KE OKO ki se lima tausaga ko ‵teka, ne ga‵lue a Choong Keon mo Julie, kolā ko avaga nei kae ko taki 30 tupu lā tausaga, e pelā me ne paenia tumau i Sydney, Ausetalia. “Ne isi ne mā galuega ‵togi sē tumau kae ne ola māua i se olaga fakamalie loto,” ko pati a Choong Keon. “E gali ‵ki te ‵tau o te aso kae faigofie te olaga i te koga telā ne ‵nofo māua i ei. Ne fia‵fia māua me e ‵nofo pili māua ki mā kāiga mo taugasoa.” Kae koi fakalavelave atu eiloa a loto lagona o Choong Keon mo Julie ki a lāua. Kaia? Me ne iloa ne lāua me e uke atu a mea e ‵tau o fai ne lāua i te taviniga ki a Ieova e ‵tusa mo lā fakanofonofoga, kae ne fakatalave lāua o fai a ‵fuliga kolā e manakogina.

Tela la, i te fono o te atufenua i te 2009, ne lagona ne lāua se lāuga telā ne fakamalosi ‵ki ki a lāua. Ne fakasino atu a pati a te failauga ki a latou kolā e mafai o fakalauefa atu te lotou galuega talai. Ana muna: “Ke mafau‵fau ki te mea tenei: A te tino fakatele motoka e mafai o ‵pale ne ia tena motoka ki te fakamaui io me ko te fakaatamai māfai fua te motoka e tele. I se auala tai ‵pau, e mafai ne Iesu o fakatonutonu tatou i te fakalauefāga o ‵tou galuega talai māfai fua e gasue‵sue malosi tatou o fakataunu ‵tou fakamoemoega.” * Ne ma‵natu aka te tauavaga tenei i te failauga e pelā eiloa me ko faipati tonu atu ki a lāua. I te fono foki eiloa tenā, ne fakasau‵tala aka i ei se tauavaga misionale e ga‵lue i Taiwan. Ne fai‵pati lāua e uiga ki te lā fia‵fia i te taviniga kae faka‵mafa mai i ei a te lasi o te fesoasoani koi manakogina. Ne toe ma‵natu aka a Choong Keon mo Julie me i pati konei ne fakasino atu fua ki a lāua.

“Mai tua o te fono tenā,” ko pati a Julie, “ne ‵talo atu māua ki a Ieova ke tuku mai te malosi ke ga‵sue māua o olo ki Taiwan.” E toe fai mai tou fafine: “Kae ko māua ne ma‵taku. Ne fakatalave māua o ga‵sue ki nisi fenua.” A te tusi siki telā ne fesoasoani atu ke “ga‵sue” lāua ko te Failauga 11:4, telā e fai mai penei: “Kafai koe e fakatali ke ‵lei te matagi mo te ‵tau o te aso, ko tena uiga ka seai eiloa sau mea e mafai o ‵toki, seai foki ne fuataga o lakau e maua ne koe.” Muna a Choong Keon: “Ne fakaiku aka ne māua ke sē ‘faka‵tali ke ‵lei te ‵tau o te aso’ kae ke na kamata o ‘‵toki a fuaga.’” Ne ‵talo malosi lāua, fai‵tau ki tala e uiga ki olaga o misionale, aveave a meli kae toe faitau a tali mai i a latou kolā ko oti ne ga‵sue ki Taiwan, fakatau ki tua a lā motoka mo  meafale, kae ne taunu atu ki Taiwan i te tolu masina mai tua ifo.

E silia atu i te toko 100 taina mo tuagane mai nisi fenua e ga‵lue i Taiwan i koga kolā e lasi te manakogina o tino talai i ei. Ne o‵mai latou mai i Ausetalia, Peletania, Canada, Falani, Tiapani, Korea, Spain, mo Amelika, kae kese‵kese te ma‵tua o latou, kamata mai i te 21 ki te 73 tausaga. E aofia i a latou a tuagane seki a‵vaga e silia atu i te toko 50. Se a te mea ne fesoasoani atu ki taina mo tuagane loto finafinau konei ke fakataunu te lotou galuega talai i se fenua fakaa‵tea? Ke ‵sala aka ne tatou.

E tavini atu a Laura, se tuagane seki avaga mai Canada, e pelā me se paenia i te feitu ki togālā o Taiwan. I se sefulu tausaga ko ‵teka, ne fatoa fiafia tou fafine ki te galuega talai. E fakamatala mai a Laura, “ne seki fiafia au ki te galuega talai me e se lasi toku taimi e fakamāumāu ki ei ko te mea ke apo au i ei.” I konā, ne fakamolemole atu a taugasoa i Canada ke olo latou mo tou fafine ki Mexico o talai i ei mō se masina e tasi. “Tenā eiloa te taimi muamua ne fakamāumāu ei ne au a taimi e uke i te galuega talai, kae poi au i te gali!”

Ne fakamalosi atu te taimi gali tenā ke mafaufau a Laura o fano ki se fakapotopotoga e fai‵pati ki se ‵gana fakaa‵tea i Canada. Ne tauloto tou fafine ki te ‵gana Saina, ga‵lue fakatasi mo te potukau i te ‵gana Saina, fai se fakamoemoega ke fano ki Taiwan, kae ne fakataunu ne tou fafine te fakamoemoega tenā i a Setema 2008. “E nofo ki se tausaga kae fatoa fiafia tonu au ki toku koga fou,” ko pati a Laura, “kae nei, e se fakaataata i toku mafaufau ke toe foki au ki Canada.” E pefea ana lagonaga e uiga ki te galuega talai? “Ko oko eiloa i toku fiafia ki ei i te taimi nei,” ko pati a tou fafine. “E seai se mea e gali atu i lō te kilo atu ki te auala e ‵fuli ei ne tino a‵koga ki te Tusi Tapu olotou olaga i te taimi e tauloto ei latou e uiga ki a Ieova. E uke avanoaga ne maua ne au ke fiafia malosi i te taviniga tenā i Taiwan.”

Ne olo a Brian mo Michelle, se tauavaga ko taki 30 tupu lā tausaga mai i Amelika, ki Taiwan i se valu tausaga ko ‵teka. I te taimi muamua, ne ma‵natu aka lāua me e se aoga te lā galuega talai. Kae ne fai atu ki a lāua se misionale atamai: “Kafai foki e tuku atu fua ne koe se tamā pepa ki se tino, e ‵tau o masaua ne koe me kāti tenā eiloa te taimi muamua ne maua ei ne te tino tenā se fekau e uiga ki a Ieova. Tela la, ko oti ne fai ne koe se tusaga tāua i te galuega talai!” Ne fesoasoani malosi atu a pati fakamalosi loto konā ki a Brian mo Michelle ke sē ‵fiu vave lāua. Ne fai atu te suā taina ki a lāua: “Ke ‵teke atu ki te loto vāivāi, fuafua aka ne koulua a lua taumafaiga o tauloto te ‵gana Saina mai te fono e tasi ki te suā fono, kae e se ko te aso e tasi ki te suā aso.” E tonu, ne ga‵solo eiloa lāua ki mua kae ko fai pelā me ne paenia apo i aso nei.

Se a te mea e mafai o fakamalosi atu ke taumafai koe o tauloto ki se ‵gana fakaa‵tea? Taumafai o āsi ki fenua kolā e manako koe o tavini i ei. Fano ki fakatasiga, ‵kau fakatasi mo taina mo tuagane i konā, kae olo fakatasi mo latou i te galuega talai. Muna a Brian: “Kafai ko matea ne koe a te tokouke o tino e tali fia‵fia ki te fekau o te Malo mo te a‵lofa atu o taina mo tuagane ki a koe, ka fakamalosi atu eiloa te mea tenā ke fakafesagai atu koe ki tulaga faiga‵ta o te taviniga i se fenua fakaa‵tea.”

Ne mafai ne nisi tino kolā ne olo ki Taiwan o ga‵lue i koga kolā e “lasi te manakoga i ei” o tausi a latou eiloa e pelā me ne paenia mai te akoako atu o te ‵gana Palagi. E fakatau ne Kristin mo Michelle a meakai e faite mai mea o te tai. E fakamatala mai a Kristin, “ne seki fai aka eiloa ne au te mea tenā, kae e fesoasoani mai te vaegā galuega tenei ke mafai au o nofo i luga i te fenua.” E seki leva, kae maua ne Kristin ne tino ke ‵togi sāle i a ia. Ne fesoasoani atu te galuega sē tumau tenei ke mafai ne tou tagata o tausi atu ki a ia eiloa mo tena avaga i mea tau tupe, kae ne maua i ei ne lāua a taimi e lava ke fakamāumāu i te lā galuega tonu—te galuega fakapaenia, ko te faiika ki tino.

E nofo ki te fitu tausaga ko ‵teka, ne taunu atu ei a te tauavaga mai i Amelika, ko William mo Jennifer, ki Taiwan. Muna a William: “A te tauloto ki te ‵gana, ga‵lue pelā me ne paenia, tausi te fakapotopotoga, mo te ‵salaga o tupe ke lava mō te kāiga, ne fakafi‵ta mai ki a au i nisi taimi.” Se a te mea ne fesoasoani atu ke iku manuia kae tumau lāua i te fia‵fia? Ne taumafai lāua o fai ne fakamoemoega aoga. Pelā mo te mea tenei, i te taimi koi tauloto ei lāua ki te ‵gana Saina, ne seki tō fakamoe‵moe lāua ki ei, tela la, i te taimi ne gasolosolo malie ei ki mua a lā taumafaiga, ne seki loto vāi‵vai malosi lāua.

E masaua ne William a pati a se ovasia faimalaga ne fai atu ki a ia, “Ke fia‵fia ki te taviniga, kae sē ko te koga e fano koe ki ei.” I nisi fakamunaga, kafai ko oti ne fai se fakamoemoega faka-te-agaga, e ‵tau mo tatou o fia‵fia ki auala ne fakaaoga ne tatou ke fakataunu te fakamoemoega. Mai te fakagaluegaga o te manatu fesoasoani tenā, ko pati a William, ne fesoasoani atu ei ki tou tagata mo tena avaga ke uiga faigofie, ke faka‵logo ki pati fakatonutonu a taina fakatuagagina i konā, kae ke ‵fuli te auala e fai ei ne lāua a mea ko te mea ke iku manuia te lā galuega talai i se fenua fou. E toe fai mai tou tagata, “ne fesoasoani mai foki ke masaua ne māua o fakaavanoa se taimi ke fia‵fia ki te gali o te fenua e ga‵lue māua i ei.”

E pelā mo William mo Jennifer, ne fiafia foki a Megan, se tuagane paenia seki avaga mai i Amelika, ki ‘tena taviniga’ i te taimi koi taumafai ei tou fafine ke taunu tena fakamoemoega ke ‵lei tena faipati faka-Saina. E kau sāle tou fafine i fakaotiga o vaiaso katoa ki se potukau o tino talai kolā e talai i se kogā koga gali—te taulaga o Kaohsiung, te ‵toe taulaga lasi eiloa o Taiwan. Ne mafai ne Megan o talai atu te tala ‵lei mai te vakamutu ki te suā vakamutu mo tāgata faiika mai Bangladesh, Initia, Indonesia, te Atu Filipaina, Thailand, mo Vanuatu. “Ona ko tāgata faiika e se leva i uta i te taulaga vaka, e kamata eiloa ne matou akoga faka-te-Tusi Tapu a latou i te taimi eiloa tenā. Ko te mea ke oko atu ki tino katoa, e masani o fai ne au akoga a tino e tokofa io me tokolima i te taimi e tasi.” Kae pefea a tena taulotoga ki te ‵gana Saina? E fai mai tou fafine, “Aku muna loa ke mafai o  vave taku tauloto, kae masaua ne au a pati a se taina ne fai mai ki a au: ‘Fai a te ‵toe mea e mafai ne koe, kae ka fesoasoani atu a Ieova o fai a te ‵toega o mea.’”

Koi tuai o gasue a Cathy, se tuagane seki avaga mai Peletania ki te suā fenua, ne salasala muamua ne ia se koga telā e se fakamataku ke fai ei tena taviniga. Ne fakaasi atu ne tou fafine ki a Ieova e auala i te ‵talo a mea kolā e manavase a ia ki ei kae tusi ana tusi ki nisi ofisa lagolago, ke iloa ne ia me ne a tulaga fakama‵taku e mafai o fe‵paki mo tuagane seki a‵vaga. Mai tua i konā, ne mafaufau faka‵lei tou fafine ki tali o ana tusi kae fakaiku aka me e ‵lei ke fano a ia ki Taiwan.

I te 2004, ne fano a Cathy telā ko 31 ana tausaga, ki Taiwan, te koga telā ne fakafaigofie ei ne tou fafine a tena olaga ki te mea e mafai ne ia. E fai mai a ia: “Ne ‵sili atu au ki taina mo tuagane me tefea te ‵toe koga ‵lei ke ‵togi i ei a fuagālakau mo vesiapolo ‵togi māmā. Ne fesoasoani mai ki a au olotou manatu ko te mea ke tai leva atu te ‵toega o aku tupe.” Se a te mea ne fesoasoani atu ki tou fafine ke fakatumau se olaga faigofie? Muna a Cathy: “E ‵talo sāle au ki a Ieova ke fesoasoani mai ke lotomalie au ki aku mea‵kai ‵togi māmā mo gatu e pei au ki ei. E mafaufau au i a Ieova e tali mai ki aku ‵talo mai te akoako mai ke lotomalie au faitalia me e se maua ne au a mea katoa e manako au ki ei.” E toe fai mai tou fafine: “E fiafia eiloa au ki toku olaga faigofie me e fesoasoani mai ke saga tonu au ki mea faka-te-agaga.”

E se faigofie fua te olaga o Cathy, kae e fakafiafia foki. E fakamatala mai ne tou fafine te pogai: “Me ne mafai ne au o talai i se koga telā e tokouke a tino e ‵saga mai ki te tala ‵lei. A te mea tenā se mea fakafiafia ‵ki!” I te taimi ne oko ei tou fafine ki Taiwan, e lua a fakapotopotoga Saina i te fa‵kai telā ne kamata ei a ia o galue pelā me se paenia, kae i aso nei, ko fitu a fakapotopotoga i ei. Muna a Cathy: “A te kilo tonu atu ki te fanakaga fakaofoofogia tenā mo te aofia i te ‵takimaiga o tino fia‵fia e fai ei ke ‵fonu toku olaga i te fiafia i aso takitasi!”

E a nei te galuega a Choong Keon mo Julie, kolā ne taku mai i te kamataga? Ne manatu aka a Choong Keon i te taimi muamua me e se lasi tena aoga i loto i te fakapotopotoga ona ko tena ‵gana Saina e se ‵lei. Kae e ‵kese loa te mea e mafau‵fau ki ei a taina i konā. “I te taimi ne ‵vae ei ke lua a fakapotopotoga, e uke a tiute faopoopo ne tuku mai ki a au e pelā me se tavini fesoasoani,” ko pati a Choong Keon. “I te taimi tenā, ne oko mai a te lagonaga me ko tavini atu au i te koga telā e lasi te manakoga i ei. Ko oko eiloa i te gali,” e fai mai tou tagata mo te fakamisikata, “ me ne manakogina foki ne latou au!” Ko tavini atu nei a ia pelā me se toeaina i aso nei. E fai mai a Julie: “Ne oko mai ki a māua se lagonaga fiafia kae fakamalie loto telā ne seki maua aka eiloa ne māua i te taimi muamua. Ne ‵mai māua ki konei o fesoasoani, kae ma‵natu aka māua me ne maua foki ne māua te fesoasoani mai te galuega gali tenei. E fakafetai māua ki a Ieova mō te talia mai ke ga‵lue māua i konei!”

Koi manakogina eiloa a tino ga‵lue e tokouke i te ‵katigā saito faka-te-agaga i fenua e uke. E a, ko oti au akoga kae ko mafaufau koe me se a tau mea ka fai ki tou olaga? E mata, a koe seki avaga kae manako ke fakaaoga malosi koe i loto i te fakapotopotoga saukātoa a Ieova? E mata, e fiafia koe ke masaua ne tou kāiga a mea ‵gali e uke i te lotou taviniga ki a Ieova? E a, ko li‵taea koe, kae uke a mea tāua o te olaga ne fepaki mo koe e fia fakaasi atu ki nisi tino? Ke talitonu koe me e uke a fakamanuiaga e faka‵tali mai ki a koe māfai e fakaiku aka ne koe ke fakalauefa atu tau galuega mai te tavini atu i se koga telā e manakogina malosi i ei a tino talai o te Malo.