Ŵapayiniya ŵaŵiri ŵakati ŵanjira mu nyumba yinyake mu caru ca Kenya, ŵakazizikika ŵati ŵawona munthu wakupendera uyo wakagona pa bedi. Munthu uyu wakaŵa na thupi licoko comene na tumawoko tufupi. Apo ŵakadumbiskananga nayo layizgo la Ciuta lakuti “mugonthi wadukenge nga ndi mpala,” wakakondwa comene.—Yes. 35:6.

Ŵapayiniya aŵa ŵakaphalirika kuti Onesmus, uyo pasono wali na vyaka vya m’ma 30, wali kubabika na nthenda iyo yikupangiska kuti viwangwa viŵe vyambura kukhora. Viwangwa vyake ni vyakuti kumufyenya pacoko waka mbwenu vikuphyoka. Cifukwa cakuti nthenda iyi yilije munkhwala, Onesmus wakalindizganga kuti wapulikenge vyakuŵinya na kwenda pa kanjinga umoyo wake wose.

Onesmus wakazomera kusambira Baibolo. Kweni anyina ŵakakana kuti walutenge ku maungano cifukwa ŵakaghanaghananga kuti mwana wawo wangapwetekeka na kusazgirako vyakuŵinya. Ntheura, ŵabali ŵakajamburanga maungano ndipo Onesmus wakategherezgeranga ku nyumba. Wakati wasambira kwa myezi yinkhondi, Onesmus wakaghanaghana kuti wambe kuluta ku maungano nanga pangaŵa masuzgo.

Kasi Onesmus wakasazgirako vyakuŵinya cifukwa ca kuluta ku maungano? Yayi. M’malo mwake, sono ndipo wakaŵangako makora. Iyo wakati: “Vyakuŵinya ivyo nkhapulikanga vikacepangako para nili pa maungano.” Onesmus wakawona kuti cigomezgo ico wakasanga ndico cikapangiska kuti wajipulikenge makora. Amama ŵake ŵakakondwa comene ŵati ŵawona kuti mwana wawo ngwakukondwa panyengo yasono, ndipo nawo ŵakazomera kusambira Baibolo. Iwo ŵakatemwanga kuyowoya kuti: “Kuteŵetera Ciuta ni munkhwala wa mwana wane.”

Pakati pajumpha nyengo, Onesmus wakaŵa mupharazgi wambura kubapatizika. Kufuma apo, wakabapatizika ndipo pasono ni muteŵeti wakovwira. Nangauli malundi ghake ghakugwira nchito yayi, ndipo woko lake limoza ndilo likugwira nchito, Onesmus wakakhumbanga kucita vinandi pakuteŵetera Yehova. Wakakhumbanga kucita upayiniya wakanyengo kweni wakakayikanga kupempha upayiniya uwu. Cifukwa wuli? Cifukwa wakamanyanga kuti wazamukhumbikwira munthu munyake kuti wamututuzgenge pa kanjinga kake. Wakati waphalira Ŵakhristu ŵanyake, ŵakamulayizga kuti ŵamovwirenge. Ndipo ŵakamovwira nadi.

Onesmus wakakayikangaso kupempha upayiniya wanyengozose. Ndipouli, pa nyengo yinyake lemba la zuŵa likamukhozga comene. Likaŵa lemba la Salmo 34:8, ilo likuti: “Cetani ’mwe! muwone kuti Yehova ndi muwemi.” Onesmus wakati waghanaghanirapo pa lemba ili, wakamba kucita upayiniya wanyengozose. Panyengo yasono wakupharazga mazuŵa ghanayi pa sabata, ndipo ŵanji mwa awo wakusambira nawo Baibolo ŵakucita makora mwauzimu. Mu 2010, wakasambira Sukulu ya Uteŵeti wa Upayiniya. Onesmus wakakondwa comene wakati wawona kuti yumoza wa awo ŵakamusambizganga Baibolo wakaŵa msambizgi pa sukulu iyi.

Panyengo yasono, ŵapapi ŵa Onesmus ŵali kufwa, ndipo ŵabali na ŵadumbu ndiwo ŵakumupwelelera. Iyo wakuwonga comene cifukwa ca vitumbiko ivyo wakusanga panyengo yasono ndipo wakulindilira mwakunweka nyengo apo “nanga njumoza wa ŵenecaru tiwanene, ‘Ndalwara.’”—Yes. 33:24.