E mata, kai ‵sili ifo eiloa ne koe a vaegā fesili penā? Kafai e penā loa, e se ko koe fua tokotasi. E mafau‵fau a tino i te lalolagi kātoa ki toe fesili tāua i te olaga. E mata, e mafai o maua ne koe a tali?

E fai mai a te fia miliona o tino, “Ao!” Kaia? Me ko oti ne maua ne latou a tali fakamalie loto mai te Tusi Tapu ki olotou fesili. E mata, e fia iloa ne koe me ne a pati a te Tusi Tapu e uiga ki ei? E mafai eiloa o maua ne koe a mea aoga mai te faiga o se sukesukega faka-te-Tusi Tapu sē ‵togi fakatasi mo Molimau a Ieova. *

E tonu, kafai e fakasino atu ki te Tusi Tapu, e fai mai sāle a nisi tino: “Au ko tō fakalavelave.” “Ko tō faigata.” “E se manako au ke ola e ‵tusa mo tulafono i ei.” Kae e ‵kese a te kilokiloga a nisi tino. E talia ne latou te avanoaga ke tauloto latou ki mea kolā e akoako mai i te Tusi Tapu. Ke mafau‵fau ki nai fakaakoakoga konei:

• “Ne kau atu au ki te lotu Katolika mo te Poletesano, faletapu o te lotu Sikh mo te fale lasi o te lotu Puta kae ne sukesuke foki au ki lotu kese‵kese i se iunivesiti. Kae ne seki tali aka ei aku fesili e uke. Fakamuli, ne asi mai ki toku fale se Molimau a Ieova. Ona ko toku ofo masei i ana tali kolā e fakavae ki te Tusi Tapu, ne talia ei ne au ke fai se akoga faka-te-Tusi Tapu.”—Gill, Egelani.

• “E uke aku fesili faka-te-Tusi Tapu e uiga ki te ola, kae ne seki lotomalie au ki tali a te faifeau i taku lotu. Kae ne tali eiloa ne se Molimau a Ieova e tokotasi aku fesili mai te fakaaogaga fua o te Tusi Tapu. I te taimi ne fesili mai ei a ia me e fia iloa ne au a mea tai uke atu, ne talia ne au mo te fiafia.”—Koffi, Benin.

• “Ne fia iloa malosi ne au a te tulaga o tino ‵mate. Ne talitonu au me e mafai o fakalogo‵mae ne tino ‵mate a tino ola, kae ne fia iloa ne au me se a te mea e fakaasi mai i te Tusi Tapu. Telā, ne kamata ei au o sukesuke ki te Tusi Tapu fakatasi mo toku taugasoa, telā se Molimau.”—José, Pasili.

• “Ne taumafai au o faitau ki te Tusi Tapu kae ne seki malamalama au i ei. Ne asi mai a Molimau a Ieova kae ne fakamatala faka‵lei mai ne latou a nai valoaga i te Tusi Tapu. Ne manako au ke onoono aka me ne a nisi mea e mafai o tauloto ne au.”—Dennize, Mekisiko.

• “Ne mafaufau au me e mata, e atafai mai te Atua ki a au. Telā ne taumafai ei au o ‵talo atu ki te Atua o te Tusi Tapu. I te suā aso ne tukituki mai a Molimau i toku mataloa, kae ne talia ne au se akoga faka-te-Tusi Tapu.”—Anju, Nepal.

E fakamasaua mai ne tala konei a pati a Iesu: “E fia‵fia a latou kolā e iloa ‵lei ne latou olotou manakoga faka-te-agaga.” (Mataio 5:3) A tino ne fa‵nau mai eiloa mo te manakoga ki mea faka-te-agaga. Ko te Atua fua e mafai o fakataunu ne Ia a te manakoga tenā, kae e fai eiloa ne ia e auala i tena Muna, ko te Tusi Tapu.

Ne a mea e aofia i te faiga o se akoga faka-te-Tusi Tapu? E aoga pefea ki a koe? Ka tali aka a fesili konei i te mataupu telā e ‵soko mai.