Honhom Kronkron Tumi a Wuhia wɔ W’asetena Mu

“NTOW me nkyene mfi w’anim; Na wo honhom kronkron no nso, nyi mfi me so.” (Dwom 51:11) Eyi ne mpae a Ɔhene Dawid fi ne komam bɔe bere a odii mfomso a anibere wom no.

Ná Dawid fi bere tenten anya honhom kronkron tumi no so mfaso. Bere a na nnii mfe aduonu no, honhom no ma otumi dii Goliat, ɔsraani a na ne ho yɛ hu no so nkonim. (1 Samuel 17:45-50) Afei nso, ɛhyɛɛ no den ma ɔkyerɛw nnwom a emu nsɛm yɛ dɛ sen biara. Dawid kyerɛkyerɛɛ mu sɛ: “Yehowa honhom nam me so kasae, na n’asɛm wɔ me tɛkrɛma so.”—2 Samuel 23:2.

Yesu Kristo ankasa foaa dwuma a honhom kronkron dii wɔ Dawid asetena mu no so. Bere bi, Yesu ka kyerɛɛ n’atiefo sɛ: “Honhom kronkron maa Dawid ankasa kae sɛ, ‘Yehowa ka kyerɛɛ me Wura sɛ: “Tena me nsa nifa kosi sɛ mede w’atamfo begu wo nan ase.”’” (Marko 12:36; Dwom 110:1) Ná Yesu nim sɛ honhom kronkron na ɛboaa Dawid ma ɔkyerɛw ne nnwom no. So saa honhom kronkron koro no ara wɔ hɔ a ebetumi aboa yɛn?

“Monkɔ So Mmisa, na Wɔde Bɛma Mo”

Ebia worenkyerɛw dwom biara da. Nanso, wubetumi ahyia akwanside a ne kɛse te sɛ Goliat. Sɛ nhwɛso no, susuw Isabel * ho hwɛ. Ne kunu gyaa no kɔfaa ababaa bi. Ogyaw ɛka kɛse too no so, na wamma no sika biara a ɔde bɛhwɛ wɔn mmabea baanu no. Isabel ka sɛ: “Mete nka sɛ, obuu me kwasea paa. Nanso efi bere a ogyaa me no, mahu sɛ Onyankopɔn honhom kronkron awowaw me.”

 So na Isabel hwɛ kwan sɛ obenya honhom kronkron no ara kɛkɛ? Dabi, ɔsrɛɛ Onyankopɔn daa sɛ ɔmma no ne honhom no. Ná onim sɛ ohia Onyankopɔn tumi na aboa no ma ɔde akokoduru agyina nea na ɛbɛba biara ano. Na eyi bɛma watumi ahwɛ ne mma no yiye, na watumi asiesie n’adwene a na atu afra a enti na osusuw sɛ ne so nni mfaso no. Otiee Yesu nsɛm yi: “Monkɔ so mmisa, na wɔde bɛma mo; monkɔ so nhwehwɛ, na mubehu; monkɔ so mmom, na wobebue mo.”—Mateo 7:7.

Ná Roberto nso te nka sɛ ohia Onyankopɔn honhom no na ɔde adi tebea foforo ho dwuma. Ná sigaret ne wiinom aka no hɔ, na daa na ebi si n’ano. Edii mfe abien ansa na ɔretumi agyae, na ɔbrɛe paa. Roberto kyerɛkyerɛɛ mu sɛ, “Sɛ wugyae nnubɔne nom a, ɛma wo ho tumi yeraw wo paa. Bere nyinaa, wo kɔn dɔ sɛ wobɛnom nnubɔne no.”

Roberto toaa so sɛ: “Ná masi me bo sɛ mɛsesa me suban sɛnea ɛbɛyɛ a metumi asom Onyankopɔn wɔ ɔkwan a ɔpɛ so. Mebɔɔ mmɔden sɛ mede nsɛmpa a ɛwɔ Bible mu no bɛhyɛ m’adwenem. Mifi komam bɔɔ mpae da biara, na na mesrɛ Onyankopɔn sɛ ɔmma me ahoɔden a mede bɛyɛ nsakrae wɔ m’asetena mu. Ná minim sɛ merentumi mfa m’ankasa ahoɔden nyɛ hwee. Na mihuu sɛnea Yehowa buaa me mpaebɔ no, titiriw bere a na masan ayɛ ade bɔne a magyae no bio no. Migye di sɛ Onyankopɔn honhom kronkron ma minyaa ahoɔden foforo; sɛ ɛnyɛ ɛno a, anka merentumi nnyae nnubɔne no nom da.”—Filipifo 4:6-8.

‘Wɔde Ntaban Tu te sɛ Akɔre’

Sɛnea honhom kronkron boaa Isabel ne Roberto no, saa ara na aboa Yehowa Adansefo pii wɔ wɔn asetena mu. Sɛ wopɛ a, Yehowa adeyɛ tumi—tumi a ɔde bɔɔ amansan—no betumi aboa wo. Sɛ wohwehwɛ Onyankopɔn honhom no denneennen a, ɔno nso ayɛ krado sɛ ɔde bɛma wo. Nanso ansa na wo nsa bɛka saa honhom no, ɛsɛ sɛ wusua nokware a ɛfa Onyankopɔn ho, na wufi wo koma nyinaa mu bɔ mmɔden sɛ wobɛyɛ n’apɛde.—Yesaia 55:6; Hebrifo 11:6.

Honhom kronkron betumi aboa wo ma woanya ahoɔden de asom Onyankopɔn yiye na wode agyina nsɛnnennen biara a ebetumi asɔre wɔ w’asetena mu no ano. Bible ma yɛn awerɛhyem sɛ: ‘Yehowa ma nea wabrɛ no tumi, na nea onni ahoɔden pii no ɔma onya no mmoroso. Wɔn a wɔde wɔn ho to Yehowa so no benya ahoɔden foforo. Wɔde ntaban betu te sɛ akɔre. Wobetu mmirika nso wɔremmotow, na wɔbɛnantew nso wɔremmrɛ.’​—Yesaia 40:28-31.​—w09-E 10/1.

[Ase hɔ asɛm]

[Asɛm a wɔafa aka wɔ kratafa 8]

‘Mifi komam bɔɔ mpae da biara, na na mesrɛ Onyankopɔn sɛ ɔmma me ahoɔden. Ná minim sɛ merentumi mfa m’ankasa ahoɔden nyɛ hwee. Na mihuu sɛnea obuaa me mpaebɔ no’

 [Adaka/​Mfonini wɔ kratafa 7]

Dwuma A Honhom Kronkron Di

Honhom kronkron na Onyankopɔn de bɔɔ asase ne amansan no fã a aka nyinaa. Odwontofo no kae sɛ: “O Yehowa, wo nnwuma dɔɔso dɛn ara! Nyansam na woayɛ ne nyinaa. Wo nsa ano adwuma ahyɛ asase so mã. Sɛ wosoma wo honhom kɔ a, wode bɔ ade.”​—Dwom 104:24, 30; Genesis 1:2; Hiob 33:4.

Honhom Kronkron na ɛkaa nnipa atreneefo ma wɔkyerɛw Bible no. Ɔsomafo Paulo kyerɛwee sɛ: “Kyerɛwnsɛm no nyinaa fi Onyankopɔn honhom mu, na eye.” (2 Timoteo 3:16) Nea Hela asɛmfua a wɔkyerɛɛ ase “fi Onyankopɔn honhom mu” no kyerɛ ankasa ne sɛ, “Onyankopɔn home guu mu.” Yehowa home anaa ne honhom na ɛkyerɛɛ Bible akyerɛwfo no nsusuwii kwan ma wɔkyerɛw “Onyankopɔn asɛm.”​—1 Tesalonikafo 2:13.

Honhom kronkron na ɛmaa Onyankopɔn asomfo tumi ma wɔde kaa nea ebesisi daakye pɛpɛɛpɛ. Ɔsomafo Petro kyerɛkyerɛɛ mu sɛ: “Kyerɛwnsɛm mu nkɔmhyɛ biara nni hɔ a efi nnipa nkyerɛase mu. Na nkɔmhyɛ mfaa onipa pɛ so mmae da, na mmom nea efi Onyankopɔn hɔ na nnipa kae sɛnea honhom kronkron kaa wɔn no.”​—2 Petro 1:20, 21; Yoel 2:28.

Honhom kronkron boaa Yesu ne gyidifo afoforo ma wɔkaa Onyankopɔn Ahenni ho asɛm, na wɔyɛɛ anwonwade. Yesu kae sɛ: “Yehowa honhom wɔ me so, efisɛ ɔsraa me sɛ memmɛka asɛmpa nkyerɛ ahiafo, ɔsomaa me sɛ memmɛka ogye ho asɛm nkyerɛ nnommum na memma anifuraefo nhu ade.” ​—Luka 4:18; Mateo 12:28.

 [Adaka/​Mfonini wɔ kratafa 9]

SƐNEA HONHOM KRONKRON BETUMI ABOA YƐN

Honhom kronkron betumi ama wo ahoɔden a wode bɛko atia sɔhwɛ, na aboa wo ma woadi subammɔne so. Ɔsomafo Paulo kae sɛ: “Onyankopɔn yɛ ɔnokwafo, na ɔremma wɔnsɔ mo nhwɛ ntra nea mubetumi, na mmom ɔbɛma kwan abɛda sɔhwɛ no ho a mode befi mu, na moatumi agyina ano.”​—1 Korintofo 10:13.

Honhom kronkron betumi aboa wo ma woada suban pa adi. “Afei honhom no aba ne ɔdɔ, anigye, asomdwoe, abodwokyɛre, ayamye, papayɛ, gyidi, odwo, ahosodi.”​—Galatifo 5:22, 23.

Honhom kronkron betumi ahyɛ wo den ma woagyina sɔhwɛ ano. “Ade nyinaa mu mewɔ ahoɔden, nea ɔhyɛ me den no nti.”​—Filipifo 4:13.