Kale Mlengi withu wakayowoyanga na ŵanthu kwizira mu ntchimi kweniso ŵangelo. Kweniso wakasankha kuti ivyo walayizga vilembeke mu Mazgu ghake. Chiuta walayizga kuti munthazi umu tizamuŵa ŵakukondwa. Kasi pasono tingavisanga nkhuni ivyo Chiuta walayizga?

Uthenga wa Chiuta ukusangika mu Malemba Ghakupatulika. (2 Timote 3:16) Kasi Chiuta wakachita wuli kuti ntchimi zilembe uthenga wake? (2 Petrosi 1:21) Chiuta ndiyo wakaŵaphaliranga ivyo ŵakalembanga. Mazuŵa ghano napo vyanthena vikuchitika. Mwachiyelezgero, bwana wangaphalira sekeletare uthenga wakuti walembe. Nangauli sekeletare ndiyo wangalemba kweni uthenga ukuŵa wake yayi. Mwakuyana waka, nangauli ŵanthu ndiwo ŵakalemba Malemba Ghakupatulika kweni uthenga ngwa Chiuta.

Uthenga wa Chiuta ngwakuzirwa chomene, lekani wakukhumba kuti ŵanthu wose ŵawuŵazge na kuwupulikiska. Mazuŵa ghano “makani ghawemi ghamuyirayira” ghakupharazgika ‘ku mtundu uliwose, fuko lililose, na chiyowoyero chilichose.’ (Chivumbuzi 14:6) Chiuta wawovwira kuti Malemba Ghakupatulika ghasangikenge mu viyowoyero vyakujumpha 3,000. Ndipo palije buku linyake ilo likusangika mu viyowoyero vinandi nthena kuluska Malemba Ghakupatulika.