiyo wakaŵa na mulimo wakuŵapwelelera. (1 Tim. 5:4) Kweni chikaŵa chipusu yayi. Iyo wakuti, “Kanandi nkhawonanga nga ningaleka waka.” Kasi wakapempha ŵanji kuti ŵamovwire? Pakwamba wakapempha yayi. Iyo wakuti: “Nkhakhumbanga yayi kuti nisuzge ŵabali. Nkhati mu mtima, ‘Yehova ndiyo wanipenge wovwiri uwo nkhukhumbikwira.’ Kweni pamanyuma nkhawona kuti para nkhujipatura ku ŵanji, ndikuti nkhujigomezga kuti ningamarana nalo nekha suzgo lane.” (Zinth. 18:1) Dasuri wakawona kuti walembere ŵabwezi ŵake ŵachoko waka na kuŵalongosolera vya suzgo lake. Iyo wakuti: “Nkhutondeka na kuyowoya umo Ŵakhristu ŵanyane ŵakanikhozgera. Ŵakaniyegheranga chakurya ku chipatala na kunipembuzga na malemba. Ntchakukondweska chomene kumanya kuti tili tekha yayi. Tili mu mbumba yikuru ya Yehova, iyo njakunozgeka kutovwira, kulira nase para tili mu suzgo, kweniso kutikhozga kuti tilutilire kuteŵetera Yehova pamoza.”

14. Chifukwa wuli tikwenera kuzomera wovwiri kufuma ku ŵalara?

¹⁴ Nthowa yinyake iyo Yehova wakutipira nkhongono nkhwizira mu ŵalara. Iwo ni vyawanangwa ivyo Yehova wapeleka kuti wamukhozgani na kumusamphuskani. (Yes. 32:​1, 2) Ntheura para mukufipa mtima na vinthu vinyake, phalirani ŵalara. Ndipo para ŵamupani wovwiri, zomerani mwaluŵiro. Yehova wangagwiliskira ntchito ŵalara kuti wamovwirani kuŵa ŵankhongono.

15. Kasi Ŵakhristu wose ŵakuzirwiska chigomezgo wuli?

¹⁵ Ivyo Baibolo likulayizga vingatipa chigomezgo kweniso nkhongono kuti tilutilire kuteŵetera Yehova. (Rom. 4:​3, 18-20) Taŵakhristu tili na  chigomezgo chiwemi chomene cha kuzakakhala kwamuyirayira, kwali nkhuchanya panji mu paradiso pa charu chapasi. Chigomezgo chithu chikutipa nkhongono kuti tizizipizge viyezgo, tipharazgenge makani ghawemi, kweniso kuchita milimo yakupambanapambana mu mpingo. (1 Tes. 1:3) Chigomezgo chakuyana waka ichi ndicho chikakhozgaso mpositole Paulosi.

16. Chifukwa wuli mpositole Paulosi wakakhumbikwiranga nkhongono?

¹⁶ Paulosi wakakhumbikwiranga nkhongono. Mu kalata yake iyo wakalembera Ŵakorinte, wakajiyaniska na chiŵiya cha dongo. Iyo ‘wakafyenyekanga,’ ‘wakahangayikanga,’ “kutambuzgika,” na “kuponyeka pasi.” Umoyo wake ukaŵa pangozi. (2 Kor. 4:​8-10) Paulosi wakalemba mazgu agha panyengo ya ulendo wake wachitatu waumishonale. Wati walemba mazgu agha, wakakumana na masuzgo ghakuru chomene. Wakatimbikanga, kukakika, ngalaŵa kumubwangasukira, kweniso kujalirika mu jele.

17. Kuyana na 2 Ŵakorinte 4:​16-18, kasi ntchivichi chikawovwira Paulosi kuti wazizipizge?

¹⁷ Paulosi wakasanga nkhongono zakuzizipizgira chifukwa cha kuŵika mtima pa chigomezgo icho wakaŵa nacho. (Ŵazgani 2 Ŵakorinte 4:​16-18.) Wakaphalira Ŵakorinte kuti nanga wunthu wake wakuwaro ‘ungamara,’ wawelerenge nyuma yayi. Paulosi wakaŵika mtima pa chigomezgo chake cha munthazi. Chigomezgo chake cha umoyo wamuyirayira kuchanya chikaŵa chapadera chomene, kuluska nthambuzgo yiliyose iyo wakasangananga nayo. Paulosi wakaghanaghanirangapo pa chigomezgo ichi, ndipo ivi vikapangiska kuti wunthu wake wamukati ‘uzgokenge uphya zuŵa na zuŵa.’

18. Kasi Tihomir na mbumba yake ŵakhozgeka wuli na chigomezgo icho ŵali nacho?

¹⁸ Tihomir, mubali wa ku Bulgaria, wakusanga nkhongono chifukwa cha chigomezgo chake. Vyaka vichoko waka ivyo vyajumpha, munung’una wake Zdravko, wakafwa pangozi. Ivi vikapangiska kuti Tihomir waŵe na chitima chomene. Kweni kuti iyo pamoza na mbumba yake ŵazizipizge, ŵakughanaghanirapo nkhani ya chiwuka. Iyo wakuti: “Mwachiyelezgero, tikudumbiskananga uko tizamukumana na Zdravko, vyakurya ivyo tizamumuphikira, awo tizamuŵachema  pa chiphikiro chakwamba para iyo wazakawuka, kweniso ivyo tizamumuphalira vya mazuŵa ghaumaliro.” Tihomir wakuti kughanaghanirapo chomene chigomezgo chawo, kwakhozga mbumba yawo kuti yilutilire kuzizipizga na kulindilira nyengo iyo Yehova wazamuwuskira mubali wawo.

19. Kasi mungachita wuli kuti mukhozge chigomezgo chinu? (Wonaniso chithuzi.)

¹⁹ Kasi mungachita wuli kuti mukhozge chigomezgo chinu? Mwachiyelezgero, usange chigomezgo chinu ntchakuti muzamukhala pa charu chapasi kwamuyirayira, ŵazgani nkhani zakukhwaskana na Paradiso na kughanaghanirapo. (Yes. 25:8; 32:​16-18) Ghanaghanirani umo umoyo uzamuŵira mu charu chiphya. Ndipo mujitore kuti muli mu charu chiphya. Kasi mukuwona njani? Kasi mukupulika vichi? Kasi mukujipulika wuli? Kuti mughanaghanire makora umo Paradiso wazamuŵira, wonani vithuzi mu mabuku ghithu panji wonelerani sumu za mavidiyo nga za mutu wakuti Charu Chiphya Icho Chizenge, Charu Chiphya Chili Pafupi, panji Ghanaghanirani Nyengo Iyo. Para nyengo na nyengo tikughanaghanirapo chigomezgo chithu cha charu chiphya, masuzgo ghithu tighawonenge kuti ‘ngakanyengo na yakupepuka.’ (2 Kor. 4:17) Chigomezgo icho Yehova watipa chingatovwira kuzizipizga masuzgo.

20. Kasi tingasanga wuli nkhongono para talopwa?

²⁰ Nanga tingaŵa kuti talopwa, “tisangenge nkhongono mwa Chiuta.” (Sal. 108:13) Yehova wali kupeleka kale ivyo mukukhumbikwira kuti mupokere nkhongono kufuma kwa iyo. Ntheura para mukukhumba wovwiri kuti mufiske mulimo winu, muzizipizge chiyezgo, panji mulutilire kukondwa, mulombani Yehova kufumira pasi pamtima kweniso musambirenge pamwekha. Zomerani wovwiri kufuma ku ŵabali na ŵadumbu. Nyengo na nyengo mughanaghanirengepo chigomezgo chinu. Para muchitenge nthena “mukhozgekenge na nkhongono zose mwakuyana na nkhongono [za Chiuta] zauchindami kuti muzizipizge vinthu vyose ndiposo muzikire na kuŵa na chimwemwe.”—Kol. 1:11.