Sumu ntchawanangwa chapadera chomene chakufuma kwa Yehova. Zikutovwira kuti tighanaghanenge makora, kusintha umo tikujipulikira, kweniso zikutovwira kuŵa ŵakukondwa. Umu ndimo zikuŵira sumu za mu JW Broadcasting. Nakuti sumu izi zikutovwiraso mwapadera chomene: zikutovwira kuti tisendelere pafupi na Yehova.

 Kufuma mu 2014, pafumiskika sumu zakujumpha 70 za mu JW Broadcasting, ndipo pasono zinyake mwa sumu izi zikusangika mu viyowoyero vyakujumpha 500! Kweni panji mungajifumba kuti, ‘Ni njani wakupanga sumu izi, ndipo kasi ŵakuchita wuli kuti ŵafumiske sumu?’

 Sumu za mu JW Broadcasting ŵakupanga mbabali na ŵadumbu awo ŵakuwona vya sumu mu Dipatimenti ya Mavidiyo (Audio/Video Services), iyo yikulaŵilirika na Komiti Yakusambizga ya Wupu Wakulongozga. Pali ŵabali na ŵadumbu ŵakukwana 13 awo ŵakovwirapo pa kwata sumu, kuwona umo sumu zikwenera kuŵira, kulemba ndondomeko, na vinyake vyakukhumbikwa. Kweniso Komiti Yakusambizga yili kuzomerezga ŵabali ŵanyake ŵakujipeleka pa charu chose kuti ŵawovwirengepo pa ntchito iyi. Ŵabali aŵa ŵakwata sumu, kuwona umo sumu yikwenera kwimbikira, ndipo ŵanyake ŵakwimba. Ŵabali na ŵadumbu aŵa ŵakugwiliskira ntchito maluso ghawo kwambura kukhumba kuti ŵamanyikwe chifukwa cha ivyo ŵakuchita.

 Kasi chikuchitika ntchivichi pa kupanga sumu izi? Chakwamba, Komiti Yakusambizga yikusankha Lemba ilo pafumenge fundo za mu sumu, kweniso umo ŵanthu ŵangajipulikira para ŵakutegherezga sumu iyo. Kufuma apo ŵabali na ŵadumbu awo ŵakuwona vya sumu ŵakwamba kwata sumu na kulemba mazgu ghake. Ŵakujambura sumu iyo ŵapanga kuti ŵawone umo yipulikikwirenge. Pamanyuma Komiti Yakusambizga yikutegherezga sumu iyo yajambulika na kuyowoyapo munyake umo mukukhumbikwira kusinthamo. Kufuma apo, awo ŵakuwona vya sumu ŵakusinthamo vinthu vinyake na kujambura sumu kaumaliro. Sumu izi zikujambulikira malo ghakupambanapambana, ku ofesi ya munthavi panji ku nyumba za ŵanthu.

 Kuti ŵapange na kujambura sumu izi, ŵabali ŵithu ŵakugwiliskira ntchito mapulogiramu ghakupambanapambana gha pa kompyuta. Pakukhumbikwaso vinthu nga vyakwimbira, vyakuchunira sumu kuti yipulikikwe yakunozga, masipika, na mayikirofoni. Mayikirofoni yimoza yingagulika pa mtengo wakwambira madola 100 m’paka 1,000 gha ku America. Mu chaka cha 2020, ndalama zakukwana madola 116,000 gha ku America tikagulira vyakujambulira sumu.

 Kasi tikuchita wuli kuti tigwiliskire ntchito mwakwenelera vyawanangwa ivyo ŵabali ŵakupeleka? M’malo mwa kuŵa na ŵabali na ŵadumbu ŵanandi pa Beteli ŵakuwona vya sumu, tikugwiliskira ntchito ŵabali awo ŵakujipeleka waka uku ŵali ku nyumba zawo. Kweniso, m’malo mwakuti ŵabali ŵanandi ŵizenge pamoza kuzakajambura sumu, ŵabali ŵithu ŵakugwiliskira ntchito pulogiramu ya pa kompyuta iyo yikuŵa na vyakwimbira vinandi.

 Ŵabali na ŵadumbu ŵakutemwa chomene kutegherezga sumu za mu JW Broadcasting izi. Tara, uyo wakukhala ku Germany, wakati: “Sumu izi zikunovwira kuti mtima uŵe m’malo para namba kwenjerwa. Para nkhutegherezga sumu izi mu chiyowoyero chane cha konkhera, vikuŵa nga kuti Yehova wanihaga waka.” Mubali munyake ku Kazakhstan zina lake Dmitry, wakati: “Nkhukondwa chomene kutegherezga sumu izi chifukwa wamunthu ukufipa mtima yayi nga umo vikuŵira para ukutegherezga sumu za ku charu izo zikususkana na fundo za mu Baibolo. Nakuti sumu izi zikunovwira kuti niŵike mtima pa kukhozga ubwezi wane na Yehova.”

 Delia, wa ku South Africa, wakulongosora umo wakujipulikira chifukwa cha sumu izi, wakuti: “Zikunovwira kuti nikhozge chipulikano chane. Nyengo zose para nili na chitima panji nasangana na suzgo linyake, nkhutegherezganga sumu iyo yikuŵa ya panyengo yake. Nakuti kanandi ving’wenyeng’wenye pera vya sumu vikunovwira kuti nijipulike makora!”

 Ŵanyake ŵakutemwa chomene sumu za mu JW Broadcasting. Lerato, wa ku South Africa, wakati: “Sumu nga yakuti ‘Dziko Latsopano Lili Pafupi’ na ‘Charu Chiphya Icho Chizenge,’ zikunipangiska kuti nijiwonenge nga nili mu nyengo iyo nkhupokelera amama ŵane kufuma ku ŵakufwa. Nyengo zose para nkhutegherezga sumu izi, nkhuŵa nga nkhuwona amama ŵakuchimbilira kwa ine kuti ŵanihage.”

 Sumu yinyake ya mu JW Broadcasting yikamovwira chomene muwukirano munyake ku Sri Lanka. Iyo wakati: “Asambizgi ŵane ŵasayansi ŵakaninena chomene pa maso pa ŵanyane chifukwa chakuti ndine Kaboni wa Yehova. Nkhachita wofi chomene ndipo nkhasoŵa chakuyowoya. Nkhati naŵeruka ku sukulu, amama ŵakanichiska kuti nitegherezge sumu ya mutu wakuti, ‘Muziphunzira Kuti Mukhale Olimba.’ Sumu iyi yikanovwira kumanya uwemi wakuchita kafukufuku na kusanga mazgoro. Zuŵa lakulondezgapo, nkhadumbiskana na asambizgi ŵane. Ŵakanitegherezga na kuyowoya kuti pasono ŵapulikiska makora vigomezgo vya Ŵakaboni ŵa Yehova. Nkhuwonga chomene gulu la Yehova chifukwa cha kutipa sumu zakukhozga izi.”

 Kasi ndalama izo zikugwira ntchito pa kupanga sumu izi zikufuma nkhu? Ni vyawanangwa ivyo ŵabali na ŵadumbu ŵakupeleka kuti viwovwire pa ntchito ya pa lecharu chose, ndipo ŵanandi ŵakupeleka kwizira mu nthowa izo zili pa donate.pr2711.com. Tikumuwongani chomene chifukwa cha mtima winu wakupa.