I te taimi ne fanau mai ei au, e isi se tamā fatoaga a oku mātua i se tamā fa‵kai i Galicia, i te feitu mātū-togalā o Sepania. Au ko te tokofa i te tokovalu o tama‵liki. Ne gali ‵ki te olaga o matou i te fale. I te taimi tenā i Sepania, se mea masani ke fanatu se tamaliki tokotasi i te kāiga ki se fa‵kai o te Lotu Katolika. I te motou kāiga, e tokotolu i a matou ne oko atu ki ei.

I te taimi ko 13 ei oku tausaga, ne kau atu au ki toku taina i se fale mō sina i Madrid. E seai se olaga fealofani i te fale tenā mō sina. E seai ne va fakataugasoa i ei—ko tulafono, ‵talo, mo te olaga fakataputapu kae faigata. I tafataeao ‵malu, ne maopoopo matou ki te falesa ke mafaufau ‵loto, faitalia me e seai ne mea i toku mafaufau. Fakamuli ifo, ne usuusu pese ‵lotu matou kae fakamanatu foki te ‵Kaiga a te Aliki, i te ‵gana Latina. Ne seai lele eiloa se mea e malamalama au i ei kae ne maua ne au se lagonaga me ne ‵mao ‵ki eiloa te Atua mai i a au. Ne ‵galo lēmū atu a aso ma‵sei konā. I te taimi foki loa e fetaui ei au mo toku taina, ne mafai o fai atu sāle māua penei, “Hail purest Mary,” se tugapati fakaaloalo ki a Malia. Ne talia mai fua ne te kau sina ke sautala māua mō se āfa itula mai tua o te ‵kaiga i te tutonu. Ko oko eiloa i te ‵kese mai i toku olaga fiafia i te motou kāiga! Ne maua ne au se lagonaga sē sologa kae ne masani au o tagi.

E tiga eiloa ne seki maua ne au se lagonaga pili ki te Atua, ne talia ne au aku tautoga ne fai kae ne fai au mo fai se sina i te taimi ko 17 ei oku tausaga. A te ‵tonuga loa, ne fai fua ne au a mea kolā ne ‵tau o fai ne au, e se leva kae kamata o fakafesili ne au me e mata, e manako te Atua ke fai ne au te mea tenei. Ne masani o fai mai a sina me i tino kolā e maua ne latou manatu fakalotolotolua penā ka iku atu ki te afi i seoli! Kae koi tumau eiloa oku manatu fakalotolotolua. Ne iloa ne au me ne seki ‵vae keatea ne Iesu a ia eiloa mai i tino; i lō te fai penā, ne fakalavelave faeloa a ia i te akoakoga mo te fesoasoani atu ki nisi tino. (Mataio 4:23-25) I te taimi ko 20 ei oku tausaga, e seai eiloa se pogai ‵lei ne ‵tau ei o tumau au e pelā me se sina. Se mea fakaofoofogia me ne fai mai a te mātua pule me kafai koi fakalotolotolua au ki toku fai mo fai se sina, se mea ‵lei ke na tiakina ne au te koga tenā. Ne mafaufau au me ne mataku tou fafine i te mea ma fakamalosi atu foki ne au a nisi tamaliki. Tela la, ne tiakina ei ne au te fa‵kai o te lotu.

I te taimi ne toe foki atu ei au ki te motou kāiga, ne malamalama  ‵lei eiloa oku mātua. Kae ona ko te mea e seai ne galuega i te motou fa‵kai, ne fanatu ei au ki Siamani, ki te koga ne nofo ei toku tuagane e tokotasi. Ne kau atu a ia ki se potukau Kominisi ma‵losi o tino Sepania i konā. Ne tai ‵lei oku lagonaga i te ‵kau fakatasi mo tino kolā ne taua atu mō te saolotoga o tino ga‵lue e penā foki te amanaia ki tulaga o fāfine. Ne fai au pelā me se Kominisi kae fakamuli ifo ne avaga au ki se tino o te potukau tenā. Ne mafaufau au me ne fai ne au se mea aoga, mai te tufa atu o tusi a te Kominisi kae aofia foki i māti a potukau ‵teke.

E seki leva, kae ne kamata foki au o loto vāivāi. Ne mafaufau au me ne fakata‵mala faeloa a te kau Kominisi o fai a mea kolā e talai atu ne latou. Ne gasolo aka eiloa o malosi toku fakalotolotolua i te taimi ne ‵sunu ei ne nisi talavou i te motou potukau a te Ofisa o te Kau Sepania i te 1971 i Frankfurt. Ne fai ne latou te mea tenā ke ‵teke atu ki faifaiga sē fakamaoni i Sepania, te fenua pule fakasaua. Kae ne talitonu au me ne ‵se eiloa te auala ne fakaasi atu ei te lotou sē fia‵fia.

I te taimi ne fanau ei taku tama muamua, ne fai atu au ki taku avaga me ka se toe kau atu au ki fakatasiga a te kau Kominisi. Ne sē sologa malosi au ona ko te mea e seai eiloa se tino i oku taugasoa mua ne āsi mai ki a māua mo taku pepe. Ne mafaufau au me se a te aoga o te olaga. E mata, e aoga eiloa ke fai se taumafaiga ke faka‵lei aka te olaga?

I te 1976, ne tukituki mai se avā Molimau Sepania i te mataloa o te motou fale kae ofo mai a nisi tusi faka-te-Tusi Tapu, kolā ne talia ne au. I te lua o lā āsiga, ne kamata o fai atu aku fesili ki a lāua e uiga ki logo‵maega, te fakakese‵kese o tino, mo faifaiga sē fakamaoni. Ne ofo masei au me ne fakaaoga ne lāua te Tusi Tapu ke tali aka ei a fesili katoa! Ne talia eiloa ne au mo te fiafia se akoga faka-te-Tusi Tapu.

Muamua la, ne fiafia fua au o tauloto ki manatu ‵tonu. Kae ne kamata o ma‵fuli a mea katoa i te taimi ne ‵kau atu ei māua mo taku avaga ki fakatasiga i te Kingdom Hall o Molimau a Ieova. I te taimi tenā, kae ko tokolua ma tama‵liki. Ne ave sāle matou mo te atafai ne Molimau ki fakatasiga kae ne fesoasoani foki ki te tausiga o ma tama‵liki. Ne kamata o ati aka ne au se lagonaga alofa ki Molimau.

Kae koi fakalotolotolua eiloa au ki oku nisi manatu fakalotu. Ne fakaiku aka ne au ke āsi atu ki oku kāiga i Sepania. A toku fakatamana, telā se faifeau, ne taumafai o faka‵tuka ne ia au mai te sukesuke ki te Tusi Tapu. Kae ne fesoasoani malosi mai a Molimau i konā ki a au. Ne tali ne latou aku fesili katoa mai te Tusi Tapu, e pelā eiloa mo Molimau i Siamani. Ne fakaiku aka ne au ke toe faka‵soko taku akoga faka-te-Tusi Tapu māfai e toe foki atu au ki Siamani. E tiga eiloa ne fakaiku aka ne taku avaga ke taofi tena sukesukega ki te Tusi Tapu, ne tumau eiloa au i taku fakaikuga. I te 1978, ne papatiso ei au e pelā me se tokotasi o Molimau a Ieova.

Ne fatoa maua ne au se ata manino ki te aoga mo te takitakiga i toku olaga i te taimi ne malamalama ‵lei au i muna‵tonu mai i te Tusi Tapu. E pelā mo te 1 Petelu 3:1-4, e fakamalosi atu ki fāfine ke “faka‵logo” ki olotou avaga mo te “lasi o te otou āva” kae ke ati aka a te “agaga filemu, me e tāua malosi te mea tenā i mua o te Atua.” Ne fesoasoani mai a vaegā akoakoga fakavae penā ke fai faka‵lei toku tulaga e pelā me se avaga fafine mo se mātua ‵lei.

Kāti ne ‵teka atu se 35 tausaga talu mai te taimi ne fai ei au mo fai se Molimau. Ne lagona ne au te fiafia ke tavini atu ki te Atua e pelā me se vaega o se kāiga tonu faka-te-agaga, kae ne fiafia malosi au me ne fai foki penā aku tama‵liki e tokofa mai i te tokolima o latou.