NE FIA‵FIA malosi a tino Isalaelu mua ki pese. E uke a taimi ne fakasino atu te Tusi Tapu ki tino e fakaaoga a mea fakatagi‵tagi kae usu pese. E tonu, kāti e nofo ki se tasi-vae-sefulu o tusi i te Tusi Tapu e aofia i ei a pese, e pelā mo pese i te tusi ko Salamo, Pese a Solomona, mo Tagiga a Ielemia. E fakamatala mai i te tusi ko te Music in Biblical Life me e fakaasi faka‵lei mai i te Tusi Tapu “se ata manino me ne fakaaoga malosi ne tino a pese i nisi vaega o olotou olaga.”

Pese i aso takitasi o te olaga. Ne fakaaoga ne tino Isalaelu a mea fakatagi‵tagi mo te usuga o pese ke fakaasi atu olotou lagonaga. (Isa. 30:29) Ne faka‵tagi ne fāfine a samupelini, usu mo te fia‵fia a pese kae ‵saka i taimi e faū i ei a tupu, ‵kaiga fia‵fia, mo taimi e manumalo ei i taua. (Fama. 11:34; 1 Samu. 18:​6, 7; 1 Tupu 1:​39, 40) Ne usu foki ne tino Isalaelu a pese ke fakaasi atu olotou lagonaga fanoa‵noa māfai ko mate se tino. (2 Nofo. 35:25) E manino ‵lei me “e fia‵fia malosi a tino Epelu ki pese,” ko pati i te McClintock and Strong’s Cyclopedia.

Pese i loto i te palesi. Ne fia‵fia malosi a tupu o Isalaelu ki pese. Ne ‵kami ne te tupu ko Saulo a Tavita ki te palesi e pelā me se tino tātā pese. (1 Samu. 16:​18, 23) Fakamuli ifo, i te taimi ko fai ei a Tavita mo tupu, ne faite ne ia a nisi mea fakatagi‵tagi, ‵fatu ne ia a pese ‵gali, kae fakatoka se potukau usuusu ke tā‵tā pese i te faletapu o Ieova. (2 Nofo. 7:6; Amo. 6:5) Ne isi foki ne tāgata mo fāfine usuusu a te tupu ko Solomona i tena palesi.—Fai. 2:8.

Pese i tapuakiga. Kae ko te ‵toe mea tāua, ne fakaaoga ne tino Isalaelu a pese i olotou tapuakiga ki a Ieova. E ‵tusa mo te 4,000 tino usuusu i te faletapu i Ielusalema. (1 Nofo. 23:5) Ne fakaaoga ne latou a sumepalo, mea fakatagi‵tagi e isi ne uka i ei, kitala, mo pu. (2 Nofo. 5:12) Kae e se ko tino atamai fua konei e fakaaoga ne latou a pese i olotou tapuakiga ki a Ieova. E manino ‵lei me tokouke a tino Isalaelu ne usu ne latou a Pese o te Oloakaga i olotou malaga ki Ielusalema i aso fakamanatu o te tausaga. (Sala. 120-134) Kae ‵tusa mo tusitusiga a tino Iutaia, ne usu ne tino Isalaelu a Salamo Alelu a i taimi o te ‵kaiga o te Paseka.

Koi tāua eiloa ki tino o te Atua a pese. (Iako. 5:13) E fai a pese e pelā me se vaega o te ‵tou tapuakiga. (Efe. 5:19) E fai ne pese ke ‵kau fakatasi tatou mo ‵tou taina Kelisiano. (Kolose 3:16) Kae e fakamalosi i ei tatou māfai ko logo‵mae i tulaga faiga‵ta. (Galu. 16:25) E fai a pese e pelā me se auala gali ke fakaasi atu te ‵tou fakatuanaki ki a Ieova mo te ‵tou a‵lofa ki a ia.