A te ‵toe auala sili e maua ei a tupe ke ‵lago atu ki te motou galuega i te lalolagi kātoa, ko meaalofa kolā e tuku mai mo te lotomalie ne Molimau a Ieova katoa. a E mafai o maua atu a pokisi o meaalofa i koga e fai ei motou fakatasiga kae maua a nisi auala ke fai a meaalofa i te motou itulau i te neti ko te Donations. E uke a auala kese‵kese e tuku mai i ei ko te mea ke mafai o filifili ne se tino a te auala ke fai tena meaalofa ki te motou galuega i te lalolagi kātoa, ki te fakapotopotoga io me ko te avā mea konā.

 E se fakamoe‵moe a Molimau a Ieova ke tuku atu te tasi-vae-sefulu io me se aofaki io me se pasene mautinoa o olotou mea e maua. (2 Kolinito 9:7) E se ‵tae foki ne matou a tupe io me ‵togi a tino e ‵kau mai ki fakatasiga, io me e ‵togi a omotou taina faifeau kolā e fai ne latou a papatisoga, lotu o tino ‵mate, lotu o fakaipoipoga, io me ko nisi faifaiga fakalotu. E se fai foki ne matou a salasalaga tupe e auala i laulau ‵togi, pasā, tafaoga bingo, tafaoga ko te ‵kati, tiketi manuia, io me ko nisi mea tai ‵pau penā, kae e se akai atu foki matou mō meaalofa. E se fakaasi atu a fakamatalaga e uiga ki te tino fai meaalofa io me e fakaasi atu ki nisi tino a te aofaki o ana mea ne tuku mai. (Mataio 6:2-4) E se maua atu foki i te motou fakatuatusi i te itaneti io me ko tusi a faka‵pulaga mō meaalofa tupe.

 E faka‵pula atu i fakapotopotoga katoa a Molimau a Ieova a olotou tala tupe i te masina i olotou fakatasiga kolā e mafai o ‵kau ki ei so se tino. E otita faeloa a te lipoti o tala tupe a te fakapotopotoga ko te mea ke fakamautinoa aka me e fakaaoga tonu eiloa.—2 Kolinito 8:20, 21.

•   Pokisi o meaalofa: E mafai o tuku atu a meaalofa tupe io me ko tieki ki pokisi meaalofa i Fale Tapuaki, Fale Fono, io me ko nisi koga e fai ei motou fakatasiga.

•   Meaalofa e auala i te neti: I fenua e uke, e mafai o fakaaoga ne koe a te itulau i te neti ko te “Donate to Jehovah’s Witnesses” ke fai sau meaalofa e auala i credit cards, debit cards, te aveavega o tupe e auala i pagike, kae penā foki loa mo nisi auala i te itaneti. b E fakaiku aka ne nisi Molimau ke “tuku fakaa‵tea” i masina takitasi se aofaki mautinoa telā ka fai faeloa penā mai te fakaaogaga o se auala e tasi mai i auala fai meaalofa konei.—1 Kolinito 16:2.

•   Te fakatoka faka‵lei o mea ka tuku atu: A nisi auala ke fai ei a meaalofa e manakogina a te fakatokatoka faka‵lei ki ei, kae penā foki mo fesoasoani i mea tau te tulafono. A vaegā fakatokatokaga penā e mafai ei o maua ne koe a mea aoga i mea tau lafoga i tou fenua. Ko oti ne maua ne tino e tokouke a mea aoga i te taimi ko malamalama ‵lei ei latou i fakatokaga mo fakanofoga o meaalofa e fai mo te lotomalie i te taimi koi ola ei latou io me māfai ko ‵mate atu. Fakamolemole, fesokotaki atu ki te ofisa lagolago i tou fenua mō nisi fakamatalaga māfai e manako koe ke fai se meaalofa telā e aofia i ei a:

  •   akauni i te pagike

  •   tupe fakaleoleo mo tupe litaea

  •   kope totino

  •   fakavae mo tupe ‵teu fakafeagaiga

  •   te faiga o togi mo māvaega

 Ke maua a nisi fakamatalaga ki te auala e mafai ei o fai ne koe tau meaalofa i te fenua e nofo koe i ei, fakamolemole onoono ki te itulau i te neti ko te “Donate to Jehovah’s Witnesses.”