VYAKA pafupifupi 10 ivyo vyajumpha, apo ŵakaŵa na vyaka vya m’ma 30, Gregorio na Marilou, awo mbakutorana, ŵakacitanga upayiniya mu Manila uku ŵakugwira nchito. Cikaŵa cakusuzga kweni ŵakacita makora. Nyengo yikati yajumphapo, Marilou ŵakamukwezga pa nchito yake iyo wakagwiranga ku banki na kuŵa bwana. Iyo wakati: “Nchito zithu izi zikapangiska kuti tiŵe na umoyo wapacanya comene.” Mbumba iyi yikasanganga ndalama zinandi mwakuti yikaghanaghana vya kuzenga nyumba yapacanya comene, pa mtunda wa makilomita 19 ku mafumiro gha dazi kwa msumba wa Manila, mu cigaŵa ca ŵanthu ŵasambazi. Yikapempha kampani ya vyakuzengazenga kuti yiŵazengere nyumba iyi, ndipo ŵakapangana kuti mbumba iyi yilipirenge ndalama mwezi uliwose mu vyaka 10.

Marilou wakalongosora kuti: “Nchito iyo nkhamba kugwira sono yikanimaliranga nyengo na nkhongono mwakuti mwamphu wane pa vinthu vyauzimu ukamba kucepa. Nkhawona kuti nkhibiranga Yehova nyengo.” Iyo wakalutilira kulongosora, wakati: “Nkhamba kutondeka kufiska maora agho  mupayiniya wakukhumbikwira kufiska.” Gregorio na Marilou ŵakakondwanga yayi na ivyo vikacitikanga, ntheura ŵakadumbiskana pa umo ŵakucitira vinthu pa umoyo wawo. Gregorio wakati: “Tikakhumbanga kuti tisinthe, kweni tikamanyanga yayi ico tingacita. Tikadumbiskana umo tingacitira kuti titeŵetere Yehova mwakukwana, comenecomene pakuwona kuti tilije ŵana. Tikalomba ulongozgi kwa Yehova.”

Pa nyengo iyi, ŵakategherezga nkhani zinandi zakukhwaskana na kukateŵetera uko ŵapharazgi ŵa Ufumu mbacoko. Gregorio wakati: “Tikawona kuti Yehova wazgora malurombo ghithu kwizira mu nkhani izi.” Mbumba iyi yikalomba kuti Ciuta wayisazgireko cipulikano kuti yisankhe vinthu mwakwenelera. Cinthu cikuru ico cikaŵa cakujandizga, yikaŵa nyumba iyo ŵakazenganga. Ŵakaŵa kuti ŵalipira kale kwa vyaka vitatu. Kasi ŵacitenge wuli? Marilou wakati: ‘Tikawona kuti usange tingaŵalekeska kuzenga, ndikuti titayenge mu maji ndalama zinandi izo tikaŵa kuti talipira kale. Kweni tikawona kuti tikeneranga kusankha pakati pa kucita dankha khumbo la Yehova panji kucita makhumbiro ghithu.’ Ŵakati ŵaghanaghanirapo mazgu gha mpositole Paulosi ghakuti, “nkhupima vinthu vyose kuŵa vyambura nchito,” ŵakalekeska mulimo wa kuzenga nyumba, ŵakaleka nchito zawo, ŵakaguliska katundu wawo munandi, ndipo ŵakasamira ku mizi ya pa cirwa ca Palawan, iyo yili pa mtunda wa makilomita 480 kumwera kwa Manila.—Fil. 3:8.

Pambere ŵandasame, Gregorio na Marilou ŵakamba kunozgekera umo ŵangakhalira umoyo wambura kukhumba vinandi, kweni ŵakamanyanga yayi umo umoyo wamuŵira nadi mpaka apo ŵakafikira ku malo agho. Marilou wakati: “Nkhazizikika comene. Kukaŵavya magesi, na vinyake ivyo vikupangiska kuti umoyo uŵeko upusu. M’malo mwa kuphika pa moto wa magesi tikamba kuphika pa moto wa nkhuni. Kukaŵavya masitoro ghakurughakuru na vinthu vinyake ivyo vikusangika ku tawuni.” Ndipouli, mbumba iyi yikalutilira kukumbuka cifukwa ico yikasamira, ndipo yikasintha umoyo wake. Marilou wakalutizga kuti: “Kuno nkhusangwa kudaŵira cilengiwa, ndipo nyenyezi zikuŵala comene usiku. Kweni cikuru comene nchakuti ŵanthu ŵakukondwa para tikuŵapharazgira. Kuno, ‘tamanya cisisi’ ca kuŵa ŵakukhorwa.”—Fil. 4:12.

Gregorio wakalongosora kuti: “Apo tikafikiranga, kuno kukaŵa Ŵakaboni ŵanayi pera. Ŵakakondwa comene nkhati namba kudumba nkhani yacisanisani sabata yiliyose, na kulizga gitara lane pakwimba sumu za Ufumu.” Pambere caka cindamare, gulu licoko ili likakura na kuŵa mpingo wa ŵapharazgi 24. Gregorio wakuti: “Mpingo uwu ukutitemwa comene ndipo ici cikutikhozga.” Ŵateŵetera ku malo agha vyaka vyakujumpha 6, ndipo ŵakuti: “Tili ŵakukondwa comene kuwona ŵanthu ŵanandi ŵakwiza mu mpingo.  Palije cinthu cakukondweska kuluska ici! Sono ndipo umoyo ukunozga.”

Mu Philippines, ŵabali na ŵadumbu pafupifupi 3,000 ŵasamira uko kuli ŵapharazgi ŵacoko ŵa Ufumu. Pa aŵa, 500 mbadumbu ŵambura kutengwa. Yumoza wawo ni Karen.

Karen, uyo pasono wali na vyaka vya m’ma 20, wakakulira mu tawuni ya Baggao, ku Cagayan. Apo wakaŵa muwukirano, wakakhumbanga kusazgirako uteŵeti wake. Iyo wakati: “Pakumanya kuti nyengo yakukhalako yafupiskika, ndiposo kuti ŵanthu ŵa mitundu yose ŵakukhumbikwira kupulika uthenga wa Ufumu, nkhakhumba kukateŵetera uko ŵapharazgi mbacoko.” Ŵabali ŵake ŵanyake ŵakamuciskanga kuti wasambire comene m’malo mwa kuluta ku mizi kuti wakapharazgenge, kweni Karen wakalomba ulongozgi kwa Yehova. Kweniso wakafumba awo ŵakuteŵetera uko ŵapharazgi mbacoko. Apo wakaŵa na vyaka 18, wakasamira uko kuli ŵapharazgi ŵacoko, mtunda wa makilomita 64 kufuma ku tawuni yakwake.

Mpingo ucoko uwo Karen wakasamirako, ukupharazga mu cigaŵa ca mapiri mumphepete mwa Nyanja ya Pacific. Karen wakati: “Apo tikafumanga ku Baggao kuluta ku mpingo uwu, tikenda mazuŵa ghatatu. Tikajumpha mu mapiri, na kwambuka madambo ghakujumpha 30.” Wakasazgirapo kuti: “Kuti nkhasambire Baibolo na ŵanthu ŵanyake, nkhwenda maora 6, ndipo nkhugona kwenekuko, na kwendaso maora 6 kuwelera ku nyumba.” Kasi wakuphyoka pawaka? Karen wakati: “Nyengo zinyake malundi ghakuŵinya.” Kweni uku wakumwemwetera, wakasazgirapo kuti: “Nasambizga ŵanthu 18. ‘Naceta na kuwona kuti Yehova ni muwemi.’”—Sal. 34:8.

Sukhi ni mudumbu wambura kutengwa wa vyaka vya m’ma 40, ndipo wakasama ku United States na kuluta ku Philippines. Cifukwa wuli? Mu 2011 wakaluta ku ungano wa dera. Mu nkhani yinyake, mubali na muwoli wake ŵakalongosora kuti ŵakaguliska katundu wawo munandi na kusamira ku Mexico kuti ŵakawovwire pa nchito ya kupharazga. Sukhi wakati: “Mubali uyu na muwoli wake ŵakapangiska kuti niŵe na vilato ivyo nkhaŵa kuti nindaghanaghanirepo nakale.” Sukhi, mweneuyo ngwa ku India, wakati wamanya kuti ŵanthu awo ŵakuyowoya Cipunjabi mu Philippines ŵakukhumbikwira wovwiri, wakaghanaghana vyakuti walute. Kasi pakaŵa vyakujandizga?

Sukhi wakati: “Kusankha katundu uyo ningaguliska na uyo ningasunga cikaŵa cakusuzga comene kuluska umo nkhaghanaghaniranga pakwamba. Kweniso, nkhasama na kukakhala na ŵapapi ŵane na ŵana ŵakwithu. Ndipo umoyo ukaŵa wakupambana na umo nkhakhaliranga nekha kwa vyaka 13. Nangauli cikaŵa cipusu yayi, kweni yikaŵa nthowa  yiwemi yakunozgekelera umoyo wambura kukhumba vinandi.” Kasi wakasangana na masuzgo wuli wakati wasamira ku Philippines? “Suzgo likuru ilo nkhaŵa nalo ndakuti nkhawopanga vidoyo kweniso nkhakumbukanga kukaya. Nkhasambira kuthemba comene Yehova.” Kasi wasuzgika pawaka? Uku wakumwemwetera, Sukhi wakati: “Yehova wakutiphalira kuti, ‘Mundiyezge, usange ndileke kumujulirani vidangazi vyakucanya na kumupungulirani citumbiko.’ Nkhuwona kuti mazgu agha ngaunenesko, comenecomene para munthu wakunifumba kuti, ‘Mwizengeso pawuli? Nili na mafumbo ghanyake ghanandi.’ Nkhuŵa wakukondwa comene para nkhuwovwira ŵanthu awo ŵali na njara yauzimu.” (Mal. 3:10) Wakasazgirapo kuti: “Ico cikanisuzga comene nkhusankha kuti nisame. Nkhati nacita nthena, Yehova wakaninozgera vinyake vyose.”

Sime, ni mubali wakutora, kweniso wali na vyaka vya m’ma 30. Wakasama mu Philippines na kuluta ku caru cinyake ca ku Middle East kuti wakagwire nchito. Apo wakaŵa mu caru ici, Sime wakakhwimiskika na mulaŵiliri wa dera kweniso na nkhani iyo yikayowoyeka na mubali wa mu Wupu Wakulongozga. Wakaciskika kuti waŵike Yehova pakwamba mu umoyo wake. Sime wakati: “Cikaŵa cakusuzga comene kwa ine kuleka nchito.” Nangauli vikaŵa nthena, wakaleka nchito na kuwelera ku Philippines. Pa nyengo yasono, Sime na muwoli wake, Haidee, ŵakuteŵetera ku cigaŵa cakucemeka Davao del Sur, kumwera kwa caru ici, uko ŵapharazgi ŵa Ufumu mbacoko. Sime wakati: “Nkhacita makora kuleka nchito na kuŵika Yehova pakwamba. Kuteŵetera Yehova na mtima wose nchakukhorweska comene kuluska cilicose.”

Ramilo na Juliet, mbapayiniya ŵakutorana. Ŵakaŵa na vyaka vya m’ma 30 apo ŵakamanyira kuti mpingo uwo uli pa mtunda wa makilomita 30 kufuma kukwawo ukakhumbikwiranga wovwiri, ndipo ŵakajipeleka kukawovwira. Ntheura sabata yiliyose, kwali kuŵe vula kwali yayi, Ramilo na Juliet ŵakuluta ku mpingo uwu kuti ŵakategherezge maungano na kukapharazga. Ŵakwenda pa muthuthuthu wawo. Nangauli ŵakusuzgika kwenda mu misewu ya fuvu na mu maburiji ghambura kukhora, mbakukondwa kuti ŵali kusazgirako uteŵeti wawo. Ramilo wakati: “Ine na muwoli wane tikusambira Baibolo na ŵanthu 11. Kuti titeŵetere uko ŵapharazgi mbacoko tikukhumbikwira kujipata, kweni uteŵeti uwu ukutikhorweska comene.”—1 Kor. 15:58.

Kasi mungatemwa kumanya vinandi vyakukhwaskana na kukateŵetera uko ŵapharazgi ŵa Ufumu mbacoko mu caru cinu panji mu caru cinyake? Usange ni nthena, fumbani mulaŵiliri winu wa dera na kuŵazga nkhani ya mutu wakuti: “Kasi ‘Mungambukira ku Makedoniya’?” mu Uteŵeti Withu wa Ufumu wa Ogasiti 2011.