E Mata, e Isi se Fakatokaga ‵Lei mō Tino Katoa i Mea Tau Tupe?
I fenua kese‵kese e uke, ne olo atu a tino ki auala o fakaasi te lotou ‵teke atu, ona ko te mafaufau ki te sē ‵lei o fakatokaga i mea tau tupe mō tino katoa. Ne momea aka te ma‵sei o fakalavelave konā ona ko te COVID-19, telā ne fakamalosi aka ei a te fakatau taua, kae ko te fakatapu te oloolo, ne seki mafai ei o olo atu ki fa‵kaimasaki kae ne lavea faka‵lei atu a te ‵kese o tulaga o tino mau‵mea mo tino ma‵tiva.
E mata, ka mafai o fakagata a fakalavelave i mea tau tupe kolā e fakalogo‵mae atu ki tino katoa? Ao. E fakamatala mai i te Tusi Tapu a mea ka fai ne te Atua ke faka‵lei a fakalavelave kolā e fe‵paki mo tatou.
Fakalavelave i mea tau tupe kolā ka faka‵lei ne te Atua
Fakalavelave: Ne seki mafai ne tino o fakatoka se polokalame i mea tau tupe telā e fia‵fia ki ei a tino katoa.
Faka‵leiga: Ka sui ne te Atua a pulega a tāgata ki tena pulega, ko te Malo o te Atua. Ka pule mai i te lagi ki te lalolagi kātoa.—Tanielu 2:44; Mataio 6:10.
Ikuga: Ona ko te mea ka pule atu ki te lalolagi kātoa, ka tausi atu i se auala ‵lei katoatoa a te Malo o te Atua ki mea katoa i te lalolagi. Ka se toe ma‵tiva eiloa io me manava‵se a tino ki te sē lava o olotou tupe. (Salamo 9:7-9, 18) I lō te fai penā, ka tau eiloa ne latou a ikuga olotou galuega ‵mafa kae maua se olaga gali kae fakafiafia mo olotou kāiga. E folafola mai penei i te Tusi Tapu: “Ka faite ne latou olotou fale kae ‵nofo i ei, kae ka ‵toki ne latou a togavine kae ‵kai ki olotou fuataga. Ka se faite ne latou a fale kae ‵nofo i ei a nisi tino, io me ‵toki ne latou a fuaga kae ‵kai ki ei a nisi tino.”—Isaia 65:21, 22.
Fakalavelave: E se mafai o ‵sao atu a tino mai i mea ‵tupu kolā e fakalogo‵mae atu kae se lava a mea e tausi ei te olaga.
Faka‵leiga: E auala i tena Malo, ka fakaseai atu ne te Atua a mea katoa e māfua mai i ei a te mataku mo te manavase.
Ikuga: Mai lalo i te tausiga a te Atua, ka se toe fe‵paki a tino mo mea ‵tupu kolā e fai ke ‵galo atu a mea e tausi ei latou io me ko olotou kāiga. E pelā mo taua, oge meakai, mo masaki ‵pisi, ka ‵galo atu eiloa. (Salamo 46:9; 72:16; Isaia 33:24) E fai mai te Atua: “Ka ‵nofo eiloa oku tino i se koga filemu, i koga saogalemu mo koga malō‵lo kolā e tokagamalie.”—Isaia 32:18.
Fakalavelave: E fakaloiloi sāle a tino ne latou kolā e uiga kaima‵nako kae matakano‵kano.
Faka‵leiga: Ka fakaasi atu ne tino mai lalo i te Malo o te Atua a te lotou a‵lofa tonu ki nisi tino i lō latou fua.—Mataio 22:37-39.
Ikuga: Mai lalo i te Malo o te Atua, ka fakaasi atu ne tino katoa a te alofa o te Atua, telā “e se salasala ki mea mō tena ‵lei eiloa.” (1 Kolinito 13:4, 5) E fai mai te Tusi Tapu: “Ka seai ne fakamaseiga e fai ne latou io me se mea masei i toku mauga tapu kātoa, me i te lalolagi ka ‵fonu eiloa i te iloaga o Ieova a e pelā mo vai e ‵fonu i ei te tai.”—Isaia 11:9.
E fakaasi mai i te Tusi Tapu me ko ola tatou i aso fakaoti o te olaga masei tenei kae ko pili o fakataunu ne te Atua tena tautoga ke fakaseai atu a fakalavelave katoa i mea tau tupe. b (Salamo 12:5) I te taimi nei, e mafai o fesoasoani atu nei a akoakoga fakavae i te Tusi Tapu ke iloa ne koe a mea e ‵tau o fai māfai ko fepaki mo fakalavelave i mea tau tupe. E pelā mo te mataupu tenei “How to Live on Less” mo te “A Balanced View of Money.”
a A Ieova ko te igoa o te Atua i te Tusi Tapu.—Salamo 83:18.
b Ke iloa te pogai e mafai ei o talitonu koe ki te Tusi Tapu, onoono ki te mataupu “Te Tusi Tapu—Se Tusi Fakatuagagina.”
You May Also Like
TE FALELEOLEO MALUGA
Ne a Mea ka Fai ne te Malo o te Atua?
Ne iloa ne Iesu me i te Malo o te Atua ko te pulega fua e tasi e mafai o faka‵lei ne ia a fakalavelave i te lalolagi. Ne a mea ko oti ne fai ne te Malo ke ati aka i ei te ‵tou loto tali‵tonu?
TE FALELEOLEO MALUGA
E Mata, e Mafai Eiloa o Maua se Lalolagi e Aunoa mo te Mativa?
Ko oi ka fakagata ne ia a te mativa?
