KUYANA na Dango, Ŵaisrayeli ŵakazomerezgekanga kupeleka njiŵa na nkhunda kuŵa sembe kwa Yehova. Tuyuni utu nyengo zose tukazunulikanga pamoza mu malango ghakukhwaskana na kupeleka sembe, ndipo munthu wakazomerezgekanga kupeleka nkhunda panji njiŵa kuŵa sembe. (Lev. 1:14; 12:8; 14:30) Chifukwa wuli dango ili likaŵa liwemi? Chifukwa chimoza ntchakuti nyengo zinyake njiŵa zikasangikanga yayi. Chifukwa wuli?

Mu nyengo ya Ŵaisrayeli, njiŵa zikasangikanga mu chihanya pera. Mu chifuku, tuyuni utu tukasamiranga ku vigaŵa vya kumwera uko kukawotchanga, ndipo tukawelerangaso ku Israyeli mu nyengo ya chihanya. (Sumu. 2:11, 12; Yer. 8:7) Ntheura mu nyengo ya chifuku, chikaŵanga chakusuzga ku Ŵaisrayeli kusanga njiŵa kuti ŵapeleke sembe.

Kweni nkhunda kanandi zikukhala malo ghamoza, ntheura nyengo yiliyose zikasangikanga ku Israyeli. Kweniso nkhunda ŵakachitanga kuŵeta pa nyumba zawo. (Yaniskani na Yohane 2:14, 16.) Buku linyake likuti (Bible Plants and Animals), “mu mizi na mu matawuni ghose ku Palestina ŵakaŵetanga nkhunda. Waliyose wakaŵanga na chitupa pa nyumba pake, icho wakaŵeterangamo nkhunda.”—Yaniskani na Yesaya 60:8.

Ntheura Yehova wakalongora kuti ngwachitemwa kweniso wakughanaghanira ŵanthu, chifukwa wakaŵazomerezganga kupeleka sembe ya tuyuni uto tukaŵa twambura kusuzga kutusanga mu Israyeli chaka chose.