Kuyowoyeskana kuwemi ni para imwe na mwana winu mukudumbiskana mwakufwatuka kuti waliyose wamanye maghanoghano gha munyake na umo wakujipulikira.

Kanandi chikuŵa chakusuzga chomene kuti ŵachinyamata ŵayowoyeskanenge na ŵapapi ŵawo. Buku linyake likuti kanandi para ŵana ŵachali ŵachoko ŵakuphalira ŵapapi ŵawo chilichose. Kweni para ŵafika pawukirano ŵakufwatuka yayi kuyowoyeskana na ŵapapi ŵawo. Ntheura ŵapapi ŵakumanya yayi maghanoghano gha ŵana ŵawo na umo ŵakujipulikira. Nangauli ŵana ŵanyake ŵakufwatuka yayi kuyowoyeskana na ŵapapi ŵawo, kweni nyengo iyi ndiyo njakukhumbikwa chomene kuti ŵapapi ŵayowoyeskanenge na ŵana ŵawo kuti ŵaŵamanye makora.

Manyani nyengo iyo mwana winu wangafwatuka namwe. Yowoyani na mwana winu para wakukhumba kuyowoyeskana namwe nangauli ungaŵa usiku.

Lisa wakati: “Nyengo zinyake mungajifumba kuti, ‘Sono ndipo wakukhumba kuyowoya nane, wanguŵa nkhu nyengo yose iyi?’ Kweni kasi tingadandawura para ŵana ŵithu ŵakukhumba kuyowoyeskana nase? Asi ivi ndivyo mupapi waliyose wakukhumba?”

Herbert wakati: “Nkhutemwa kugona luŵiro, kweni ŵana ŵane ŵakufwatuka kuyowoyeskana nane usiku pakati.”

FUNDO YA MU BAIBOLO: “Waliyose waleke kupenja icho ntchachandulo kwa iyo, kweni icho ntchachandulo kwa munthu munyake.”—1 Ŵakorinte 10:24.

Lekani kutangwanika na vinyake. Dada munyake wakati: “Nyengo zinyake para ŵana ŵane ŵakuniyowoyeska, maghanoghano ghakuŵa kunyake. Ŵana nawo ŵakumanya kuti maghanoghano ghali kunyake.”

Para namwe mukuwona kuti mukutangwanika na TV panji foni mungachita makora kuzimwa vinthu ivi. Ŵikani mtima pa ivyo mwana winu wakuyowoya na kuviwona kuti ni vyakuzirwa nangauli imwe mukuwona kuti ni vyakuzirwa yayi.

Maranda wakati: “Tikwenera kuŵasimikizgira ŵana ŵithu kuti ivyo ŵakukhumba kutiphalira ni vyakuzirwa kwa ise. Para ŵawona kuti tikuŵikako mahara yayi ku maghanoghano ghawo, ŵalekenge kutiphalira umo ŵakujipulikira ndipo ŵamwamba kuphalira ŵanthu ŵanyake.”

Anthony wakati: “Lekani kukalipa usange ivyo mwana winu wamuphalirani ni vyambura kovwira.”

FUNDO YA MU BAIBOLO: “Pwelelerani umo mukupulikira.”—Luka 8:18.

Sangiranipo mwaŵi para muli lumoza. Nyengo zinyake ŵana ŵakufwatuka yayi kuyowoyeskana na ŵapapi maso na maso.

Nicole wakati: “Tikusangirapo mwaŵi kuyowoyeskana na mwana withu para tili mu galimoto. Para takhala pa mpando umoza tikuyowoyeskana makora.”

Nyengo ya chakurya njiwemi kuchezga na ŵana ŵinu.

Robin wakati: “Panyengo ya chakurya cha namise waliyose wakufwatuka kuyowoyapo vinthu viwemi na viheni ivyo vyachitika mu zuŵa ilo. Ivi vikutovwira kuti tilutilire kuŵa ŵakukolerana kweniso kovwirana pa masuzgo agho tikusangana nagho.”

FUNDO YA MU BAIBOLO: “Munthu waliyose wapulikenge luŵiro, wazikirenge pakuyowoya.”—Yakobe 1:19.