E iˈoa to te mau taata atoa. Aita ïa tatou e maere e iˈoa atoa to te Atua. No te faahoa i te tahi atu taata, mea faufaa ia ite i to ˈna iˈoa e ia faahiti i te reira. Hoê â huru atoa ia hinaaro tatou e faahoa ˈtu i te Atua.

 I roto i te Bibilia, te parau ra te Atua: “O vau o Iehova. O to ˈu iˈoa tera.” (Isaia 42:8) Noa ˈtu e rave rahi tiaraa iˈoa to ˈna mai “te Atua Manahope,” “Arii hau ê e Fatu” e “te Atua poiete,” te hinaaro ra te Atua ia faahiti ta ˈna mau tavini to ˈna iˈoa.—Genese 17:1; Ohipa 4:24; Petero 1, 4:19.

 I roto e rave rahi huriraa Bibilia, e itehia te iˈoa o te Atua i roto i te Exodo 6:3. Te na ô ra: “I fa mai na vau ia Aberahama, Isaaka e Iakoba ei Atua Manahope, aita râ vau i faaite roa ˈtu ia ratou no nia i to ˈu iˈoa Iehova.”

 O Iehova te iˈoa o te Atua na roto i te reo Tahiti tei faaohipahia e rave rahi matahiti i teie nei. Te manaˈo ra e rave rahi aivanaa e o “Yahweh” te faahitiraa tano, mea matau aˈe râ na te taata te iˈoa Iehova. Ua papaihia te tuhaa matamua o te Bibilia na roto i te reo Hebera, tei papaihia mai te pae atau i te pae aui. E papaihia na reta Hebera e maha o te iˈoa o te Atua (יהוה) na roto i te mau piri vauera YHWH ei reo Tahiti.