“Wakukumbuka Kuti Tili Fuvu Ise”
Sendelerani kwa Ciuta
“Wakukumbuka Kuti Tili Fuvu Ise”
PAKUYOWOYA za maubudi agho wakacita kumanyuma, mwanakazi munyake uyo ni Mkhristu wakalemba kuti: “Nkhagomezganga yayi kuti Yehova wanganigowokera, ndipo nkhaghanaghananga kuti niyeghenge katundu muzito uyu umoyo wane wose.” Mbunenesko kuti para njuŵi yithu yikutisuska, tikuŵa nga tathwika katundu muzito comene. Ndipouli, Baibolo lili na fundo izo zingapembuzga ŵakwananga awo ŵapera mwakuti ŵaleke kusuzgika comene maghanoghano. Wonani mazgu agho wamasalmo Davide wakayowoya, agho ghali pa Salmo 103:8-14.
Davide wakamanyanga kuti “Yehova ngwalusungu” ndipo wakukhalira waka kutisanga vifukwa yayi. (Mavesi 8-10) Usange Ciuta wawona kuti mphakwenelera kulongora lusungu, wakulongora lusungu lukuru. Davide, uyo wakamanyanga comene kwimba, wakayowoya vinthu vitatu kuti walongosore umo Ciuta wakutilongolera lusungu.
“Umo uliri mtambo kutumphukira pacanya pa caru, ntheura ndimo uliri ukuru wa lusungu lwake ku awo ŵakumopa.” (Vesi 11) Para tikulaŵiska kucanya nausiku, tikutondeka kughanaghanira utali wa mtunda kufuma kucanya uko kuli nyenyezi kuzakafika pa caru capasi. Ntheura Davide wakutovwira kumanya ukuru wa lusungu lwa Yehova, ulo wakulongora cifukwa ca citemwa cake. Nkhwantha yinyake yikuti Ciuta wakulongora lusungu ulu kwa awo ‘ŵakumopa, awo mbakujiyuyura, ndiposo awo ŵakucindika mazaza ghake na mtima wose.’
“Umo uliri utali kufuma kuvuma kuyakafika na kuzambwe, ntheura ndimo walikuwuskirapo pa ise majuvyo ghithu.” (Vesi 12) Mu Mabaibolo ghanyake vesi ili lili kung’anamulika kuti “Umo uliri utali kufuma kuvuma mpaka kuzambwe.” Kasi kuzambwe na kuvuma kuli kutalikirana wuli? Kuli kutalikirana comene. Buku linyake lakulongosora Baibolo likuti: “Usange tingenda mucanya na kulazga kuvuma, tikutalikirana comene na kuzambwe.” Apa Davide wakutiphalira kuti para Ciuta watigowokera zakwananga zithu, wakuzitaya kutali comene na ise.
“Umo wiske wakufwilira lusungu ŵana ŵake, ntheura ndimo Yehova wakufwilira lusungu awo ŵakumopa.” (Vesi 13) Davide uyo nayo wakaŵa dada, wakamanyanga umo dada wacitemwa wakujipulikira mu mtima. Dada wacitemwa wakulongora lusungu ku ŵana ŵake comenecomene para ŵakusuzgika. Davide wakutisimikizgira kuti Dada withu wakucanya wakulongora lusungu ku ŵana ŵake pa caru capasi, comenecomene para ŵapera ndipo ‘mtima wawo waphyoka’ cifukwa ca zakwananga izo ŵacita.—Salmo 51:17.
Davide wakati wayowoya fundo zitatu izi, pamanyuma wakavumbura ico cikumupangiska Yehova kulongora lusungu ku ŵanthu ŵambura kufikapo. Wakati: “Wakumanya kalengekero kithu, wakukumbuka kuti tili fuvu ise.” (Vesi 14) Yehova wakumanya kuti tili kulengeka kufuma ku fuvu, ndise ŵakulopwa ndipo vinyake tikutondeka kucita makora. Pakughanaghanira kuti ndise ŵakwananga, Yehova ngwakunozgeka ‘kutigowokera,’ cikuru talongora mtima wa kupera.—Salmo 86:5.
Kasi mtima winu ukukhwaskika yayi na ivyo Davide wakayowoya pa kukhwaskana na lusungu lwa Yehova? Mwanakazi uyo wazunulika kukwambilira, wakasambira kuti Baibolo likusambizga kuti Ciuta ngwakunozgeka kugowokera. Iyo wakayowoya kuti: “Sono namba kujipulika kuti ningasendelera kwa Yehova, ndipo nkhuwona kuti nathulika katundu muzito.” * Mwalekeraci kusambira vinandi vyakukhwaskana na lusungu lwa Ciuta, ndiposo ivyo mungacita kuti wamulongorani lusungu ulu? Mutepanji namwe muwonenge kuti mwathulika katundu muzito.
Vyaputala ivyo Mungaŵazga mu Ogasiti:
[Mazgu ghamusi]
^ ndime 9 Wonani nkhani ya mutu wakuti “Ciuta Uyo ‘Wakugowokera’” mu cipaturo 26 ca buku lakuti Sandelerani kwa Yehova, lakupharazgika na Ŵakaboni ŵa Yehova.
[Mazgu Ghakukhozgera pa peji 13]
“Sono namba kujipulika kuti ningasendelera kwa Yehova, ndipo nkhuwona kuti nathulika katundu muzito”