Ko sefulu fua oku tausaga i te taimi ne o‵mai ei a tamaliki mai Cambodia ki taku akoga i Columbus, Ohio, U.S.A. i te 1985. E tokotasi te tamaliki tagata e iloa ne ia a nāi pati Palagi. Fakatasi mo te fesoasoani o ata, ne kamata tou tagata o fai mai ki a au a tala matagā o fakasauāga, te tamate tino, mo tino e tele ke ‵sao latou. Ne tagi au i te po māfai au e mafaufau ki tamaliki konei. Ne manako au o fai atu ki a latou a te fakamoemoega e uiga ki te Palataiso mo te toe‵tuga, kae ko latou e se malamalama i taku ‵gana. E ui eiloa au koi tamaliki, ne fakaiku aka ne au ke tauloto ki te ‵gana Cambodia ko te mea ke fai atu au ki oku taugasoa i te akoga e uiga ki a Ieova. E se iloa eiloa ne au me ka pokotia toku olaga i te taimi mai mua i te filifiliga tenei.

A te tauloto ki te ‵gana Cambodia e faigata. E lua taimi ne fakaiku aka ne au ke tiakina, kae ne fakamalosi mai a Ieova ki a au e auala i oku mātua. Fakamuli ifo, ne fakamalosi mai oku faiakoga mo taugasoa i te akoga ke kausaki atu au ki se galuega ‵togi ‵lei. A ko au ne manako o paenia, tela la, ne filifili ne au akoakoga i akoga ma‵luga kolā e fesoasoani mai ke maua ne au se galuega ‵togi sē tumau ko te mea ke mafai ne au o fakataunu toku fakamoemoega. Ne masani au o fetaui mo nisi paenia kae ga‵lue fakatasi mo latou i te galuega talai ma oti te akoga. Ne akoako foki ne au a tamaliki kolā e tauloto ki te ‵gana Palagi e pelā me ko te lua o ‵gana​—se filifiliga telā ne aoga malosi ki a au fakamuli ifo.

I te taimi ko 16 ei oku tausaga, ne lagona ne au me e isi se potukau Cambodia i Long Beach, California, U.S.A. Ne āsi atu au ki konā kae tauloto ke iloa ne au o faitau i te ‵gana Cambodia. I te taimi eiloa ne oti ei aku akoga, fai ei au mo fai se paenia kae talai atu faeloa ki tino Cambodia i tafa o toku fale. I te taimi ko 18 ei oku tausaga, ne mafaufau au o fano ki Cambodia. Koi fakamataku eiloa te koga tenā, kae e iloa ne au me ko oti ne lagona ne nāi tino o te sefulu miliona tino kolā e ‵nofo i Cambodia a te tala ‵lei o te Malo. I te taimi tenā, e tasi fua te fakapotopotoga e toko 13 a tino talai i ei i te fenua kātoa. A te taimi muamua ne āsi atu ei au ki Cambodia, kae ko au ko 19 tausaga te matua. E lua tausaga mai tua ifo, ne filifili ei au ke fano o nofo i konā. Ne maua ne au se galuega sē tumau i te ‵fuliga mo te akoakoga o te ‵gana Palagi ke fesoasoani mai ki taku galuega talai. E seki leva, kae maua ne au se avaga telā e ‵pau a mā fakamoemoega. Mai te ga‵lue fakatasi, ne fia‵fia eiloa māua me ne fesoasoani atu māua ki tino Cambodia e tokouke ke tuku atu olotou ola ki te Atua.

Ne tuku mai eiloa ne Ieova ki a au a ‘te manakoga o toku loto.’ (Sala. 37:4) A te faiga o soko ko te ‵toe galuega fakamalie loto i galuega katoa. I te 16 tausaga ne nofo ei au i Cambodia, ne gasolo aka eiloa ki luga a te fakapotopotoga foliki tenā e toko 13 a tino talai i ei ki te 12 fakapotopotoga kae 4 potukau!​—Ne fakamatala ne Jason Blackwell.