“Te faaite mai ra te Atua i to ˈna here ia tatou i te mea e ua pohe te Mesia no tatou a vai taata hara noa ˈi tatou.”—Roma 5:8, Huriraa o te ao apî.

 “Ua faarahi râ te Atua i to ˈna aroha ia tatou nei, i te mea te vai taata hara noa nei â tatou, i pohe ai te Mesia no tatou nei.”—Roma 5:8, Te Bibilia Moˈa ra.

 Ua faaite te Atua ra Iehova a i to ˈna here rahi a faatia ˈi i ta ˈna tamaiti, Iesu Mesia, ia horoa i to ˈna ora no te taata hara. (Ioane 3:16) Ei taata hara, e feruri e e ohipa iho â te taata ma te ore e pee i te mau ture aveia tia a te Atua. (Kolosa 1:21, 22) Teie râ, ua horoa te Atua i te ravea ia hau tatou e o ˈna “na roto i te pohe o ta ˈna Tamaiti.” (Roma 5:10) Ei faahopearaa, e nehenehe tatou e faatupu i te hoê auhoaraa maitai e te Atua i teie nei â, e i muri aˈe te tiaturiraa ia ora e a muri noa ˈtu.—Roma 5:11; Ioane 1, 4:9, 10.

 Ua papai te aposetolo Paulo i teie mau parau no te mau Kerisetiano i ora na i Roma. I roto i te pene 5 o ta ˈna rata i to Roma, ua faataa Paulo no te aha te mau Kerisetiano e oaoa ˈi e ia vai papu ai to ratou tiaturiraa. (Roma 5:1, 2) No te mea ua niu to ratou tiaturiraa i nia i to te Atua here rahi na roto ia Iesu, “eita te tiaturiraa e faatupu i te haama.” (Roma 5:5, 6) Ua auraro Iesu ma te tia roa i te Atua, ta Adamu, te taata matamua i ore i rave. (Roma 5:19) I to Adamu faaroo-ore-raa i te Atua, ua roohia ta ˈna huaai i te hara e te pohe. (Roma 5:12) O Iesu râ, maoti ta ˈna auraroraa i te Atua e to ˈna poheraa, e nehenehe te feia auraro e tiaturi e ora e a muri noa ˈtu.—Roma 5:21.