“Pasono tawamo kuti chimoza mwa vinthu ivyo vikupangiska kuti ŵachinyamata ŵanandi ŵasuzgikenge maghanoghano ni malo ghakuchezgera gha pa intaneti.”—Dr. Vivek Murthy, U.S. surgeon general, New York Times, June 17, 2024.

 Kasi ŵapapi ŵangavikilira wuli ŵana ŵawo ku masuzgo agho ghakwiza chifukwa cha kugwiliskira ntchito malo ghakuchezgera gha pa Intaneti? Baibolo lili na ulongozgi wakovwira.

 Wonani fundo za mu Baibolo izi.

 “Wakuchenjera wakulanguruka pa mendero ghake ghose.”—Zintharika 14:15.

 Pakuti malo ghakuchezgera gha pa intaneti ghangamunanga mwana winu mukwenera kuŵa maso chomene. Pambere mundamuzomerezge mwana winu kwamba kugwiliskira ntchito malo ghakuchezgera gha pa Intaneti, mukwenera kuwoneseska kuti mwana winu ngwakukhwima mwakuti wangajikora pa nkhani ya nyengo iyo wakumalirapo, wangasankha ŵabwezi mwamahara kweniso kuti waleke kuwona vinthu viheni.

•   Kuti musambire vinandi, ŵazgani nkhani yakuti “Kasi Mwana Wane Wakwenera Kuŵa na Malo Ghakuchezgera gha pa Intaneti?” na “Kusambizga Ŵana Ŵinu Kuti Ŵaŵe Ŵakuvikilirika pa Intaneti.”

 “Mugwiliskirenge ntchito makora nyengo yinu.”—Ŵaefeso 5:16.

 Para mwazomerezga kuti mwana winu wagwiliskirenge ntchito malo ghakuchezgera gha pa intaneti, mupani malango gha umo wachitirenge, ndipo mulongosolerani umo ivi vimovwilirenge kuti waŵe wakuvikilirika. Muŵe maso nakuwona usange mwana winu wasintha nkharo yake, ichi chingaŵa chilongolero chakuti wakwenera kuchepeskako nyengo iyo wakumalira pa intaneti.

•   Mungagwiliskira ntchito vidiyo ya Uŵenge Maso pa Intaneti kuti mumovwire mwana winu kupulikiska chifukwa icho wakwenelera kujikora pa nkhani ya kugwiliskira ntchito malo ghakuchezgera gha pa intaneti.

 Baibolo likuti tikukhala mu “nyengo zinonono na zakusuzga.” (2 Timote 3:1-5) Ndipouli likupelekaso, ulongozgi wakovwira uwo ungatovwira kuzizipizga. Nkhani zakujumpha 20 zakufuma mu Baibolo izo zingawovwira ŵapapi na ŵana wawo mungazisanga mu nkhani iyi yakuyowoya vya umo ŵawukirano ŵangaŵira na umoyo uwemi.