A matou se fakapotopotoga i te lalolagi kātoa telā e se ‵kau fakatasi mo nisi lotu. E tiga eiloa e tu te motou laumua i Amelika, e ‵nofo atu eiloa te tokoukega o Molimau a Ieova i nisi fenua. A te ‵tonuga loa, e nofo ki te valu miliona o matou kolā e akoako atu a tino ki te Tusi Tapu i fenua e silia atu i te 230. E fai loa matou penā ona ko te motou ‵saga atu ki pati konei a Iesu: “A ko te tala ‵lei tenei o te Malo ka talai atu ki te lalolagi nofoaki kātoa mo fai se molimau ki atufenua katoa.”—Mataio 24:14.

Faitalia me tefea te koga e ‵nofo matou i ei, e faka‵logo faeloa matou ki tulafono o te fenua. Kae e taumafai foki matou ke se ‵kau ki se feitu i mea fakapolitiki. E fai eiloa matou penei ona ko te faka‵logo ki te fakatonuga a Iesu mō Kelisiano ke ‘se fai mo fai ne vaega o te lalolagi.’ Tela la, e se kau atu matou ki kinauga mo faifaiga fakapolitiki io me e ‵lago atu ki taua. (Ioane 15:19; 17:16) A te ‵tonuga loa, i te Taua i te Lua a te Lalolagi, ne ‵pei ki falepuipui a Molimau a Ieova kae ne fakasauagina ona ko te mea ne seki gutugutulua latou ki te lotou tulaga ko te sē ‵kau atu ki se feitu. Ne tusi mai se faifeau Katolika Siamani mua: “Ne mafai eiloa o fai atu me ko latou fua ne tu ‵kese te lotou ‵teke atu ki te pulega a Hitler [Third Reich] ona ko te lotou loto lagona.”

Kae e se ‵vae keatea tatou. Ne ‵talo atu a Iesu ki te Atua e uiga ki ana soko: “Au e se fakatagi atu ki a koe, ke ave latou keatea mai te lalolagi.” (Ioane 17:15) Tela la, e mafai o lavea ne koe matou i te taimi e olo atu ei matou ki galuega ‵togi, sitoa, penā foki ki akoga a te malo.