A te Tusi Tapu e sē se tusi fakatokita, kae maua i ei a manatu fakatonutonu aoga. A manatu aoga konei e mafai o fesoasoani atu ki se tino telā e pokotia i se fakalavelave tau te ola ‵lei o te mafaufau. Mafaufau ki nai fakaakoakoga.

“A tino kolā e malosi ‵lei e se ma‵nako ki se tokita, kae ko tino fua kolā e ma‵saki.”—MATAIO 9:12.

E fai ‵tonu mai te Tusi Tapu me e manakogina ke ‵sala tatou ki togafiti fakatokita. Ko oti ne maua ne tino e tokouke se fesoasoani mai mea e uke ne tauloto ne latou e uiga ki olotou masaki tau te mafaufau mai tokita mo nisi tino ‵poto i masaki penā.

“E isi foki se aoga o fakamalosiga faka te foitino.”—1 TIMOTEO 4:8, Tusi Tapu, Tuvalu.

A te faiga o mea kolā e fai ei ke gasolo aka o malosi ‵lei koe i te feitu faka-te-foitino e mafai foki o fesoasoani atu ki te ola ‵lei o tou mafaufau. E aofia i mea konā ko te fakamalosilosi foitino, kai ki mea‵kai paleni, kae ke lava te moe.

“A te loto fiafia se vailakau ‵lei, kae ko te loto telā ne tuki ke palapala e ‵miti kea‵tea ne ia te malosi.”—FAATAOTO 17:22.

A te faitau ki tusi siki fakamalosi loto i te Tusi Tapu mo te kausaki atu ki fakamoemoega kolā e mafai o fakataunu e fesoasoani mai ke fakatumau  te fiafia i a tatou. A te mauaga o se kilokiloga ‵lei mo te talitonu me ka gasolo o ‵lei a mea i aso mai mua, e mafai o fesoasoani atu ki ou lagonaga i te taimi e fakafesagai koe mo se fakalavelave tau te ola ‵lei o te mafaufau.

“Te poto e maua ne tino agamalu.”—FAATAOTO 11:2.

Kāti ka iloa ne koe me ko se mafai ne koe o fai a mea katoa e manako koe o fai i a koe eiloa, tela la, ke talia te fesoasoani mai nisi tino. Kāti ka fia fesoasoani atu ou taugasoa mo kāiga kae e se iloa ne latou a mea e ‵tau o fai. Fai atu ki a latou a mea kolā e manako koe ki ei. Ke mo a ma tō fai ke uke ou manakoga, kae ke loto fakafetai faeloa ki te fesoasoani o latou.

“Ne iloa ne au me isi se mea e tupu ki a au, tenā ne fanatu au ki te tokita. Ne mafai o iloa ne ia toku masaki. Ne fesoasoani mai ke talia ne au te tulaga ko oko au ki ei kae ke iloa ne au a nisi vailakau kolā e mafai o aoga ki toku masaki.”—Nicole, a telā e maua ne te bipolar.

“Ne iloa ne au me i te faitau faeloa ki te Tusi Tapu mo taku avaga e fesoasoani mai ke kamata te aso ki manatu aoga kae fakamalosi. Kae i aso kolā e vāivāi au ona ko toku masaki e masani o isi faeloa se tusi faitau telā e fakamalosi mai ki a au.”—Peter, telā e maua ne te loto mafatia.

“E faigata ke fakamatala toku tulaga ki nisi tino ona ko te mā. Kae isi soku taugasoa telā e loto malamalama kae toka o fakalogologo mai ki a au. Ne fesoasoani malosi mai a ia ke ‵lei oku lagonaga kae ke masaua me e se ko au tokotasi fua e fai penā.”—Ji-yoo, telā e fakafesagai ki se masaki e uiga ki tena kai.

“Ne fesoasoani mai te Tusi Tapu ke maua ne au se kilokiloga paleni ki te galue malosi mo te lava te fakamalōlō. A te poto i ei ne fesoasoani mai ke iloa ne au o fakafesagai atu ki lagonaga kolā ne fakalavelave mai faeloa ki a au.”—Timothy, telā e poko i se vaegā masaki tau te mafaufau ko te obsessive-compulsive disorder.