Noa ˈtu te mau tutavaraa a te taata, eita iho â ratou e nehenehe e hopoi mai i te hau na te ao nei. No te aha? Teie ta te Bibilia e parau ra:

•   “Aita e tiaraa to te taata e haere ra ia aratai i to ˈna mau taahiraa.” (Ieremia 10:23) Aita te taata i poietehia ˈi no te aratai ia ˈna iho. No reira, eita iho â ïa te taata e nehenehe e haamau i te hau.

•   “Eiaha outou e tiaturi i te huiarii e i te tamaiti a te taata nei, o te ore e nehenehe e faaora. Ia mau to ˈna aho, e hoˈi oia i te repo. I tera mahana e moˈe ai to ˈna mau manaˈo.” (Salamo 146:3, 4) Noa ˈtu e manaˈo maitai to te mau tia faatere, eita ratou e nehenehe e faaore i te mau tumu atoa o te tamaˈi.

•   “Ia tae i te mau mahana hopea, e tau ino mau ïa e te fifi ia faaruru. E haapao noa te taata ia ratou iho . . . e iria, e au ore i te maitai, e haavare, e farii ore i te aˈoraa, e faaoru.” (Timoteo 2, 3:1-4) No te mea hoi te ora nei tatou i “te mau mahana hopea” o teie nei ao e no te huru ino o te taata, mea fifi ïa ia ite i te hau.

•   “Ua ati râ to te fenua e to te miti, no te mea ua pou te Diabolo ia outou ra ma te riri rahi, ua ite hoi o ˈna e e taime poto to ˈna e toe ra.” (Apokalupo 12:12) Ua hurihia te Diabolo to te Atua enemi i nia i te fenua e te turai ra o ˈna i te taata ia rave i te ohipa ino. Mai te mea ra e o ˈna “te arii o teie nei ao,” eita ïa tatou e nehenehe e ora ma te hau.—Ioane 12:31.

•   “E faahuˈahuˈa e e haamou [te Faatereraa arii a te Atua] i tera mau faatereraa arii atoa [o te patoi ra i te Atua], e o ˈna anaˈe te vai mai e a muri noa ˈtu.” (Daniela 2:44) O te Basileia o te Atua aore ra te Faatereraa arii a te Atua anaˈe te nehenehe e haamâha i te hinaaro o te taata ia fanaˈo i te hau na te ao nei.—Salamo 145:16.