E lauiloa a Molimau a Ieova i te lotou galuega talai i koga katoa. Kae e mata, e iloa ne koe me e fai foki ne matou a akoga faka-te-Tusi Tapu i te lalolagi kātoa?

I te 2014, e silia atu i te 8,000,000 o Molimau i fenua e 240, e fai ne latou a akoga faka-te-Tusi Tapu, kolā toeitiiti kae kātoa te 9,500,000 i masina takitasi. * A te aofaki o tino kolā e suke‵suke fakatasi mo matou ki te Tusi Tapu e lasi atu foki i aofaki o tino i nisi fenua e 140.

Ko te mea ke mafai o fai te galuega tenei ko te akoakoatuga, toeitiiti kae kātoa te tasi mo te āfa miliona o Tusi Tapu, tusi, mekesini mo nisi tusi kolā e fai ki ei a akoga faka-te-Tusi Tapu, ko oti ne ‵lomi ne Molimau a Ieova i tausaga takitasi—i ‵gana e nofo ki te 700! E tuku mai ne te taumafaiga sē fakanafagina tenei i te ‵lomiga o tusi, a te avanoaga ke suke‵suke a tino ki te Tusi Tapu i olotou ‵gana eiloa.

 Ne a mea e aofia i te faiga o te akoga tenei?

E fakaaoga ne matou a mataupu kese‵kese kae e iloilo aka a tusi fai‵tau kolā e fetaui ‵lei ki mataupu konā. E pelā me se mea e tasi, e tali mai ne te Tusi Tapu a vaegā fesili penei: Ko oi te Atua? Ne a mea e fiafia a ia ki ei? E mata, e isi sena igoa? E nofo a ia i fea? E mafai o fakapili‵pili atu tatou ki a Ia? A te mea faigata ko te ‵salaga o koga e maua i ei a tali i loto i te Tusi Tapu.

Ke fesoasoani atu ki tino ke maua a tali, e masani o fakaaoga ne matou a te tusi telā e 224 a itulau i ei, telā ko te Ne a Mea e Akoako ‵Tonu Mai i te Tusi Tapu? * Ne fakatoka eiloa te tusi tenei ke fesoasoani atu ki tino ke malamalama i akoakoga faigofie mai i te Tusi Tapu. E aofia i ei a mataupu e uiga ki te Atua, Iesu Keliso, logo‵maega o tino, te faka‵tuakaga o tino ‵mate, ‵talo, mo nisi mataupu aka foki.

 Se a te taimi mo te koga e mafai o fai ei te akoga tenei?

E mafai o fai te akoga i se taimi mo te koga telā e ‵lei ki a koe.

E pefea te leva o te akoga tenā?

Ko oti ne fakaavanoa ne tino e tokouke se itula io me silia atu i vaiaso takitasi ke suke‵suke latou ki te Tusi Tapu. Kae e kese‵kese a te leva o te akoga. E mafai ne matou o fakafetaui aka ki te fakasologa o au mea e fai. E fai a nisi akoga mō se 10 io me se 15 minute i vaiaso takitasi.

E fia a te ‵togi o te akoga tenei?

A te faiga o te akoga mo tusi kolā e fakaaoga i ei e se ‵togi. E fetaui ‵tonu a te mea tenei mo pati a Iesu ki ana soko: “Ne maua ne koutou a mea konei e aunoa mo se ‵togi, tuku atu foki e aunoa mo se ‵togi.”—Mataio 10:8.

E pefea te leva o te vaitaimi e fai ei te akoga?

E faka‵na eiloa ki a koe a te leva o te akoga. E aofia a mataupu e 19 i te tusi ko te Ne a Mea e Akoako ‵Tonu Mai i te Tusi Tapu? E mafai o fai ne koe so se mataupu io me ko mataupu katoa i te leva telā e ‵lei ki a koe.

E mata, e ‵tau o fai au mo fai se Molimau a Ieova?

Ikai. E talia eiloa ne matou mo te āva me e maua ne tino taki tokotasi a te saolotoga ke filifili aka a mea kolā e talitonu a ia ki ei. Kae e mafai eiloa o fai se filifiliga mautinoa ne tino kolā ko lava ‵lei te lotou iloa i te Tusi Tapu, o fai se filifiliga mautinoa.

 Tefea te koga e maua ei ne au a fakamatalaga tai uke atu?

A te fakatuatusi o matou i te itaneti ko te jw.org, e tuku mai i ei a fakamatalaga ‵tonu e uiga ki talitonuga mo faifaiga a Molimau a Ieova.

E mafai pefea o fakamolemole atu au mō se akoga faka-te-Tusi Tapu?

• Lafo mai sau fakamolemole i te itaneti e auala i te www.pr2711.com.

•  

• Fesokotaki atu ki Molimau a Ieova kolā e pili atu ki a koe. E mafai o onoono koe ki te “Molimau a Ieova” i te fakasologa o napa telefoni i te koga e nofo koe i ei.