Te ohipa ra te Diabolo e te mau demoni i nia i te huitaata. Te parau ra te Bibilia: “Te vai nei râ to te ao atoa i raro aˈe i te mana o te varua ino.” (Ioane 1, 5:19) Te faaite ra te Bibilia eaha te mau ravea ta te Diabolo e faaohipa ra i nia i te taata.

•   Te haavarevare. Te faaitoito ra te Bibilia i te mau Kerisetiano “ia patoi atu i te mau ravea paari a te diabolo ra.” (Ephesia 6:11, Te Bibilia Moˈa ra) Hoê o te mau ravea a te Diabolo, ia manaˈo ta ˈna mau tavini tei te pae o te Atua ratou.—Korinetia 2, 11:13-15.

•   Te peu tahutahu. Te haavare ra te Diabolo i te taata ma te faaohipa i te feia e demoni hiˈohiˈo to ratou, te feia hiˈohiˈo e te feia hiˈo fetia. (Deuteronomi 18:10-12) E ohipa ohie te mau demoni i nia i te taata e rave ra i te raau taero, te feia e faaohipa ra i te tahi mau ravea no te tamǎrû i te tino e te feruriraa e te feia tei faataotohia e te taata.—Luka 11:24-26.

•   Te haapaoraa hape. Na roto i ta ratou mau haapiiraa hape, te turai ra te mau haapaoraa i te taata ia ore e faaroo i te Atua. (Korinetia 1, 10:20) Te parau ra te Bibilia e “haapiiraa a te mau demoni” te reira.—Timoteo 1, 4:1.

•   Tei uruhia e te demoni. Te faahitihia ra i roto i te Bibilia e ua uruhia te tahi mau taata e te demoni. Te tahi mau taime, ua matapohia aore ra ua vavahia ratou aore ra ua tae roa vetahi o ratou i te hamani ino ia ratou iho.—Mataio 12:22; Mareko 5:2-5.

E nafea ia patoi i te Diabolo?

 Eiaha e mǎtaˈu i te Diabolo e te mau demoni, te faaite ra hoi te Bibilia e nafea ia patoi i te Diabolo:

•   A haapii eaha te mau raveraa ta te Diabolo e faaohipa ra “ia ore tatou ia noaa” ia ˈna.—Korinetia 2, 2:11.

•   A haapii i te Bibilia e a faaohipa i ta ˈna mau faaueraa tumu e mea na reira oe e paruruhia ˈi e e patoi ai i te Diabolo.—Ephesia 6:11-18.

•   A faarue i te mau mea atoa e ohipa demoni to roto. (Ohipa 19:19) E ara i te mau himene, te mau buka, te mau vea, te mau hohoˈa e te mau video e ohipa tahutahu to roto.