Munthu wakwamba Adamu, wakakhala na umoyo kwa vilimika vinandi. Kweni paumaliro wakacekura na kufwa. Kufuma waka nyengo yira, ŵanthu ŵayezga nthowa izi na izi kuti ŵaleke kucekura. Ndipouli, palije na yumoza uyo wali kugwenthapo nyifwa. Cifukwa wuli? Adamu wakacekura na kufwa cifukwa cakuti wakananga apo wakaleka kupulikira Ciuta. Nase tikucekura cifukwa cakuti tili kuhara kwananga kufuma kwa Adamu na njombe yake iyo ni nyifwa.—Ŵazgani Genesis 5:5; Ŵaroma 5:12.

Kuti tiŵe na umoyo wamuyirayira, pakakhumbikwiranga yunji kuti wapeleke sembe kuŵa ciwombolero. (Job 33:24, 25) Ciwombolero tingaciyaniska na ndalama izo munthu wangapeleka kuti wawombore uyo wakakika. Kweni ise tikukhumbikwira kuwombokwa ku nyifwa. (Exodus 21:29, 30) Ntheura, Yesu wakalipira mtengo uwu apo wakatifwira.—Ŵazgani Yohane 3:16.

Ni waliyose yayi uyo wazamuwombokwa ku ulwari na ucekuru. Nakuti ŵanthu awo ŵakuleka kupulikira Ciuta nga umo wakacitira Adamu, ŵazamuŵa na umoyo wamuyirayira yayi. Ŵanthu ŵekha awo Ciuta waŵagowokera zakwananga zawo ndiwo ŵazamuŵa na umoyo wamuyirayira.—Ŵazgani Yesaya 33:24; 35:3-6.

Kuti Ciuta watigowokere, tikwenera kucitapo kanthu. Tikwenera kusambira Baibolo kuti timumanye makora Ciuta. Likutisambizga umo tingaŵira na umoyo uwemi sono, kuŵa paubwezi na Ciuta, kweniso umo tingazakasangira umoyo wamuyirayira.—Ŵazgani Yohane 17:3; Milimo 3:19.