Hiob 37:1-24
37 “Seesei me koma rebɔ kim-kim-kim,Na ɛrehuruhuruw fi baabi a ɛwɔ.
2 Monyɛ aso ntie sɛnea ne* nne rebobom no,Na muntie aprannaa a efi n’anom reba no.
3 Ogyaa mu wɔ ɔsoro ase baabiara,Na ɔsoma n’anyinam+ kɔ asaase ano noho.
4 Afei mmobom kɛse di akyi ba;Ɔde nne kɛse ma aprannaa bobom.+Bere a ne nne rebobom nyinaa, na ɛno* nso nenam mu.
5 Onyankopɔn nne ma aprannaa bobom+ ma ɛyɛ nwonwa;Ɔyɛ nneɛma akɛse a ɛboro yɛn ntease so.+
6 Efisɛ ɔka kyerɛ sukyerɛmma sɛ, ‘Tɔ gu asaase so,’+
Na ɔka kyerɛ osu a ɛretɔ sɛ, ‘Tɔ gidigidi.’+
7 Onyankopɔn ma nnipa gyae adwuma a wɔyɛ nyinaa,*Sɛnea ɛbɛyɛ a onipa dasani biara behu N’adwuma.
8 Wuram mmoa kɔ wɔn bon mu,Na wompue mfi wɔn bon no mu.
9 Mframa a ano yɛ den bɔ fi ɛno ara ne dan mu,+Na atifi fam mframa de awɔw ba.+
10 Onyankopɔn de ne home ma nsu kyenkyen,+Na ɛma nsu akɛse kyen denneennen.+
11 Yiw, ɔma osu yɛ omununkum ma;Ɔbɔ n’anyinam hwete+ omununkum mu.
12 Etwa ne ho frɛdɛfrɛdɛ kɔ baabiara a ɔkyerɛ sɛ ɛnkɔ;Nea ɔbɛka sɛ ɛnkɔyɛ wɔ asaase so biara no, ɛkɔyɛ.+
13 Sɛ ɔde twe nkurɔfo aso* oo,+ ɔde yɛ asaase yiye oo,Sɛ ɔde kyerɛ ne dɔ a enni huammɔ oo, ɔma edi ho dwuma.+
14 Hiob, tie eyi;Yɛ komm, na tɔ wo bo ase dwinnwen Onyankopɔn anwonwadwuma ho.+
15 Wunim sɛnea Onyankopɔn ma omununkum yɛ adwuma?Na wunim sɛnea ɔma anyinam paapae wɔ ne mununkum mu no?
16 Wunim nea ɛma omununkum tumi sensɛn hɔ?+
Eyi yɛ Nea ne nimdeɛ wie pɛyɛ no anwonwadwuma.+
17 Adɛn nti na w’ataade mu yɛ hyewBere a anaafo fam mframa ma asaase so yɛ dinn* no?+
18 Wubetumi ne no atrɛw ɔsoro mu+Ama emu ayɛ den sɛ dade ahwehwɛ anaa?
19 Kyerɛ yɛn nea yɛnka nkyerɛ no;Yɛwɔ sum mu, enti yenhu nea yɛnka.
20 Metumi aka akyerɛ no sɛ mepɛ sɛ me ne no kasa anaa?
Anaasɛ onipa bi aka biribi a ɛsɛ sɛ wɔbɔ No amanneɛ?+
21 Ɛwom sɛ ewim hyerɛn,Nanso wontumi nhu hann,*Kosi sɛ mframa bɛbɔ ama wim atew.*
22 Atifi fam na hann a ɛhyerɛn sɛ sika kɔkɔɔ fi ba;Onyankopɔn anuonyam+ yɛ nwonwa dodo.
23 Ade nyinaa so Tumfo no de, sɛnea ɔte no, ɛyɛ den sɛ yɛbɛte ase;+Ne tumi sõ.+Na n’atɛntrenee+ ne ne trenee+ bebrebe no, ɔremmu so da.
24 Ɛno nti, ɛsɛ sɛ nnipa suro no.+
Efisɛ obiara a ɛyɛ no sɛ ɔyɛ onyansafo* no, ɔrenyɛ no adom.”+
Ase Hɔ Nsɛm
^ Kyerɛ sɛ, Onyankopɔn.
^ Anaa “anyinam no.”
^ Nt., “Onyankopɔn kyekyere onipa biara nsa.”
^ Nt., “ɔde yɛ abaa.”
^ Anaa “ma asaase yɛ dinn.”
^ Kyerɛ sɛ, owia hann.
^ Anaa “mframa bɛbɔ apia omununkum akɔ.”
^ Nt., “ɔyɛ onyansafo wɔ ne komam.”
