Ua maiti te Atua te tahi mau Kerisetiano haapao maitai o te faatia-faahou-hia i te raˈi i muri aˈe i to ratou pohe. (Petero 1, 1:3, 4) Ua maiti-anaˈe-hia ratou, e titauhia ia tamau ratou i te haapuai i to ratou faaroo e ia tapea i te hoê haerea tia ia ore ratou e ere i te tuhaa ta ratou e fanaˈo i te raˈi.—Ephesia 5:5; Philipi 3:12-14.

Eaha ta te feia e haere i te raˈi e rave i reira?

 E tavini ratou e Iesu ei arii e ei tahua i te roaraa o na 1 000 matahiti. (Apokalupo 5:9, 10; 20:6) O ratou “te raˈi apî,” aore ra te faatereraa i te raˈi, o te faatere i te “fenua apî,” aore ra te taata i nia i te fenua. E tauturu te feia o te faatere i nia i te raˈi i te huitaata ia fanaˈo i te tiaraa ta te Atua i opua no ratou i te omuaraa.—Isaia 65:17; Petero 2, 3:13.

Ehia taata te faahoˈihia i te ora i nia i te raˈi?

 Te faataa ra te Bibilia e 144 000 taata te faahoˈihia i te ora i nia i te raˈi. (Apokalupo 7:4) I roto i te orama faaitehia i roto i te Apokalupo 14:1-3, ua ite te aposetolo Ioane i “te Arenio e tia ra i te mouˈa Ziona, e 144 000.” I roto i teie orama, o Iesu “te Arenio.” Ua faahoˈihia mai oia i te ora. (Ioane 1:29; Petero 1, 1:19) Te “mouˈa Ziona,” o te tiaraa teitei ïa o Iesu e i na 144 000 te faatere e o ˈna i te raˈi.—Salamo 2:6; Hebera 12:22.

 Te feia “tei titau-manihini-hia e tei maitihia” ia faatere e te Mesia i roto i te Faatereraa arii a te Atua, o ratou ïa te “nǎnǎ iti.” (Apokalupo 17:14; Luka 12:32) E faaite ïa te reira e aita ratou i rahi ia faaauhia e te rahiraa mamoe ê atu a Iesu.—Ioane 10:16.

Te mau manaˈo hape no nia i te feia o te haere i te raˈi

 Manaˈo hape: Mea taipe te numera 144 000 faahitihia i roto i te Apokalupo.

 Ta te Bibilia e haapii ra: I roto i te Apokalupo, te vai ra te tahi mau numera taipe. E ere râ te tahi atu mau numera i te taipe. Ei hiˈoraa, te vai ra te parau o “na iˈoa 12 . . . o na aposetolo 12 a te Arenio.” (Apokalupo 21:14) E hiˈopoa anaˈe eaha te haapapu ra e ere te numera 144 000 i te taipe.

 I roto i te Apokalupo 7:4, te parauhia ra: “Te numera o te feia i tapaohia, 144 000.” I muri noa iho, te faahitihia ra te parau o “te hoê nahoa rahi, eita e noaa ia taio.” E fanaˈo atoa te “nahoa rahi” i te faaoraraa no ǒ mai i te Atua. (Apokalupo 7:9, 10) Ahani e taipe te numera 144 000, eita ïa e itehia te taa-ê-raa i rotopu i na piti pǔpǔ. a

 Hau atu â, “ua hoohia mai ratou [na 144 000] no roto mai i te huitaata ei hotu matamua.” (Apokalupo 14:4) Te parau o te “hotu matamua,” no te hoê ïa pǔpǔ iti. E tano iho â no te feia e faatere i te huitaata mai nia mai i te raˈi e te Mesia.—Apokalupo 5:10.