Kasi mukukhumba kumanya unenesko wakukhwaskana na Ciuta? Kasi mukukhumba kumanya kuti iyo ninjani, ivyo wakutemwa na kutinkha, ndiposo khumbo lake? Yehova Ciuta wakuvumbura unenesko wakukhwaskana na iyo mu Mazgu ghake, Baibolo. Kweni ni waliyose yayi uyo wangaŵazga Baibolo na kupulikiska unenesko uwu. Cifukwa wuli? Kupulikiska unenesko wakukhwaskana na Ciuta nchawanangwa ndipo ni waliyose yayi uyo wangaŵa naco. Tiyeni tiwone ivyo Yesu wakayowoya pa nkhani iyi.—Ŵazgani Mateyu 11:25.

Lemba la Mateyu 11:25 likwamba na mazgu ghakuti: “Pa nyengo yira Yesu wakati pakuzgora.” Ivyo Yesu wakaŵa pafupi kuyowoya panji vikakolerananga na ivyo vikaŵa kuti vyacitika waka. Wakaŵa kuti wacombora waka ŵanthu ŵanonono mtima ŵa mu misumba yitatu ya Galileya uko wakacita minthondwe. (Mateyu 11:20-24) Panji mungajifumba kuti, ‘Kasi vikenda wuli kuti ŵanthu awo ŵakawonanga minthondwe iyo Yesu wakacitanga ŵakane unenesko uwo wakasambizganga?’ Ŵanthu ŵakakananga cifukwa mitima yawo yikaŵa yinonono.—Mateyu 13:10-15.

Yesu wakamanya kuti tikukhumbikwira vinthu viŵiri kuti tipulikiske unenesko. Tikukhumbikwira wovwiri wa Ciuta ndiposo mtima uwemi. Yesu wakati: “Nkhumulumbani pakweru Ŵadada, Fumu ya kucanya na caru capasi, cifukwa mwabisa vinthu ivi ku ŵavinjeru na ŵamahara ndipo mwavivumbura ku ŵanici.” Kasi mwawona cifukwa ico Baibolo likuyowoyera kuti nchawanangwa kuti munthu wapulikiske unenesko? Pakuti Yehova ni “Fumu ya kucanya na caru capasi,” wali na wenelero wakusankha munthu wakuti wamuvumbulire unenesko. Kweni Ciuta wakutemwera yayi pakuvumbura unenesko uwu. Kasi nchivici cikupangiska kuti Ciuta waleke kuvumbulira ŵanji unenesko wa mu Baibolo apo ŵanyake wakuŵavumbulira?

Yehova wakutemwa ŵakujiyuyura, ŵakujikuzga yayi. (Yakobe 4:6) Wakubisa unenesko ku “ŵavinjeru na ŵamahara, kung’anamura ŵanthu awo ŵakujikuzga cifukwa cakuti mu caru ici ŵakujiwona kuti mbamahara na ŵakusambira ndipo ŵakukana wovwiri wa Ciuta. (1 Ŵakorinte 1:19-21) Kweni Ciuta wakuvumbura unenesko ku “ŵanici,” kung’anamura ŵanthu awo ŵakwiza kwa iyo na mtima wose, ndipo ŵakujiyuyura nga mbana. (Mateyu 18:1-4; 1 Ŵakorinte 1:26-28) Yesu uyo ni Mwana wa Ciuta, wakaŵamanyanga ŵanthu ŵa magulu ghaŵiri agha. Ŵalongozgi ŵanandi ŵavisopa awo ŵakaŵa ŵakujikuzga cifukwa ca masambiro ŵakapulikiska yayi uthenga wa Yesu, kweni ŵalovi awo ŵakaŵa ŵanthu bweka ŵakapulikiska. (Mateyu 4:18-22; 23:1-5; Milimo 4:13) Kweniso ŵanthu ŵanji ŵasambazi na ŵakusambira awo ŵakajiyuyura kufumira pasi pa mtima ŵakazgoka ŵalondezgi ŵa Yesu.—Luka 19:1, 2, 8; Milimo 22:1-3.

Tiyeni tiwelereso pa fumbo la pakwambilira pa nkhani iyi lakuti: Kasi mukukhumba kumanya unenesko wakukhwaskana na Ciuta? Usange ni nthena, mungakhozgeka kumanya kuti Ciuta wakukondwa yayi na ŵanthu awo ŵakujizgora ŵekha kuti mbavinjeru mu caru. Kweni wakukondwa na ŵanthu awo ŵakuwoneka kuti mbapasi mu caru ici. Usange musambirenge Baibolo na mtima wakujiyuyura, mungaŵa pa gulu la ŵanthu awo Ciuta wakuŵapa cawanangwa ca kupulikiska unenesko wakuyowoya za iyo. Para mupulikiskenge unenesko uwu, muŵenge ŵakukondwa sono kweniso mungazakasanga “umoyo wanadi” uwo mbumoyo wamuyirayira mu caru ciphya caurunji ico cili pafupi kwiza. *—1 Timote 6:12, 19; 2 Petrosi 3:13.