Henanom Na Wɔkɔ Soro?

BƆ

Nea Bible aka

Kristofo a wodi nokware no mu kakraa bi na Onyankopɔn ayi wɔn sɛ, sɛ wowu a wobenyan wɔn ama wɔakɔ soro. (1 Petro 1:3, 4) Sɛ woyi wɔn a, ɛsɛ sɛ wɔkɔ so ma wɔn gyidi yɛn den sɛ Kristofo na wɔma wɔn abrabɔ ho tew, sɛnea ɛbɛyɛ a frɛ a wɔafrɛ wɔn rekɔ soro no remmɔ wɔn.—Efesofo 5:5; Filipifo 3:12-14.

Wɔn a wɔbɛkɔ soro no, dɛn na wɔbɛyɛ wɔ hɔ?

Wɔne Yesu bedi ade sɛ ahemfo ne asɔfo mfe 1,000. (Adiyisɛm 5:9, 10; 20:6) Wɔn na wɔbɛyɛ “ɔsoro foforo” anaa aban a ɛwɔ soro, na wɔn na wobedi “asaase foforo” anaa asaase sofo so. Wɔn a wobedi ade wɔ soro yi na wɔbɛboa ama nnipa ayɛ pɛ, na wɔasan aboa wɔn ama wɔanya asetena pa a na Onyankopɔn pɛ sɛ nnipa nya wɔ asaase so no.—Yesaia 65:17; 2 Petro 3:13.

Nnipa dodow sɛn na wobenyan wɔn akɔ soro?

Bible ma yehu sɛ, nnipa 144,000 na wobenyan wɔn akɔ soro. (Adiyisɛm 7:4) Ɔsomafo Yohane nyaa anisoadehu bi a ɔyɛɛ ho kyerɛwtohɔ wɔ Adiyisɛm 14:1-3. Yohane hui sɛ ‘Oguammaa no gyina Sion Bepɔw so, na 144,000 no ka ne ho.’ Anisoadehu yi mu no, “Oguammaa no” gyina hɔ ma Yesu a wɔanyan no no. (Yohane 1:29; 1 Petro 1:19) “Sion Bepɔw” no gyina hɔ ma tumi kɛse a wɔde ama Yesu ne 144,000 a wɔne no bedi ade wɔ soro no.—Dwom 2:6; Hebrifo 12:22.

Wɔn a “wɔafrɛ wɔn na wɔapaw” wɔn sɛ wɔne Kristo nni ade wɔ Ahenni no mu no, wɔfrɛ wɔn “nguankuw ketewa.” (Adiyisɛm 17:14; Luka 12:32) Wei kyerɛ sɛ, sɛ yɛde wɔn toto Yesu nguan no nyinaa ho a, wɔyɛ nnipa kakraa bi.—Yohane 10:16.

Atosɛm a nkurɔfo ka fa wɔn a wɔkɔ soro no ho

Atosɛm: Nnipa pa nyinaa kɔ soro.

Nokwasɛm: Onyankopɔn ahyɛ bɔ sɛ, nnipa pa dodow no ara bɛtena ase daa wɔ asaase so.—Dwom 37:11, 29, 34.

Yesu kaa sɛ: “Onipa biara mforo nkɔɔ ɔsoro.” (Yohane 3:13) Nnipa pa bi te sɛ Abraham, Mose, Hiob, ne Dawid wui ansa na Yesu reba asaase so. Nea Yesu kae yi kyerɛ sɛ, nnipa a wowui ansa ɔreba asaase so no mu biara ankɔ soro. (Asomafo Nnwuma 2:29, 34) Mmom, na wɔwɔ anidaso sɛ wobenyan wɔn ama wɔabɛtena asaase so.—Hiob 14:13-15.
Owusɔre a ɛbɛma wɔanyan nnipa bi ama wɔakɔ soro no, wɔfrɛ no “owusɔre a edi kan.” (Adiyisɛm 20:6) Wei ma yehu sɛ owusɔre foforo bi nso bɛkɔ so. Ɛno de, wɔn a wobenyan wɔn no bɛtena asaase so.
Bible ma yehu sɛ Onyankopɔn Ahenni mu no, ‘owu befi hɔ.’ (Adiyisɛm 21:3, 4) Saa bɔhyɛ yi bɛbam wɔ asaase so, efisɛ ɔsoro de, yɛntee sɛ obi awu wɔ hɔ da.

Atosɛm: Obiara na ɔkyerɛ baabi a ɔpɛ sɛ ɔtena, sɛ́ ɔbɛtena soro anaa ɔbɛtena asaase so.

Nokwasɛm: Onyankopɔn na ɔkyerɛ Kristofo anokwafo a wobenya ‘ɔsoro frɛ a ɛno ne abasobɔde’ no. Nea wei kyerɛ ne sɛ, wobenya anidaso sɛ wɔbɛkɔ soro. (Filipifo 3:14) Ɛnyɛ nea obi pɛ anaa nea n’ani gye ho na ɛbɛkyerɛ baabi a Onyankopɔn bɛma watena.—Mateo 20:20-23.

Atosɛm: Anidaso a ɛne sɛ obi benya daa nkwa atena asaase so no nyɛ nea edi mu. Wɔn a wɔmfata sɛ wɔbɛkɔ soro no na wɔma wɔtena asaase so.

Nokwasɛm: Onyankopɔn frɛ wɔn a wobenya daa nkwa atena asaase so no “me man,” “wɔn a mapaw wɔn,” ne “mma a Yehowa ahyira wɔn.” (Yesaia 65:21-23) Nea enti a Onyankopɔn bɔɔ nnipa no, wɔn na ɛbɛbam ama wɔn. Wɔbɛyɛ pɛ na wɔatena ase daa wɔ paradise asaase so.—Genesis 1:28; Dwom 115:16; Yesaia 45:18.

Atosɛm: Nnipa 144,000 a wɔaka wɔn ho asɛm wɔ Adiyisɛm no gyina hɔ ma biribi, na ɛnyɛ nnipa 144,000 ankasa.

Nokwasɛm: Ɛwom sɛ nɔma ahorow bi wɔ Adiyisɛm nhoma no mu a egyina hɔ ma biribi, nanso ebi de, ɛyɛ sɛnea ɛte no ara, ennyina hɔ mma biribi. Ɛho nhwɛso ni. Adiyisɛm nhoma no ka “Oguammaa no asomafo 12 no din 12” ho asɛm. (Adiyisɛm 21:14) Ma yɛnhwɛ adanse a ɛkyerɛ sɛ yebetumi afa nnipa 144,000 no sɛ wɔn dodow yɛ 144,000 ankasa.

Adiyisɛm 7:4 ka sɛ ‘wɔn a wɔahyɛ wɔn nsow, anaa wɔbɛkɔ soro no dodow yɛ 144,000.’ Wɔ saa kyerɛwsɛm yi akyi pɛɛ no, Adiyisɛm nhoma no ka kuw a ɛto so mmienu ho asɛm sɛ: “nnipakuw kɛse bi a obiara ntumi nkan wɔn.” Onyankopɔn begye saa “nnipakuw kɛse” no nso nkwa. (Adiyisɛm 7:9, 10) Sɛ nnipa 144,000 no dodow nyɛ 144,000 ankasa a, anka yɛrenhu nsonsonoe a ɛwɔ kuw a wɔn dodow nni ano ne nnipakuw a edi kan a wɔyɛ 144,000 no ntam. a

Afei nso, wɔka nnipa 144,000 no ho asɛm sɛ “wɔtɔɔ wɔn fii nnipa mu sɛ aba a edi kan.” (Adiyisɛm 14:4) Asɛm a ɛne “aba a edi kan” no kyerɛ nnipakuw ketewaa bi a wɔapaw wɔn. Wɔn a wɔapaw wɔn yi na wɔne Kristo bedi ade wɔ soro. Wobedi wɔn a wɔbɛtena asaase so a wɔn dodow nni ano no so.—Adiyisɛm 5:10.

a Ɔbenfo Robert L. Thomas nso kyerɛw biribi faa nɔma 144,000 a ɛwɔ Adiyisɛm 7:4 no ho. Ɔkaa sɛ: “Ɛyɛ nɔma a egyina hɔ ma nnipa dodow pɔtee bi, ɛnna 7:9 no nso ka nnipa bi a wɔn dodow nni ano ho asɛm. Sɛ yɛka sɛ nɔma 144,000 no gyina hɔ ma biribi a, ɛnde na ɛkyerɛ sɛ nɔma biara a ɛwɔ nhoma no mu nso gyina hɔ ma biribi.”—Revelation 1-7: An Exegetical Commentary, kratafa 474.