“E MAFAI ne au o ‵teke atu so se mea kae na ko fakaosoosoga.” A te fakamatalaga lauiloa tenei e fakamatala faka‵lei mai i ei a te kilokiloga a tino ki fakaosoosoga—kae e fia‵fia eiloa latou ki ei. Kae e ‵kilo atu a nisi tino ki fakaosoosoga e pelā me se fakalavelave tumau telā e fia fakatakavale malosi ne latou. Se a tau faka‵tau? Kafai e fepaki koe mo fakaosoosoga, e mata, e ‵tau o tosina io me e ‵teke atu ki ei?

E tonu, e se ko fakaosoosoga katoa e iku atu ki fakalavelave ‵lasi. E pelā mo te kaisoa o se masikeke, ka se mafai eiloa o fakamasei ei tou olaga. Kae ko te tosina atu ki nisi fakaosoosoga—maise eiloa ki mea kolā e iku atu ki faifaiga fakatauavaga sē ‵tau—e mafai o maua mai i ei a ikuga fakama‵taku. E fakailoa mai te Tusi Tapu ke fakaeteete, penei: “Ka ko te tagata mulilua, e seai sena mafaufau. E fakamaseigina fua ne ia a ia eiloa.”—Faataoto 6:32, 33.

Kafai ko fepaki fakavave koe mo se fakaosoosoga, e ‵tau o saga atu pefea koe ki ei? E tali mai te Tusi Tapu: “Tenei eiloa te loto o te Atua, ko koutou ke tapu kae ke ‵kalo keatea mai i amioga fakatauavaga sē ‵tau. E ‵tau o iloa ne tino taki tokotasi i a koutou o pule atu ki tena foitino ko te mea ke tapu kae fakaaloalogina.” (1 Tesalonia 4:3, 4) E mafai pefea o ati aka ne koe a te malosi tenā ke ‵teke atu? Mafaufau ki auala e tolu kolā e mafai o fesoasoani mai.

A te onoono atu ki ata o tōtōga o te foitino e fakamalosi aka fua i ei a manakoga sē ‵lei. Ne fakamaoni mai ne Iesu me e isi se sokoga i te laveaga mo te manakoga, i ana muna: “So se tino e onoono ki se fafine kae e fiafai ki ei ko mulilua a ia i tena loto.” Mai te fakaaogaga o se ata  fakatusa kae fakalasilasi ne ia, ne fakamalosi atu a ia: “Tela la, kafai ko tou mata fakaatamai e fai ne ia koe ke agasala, ‵kape kae ‵pei kea‵tea.” (Mataio 5:28, 29) Se a te manatu tāua? Ke ‵teke atu ki fakaosoosoga, e ‵tau o gasue‵sue tatou mo te poto kae ke se fakafia‵fia ‵tou mata ki ata sē ‵lei.

Ke fai se fakatusaga: Mafaufau me e onoono fakavave atu koe ki te malapu mai o te moli a se tino soko fiti. E mata, ka kilo atu faeloa koe ki ei? Ikai, ka se penā loa! Ka ‵fuli keatea io me e ‵pono ou mata ke mo a ma kilo atu koe ki ei. E penā foki loa, kafai e kilo fakavave atu koe ki se ata fakafamau—i tusi, i te tv, io me e lavea tonu atu ne koe—ke na kilo fakavave atu keatea. Ke puipui tou mafaufau mai i te fakamaseigina. E fai mai a Juan, se tino telā ne fakavalevale muamua ki ata ma‵sei: “Kafai e lavea ne au se fafine taulekaleka, e masani o maua ne au te manakoga ke toe kilo fakalua io me fakatolu atu ki ei. Tela la, e faimālō ne au oku mata ke kilo atu keatea, kae fai ifo au: ‘‵Talo ki a Ieova! E ‵tau eiloa o ‵talo atu nei koe!’ Mai tua o taku ‵talo, e se leva kae ‵galo atu a manakoga konā.”—Mataio 6:9, 13; 1 Kolinito 10:13.

Mafaufau la ki te tagata fakamaoni ko Iopu, telā ne fai mai: “Ko oti ne fai ne au se tautoga ‵malu, ke mo a e kilo atu oku mata ki se fafine mo toku loto lailai.” (Iopu 31:1) Kaia e se fai foki ei ne koe se vaegā fakaikuga penā?

Tofotofo aka ki te mea tenei: Kafai e onoono fakavave atu koe ki se ata fakafamau, ke ‵fuli fakavave ou mata keatea. Ke fakaakoako atu ki te tino telā ne tusi ne ia te Tusi Tapu: “Tausi mai au keatea mai te saga tonu atu ki mea kolā e se aoga.”—Salamo 119:37.

Ona ko tatou ne tino sē ‵lei katoatoa, e mafai o faigata i nisi taimi ke ‵teke atu ki manakoga ma‵sei. E fai mai te Tusi Tapu: “Kae e tofotofogina a tino taki tokotasi mai te saga atu ki takolekolega o ana manakoga totino. Tela la, kafai ko faitama te manakoga, ko fanau mai i ei te agasala.” (Iakopo 1:14, 15) E mafai pefea o ‵kalo keatea tatou mai i te iku atu ki konā?

Kafai e maua ne koe a manakoga ma‵sei, masaua me e mafai o filifili aka ne koe te auala ke saga atu ki ei. Ke ‵teke atu ki manakoga konā. Ke tapale keatea mai i tou mafaufau. Ke ita fitifiti koe ma mafaufau faeloa ki amioga ma‵sei. E isi se tagata e igoa ki a Troy, telā ne valea loa ki ata ma‵sei i te Itaneti, ne fai mai: “Ne ‵teke malosi atu au ki mafaufauga ‵se mai i toku mafaufau e auala i te mafaufau ki manatu aoga. E se faigofie. Ne takavale au i taimi e uke. Kae fakamuli ifo ne fakamasani au ke pule faka‵lei  atu ki oku mafaufauga.” E isi se fafine e igoa ki a Elsa, telā ne faigata ke ‵teke atu ki fakaosoosoga ma‵sei e pelā me se talavou, ana muna, “Mai te fakalavelave faeloa mo te ‵talo atu ki a Ieova, ne mafai ei o pule faka‵lei atu ki mafaufauga ma‵sei.”

Tofotofo aka ki te mea tenei: Kafai ko tigaina koe ona ko mafaufauga ma‵sei, ke fakagata fakavave kae ‵talo atu. ‵Teke atu ki mafaufauga ‵se mai te faka‵fonuga o tou mafaufau ki “so se mea telā e tonu, so se mea telā e manavase malosi ki ei, so se mea telā e amiotonu, so se mea telā e ‵ma, so se mea telā e alofagina, so se mea telā e uke ana tavaega, so se mea telā e ‵lei mo so se mea telā e ‵tau o tavaegina.”—Filipi 4:8.

Kafai ko fetaui ‵lei a te manakoga, fakaosoosoga, mo te avanoaga, e mafai o faigofie ke iku atu ki se fakalavelave. (Faataoto 7:6-23) E mafai pefea o puipui ne koe a koe eiloa mai te oko atu ki konā?

E polopoloki mai mo te poto a te Tusi Tapu: “A tino ‵poto e lavea ‵mao ne latou a fakalavelave, tela la, e faka‵mao keatea mai i ei, kae ko te tino sē mafaufau e fano tonu eiloa ki te koga e ‵tupu ei fakalavelave, kae fakamuli ko salamo ei a ia.” (Faataoto 22:3) Tela la, ke puipui ou auala. Ke onoono ki tulaga kolā e mafai o fakamalosi aka ei te fakalavelave, kae ‵kalo keatea mai i ei. (Faataoto 7:25) E isi se tagata e igoa ki a Filipe, telā ne manumalo i tena umiti ki ata ma‵sei, ana muna: “Ne tuku ne au te komupiuta a te kāiga i se koga telā e mafai o lavea ne tino katoa kae fakaaoga foki a polokalame kolā e mafai o puipui mai polokalame ma‵sei. Kae e fanatu fua au ki te itaneti māfai e isi ne tino e ‵nofo mai.” E penā foki a Troy, telā ne taku atu muamua, e fai mai: “E ‵kalo keatea au mai i te onoono atu ki ata ma‵sei kae fakagata foki toku kau atu ki tino kolā e fai‵pati faeloa ki amioga fakatauavaga. E se manako au ke fanatu i se auala telā ka logo‵mae ei au.”

Tofotofo aka ki te mea tenei: Ke iloilo aka mo te fakamaoni ou vāivāiga, kae ke fakatoka faka‵lei ke ‵kalo keatea mai i tulaga kolā e mafai o tuku faka‵sau atu ei koe ki tofotofoga.—Mataio 6:13.

Kae e a māfai ko fakavāivāi koe kae tosina atu ki fakaosoosoga, faitalia au toe taumafaiga ‵lei ne fai? Ke mo a ma loto vāivāi kae fakagata tou taumafai. E fai mai te Tusi Tapu: “Faitalia me e pefea te uke o taimi e puapuaga ei te tagata amiotonu, kae e toe fakaolagina eiloa a ia.” (Faataoto 24:16) Ao, e fakamalosi aka tatou ne te ‵tou Tamana faka-te-lagi ke ‘toe ‵tu aka ki luga.’ E mata, ka talia ne koe tena fesoasoani mo te alofa? Tela la, ke mo a ma fi‵ta koe i te ‵fuli atu ki a ia i te ‵talo. Ke ati aka tou fakatuanaki mai te sukesuke ki tena Muna. Fakamalosi aka tau fakaikuga ke kau atu ki fakatasiga a Kelisiano. Ke masaua a te folafolaga a te Atua: “Kae fai koe ke malosi, ka puipui kae fakasao ne au a koe.”—Isaia 41:10.

A Cody, telā ne taku atu muamua, e fai mai: “E manakogina a taumafaiga ‵lasi ke fakagata taku amioga ki te onoono ki ata ma‵sei. Ne uke ‵ki a taimi ne takavale ei au, kae mai te fesoasoani o te Atua, ne manumalo fakamuli eiloa a au.” A Dylan, telā ne taku atu foki muamua, e fai mai: “Ne faigofie faeloa ke ‵moe au mo se tino telā e ga‵lue tasi mo au. Kae ne ‵mautakitaki eiloa au kae fai atu ki tou fafine ‘Ikai!’ Se lagonaga gali ‵ki ke maua se loto lagona ‵ma. E sili atu i te tāua, e iloa ne au me ne fai ne au a Ieova ke fakamatamata i a au.”

Kafai e tu ‵mautakitaki koe i te ‵teke atu ki fakaosoosoga, e mafai o fakamautinoa aka ne koe me ka fakamatamata foki te Atua i a koe!—Faataoto 27:11.