E piti taime i te hebedoma, e putuputu te mau Ite no Iehova i ta ratou mau vahi haamoriraa, parauhia te Piha a te Basileia. Eaha te ravehia i reira e e nafea oe e faufaahia ˈi ia apiti i te mau putuputuraa?

•  Eaha te ravehia i te hoê Piha a te Basileia?

•  No te aha oe e apiti ai i te mau putuputuraa?

•  To ratou manaˈo

 E vahi haamoriraa te Piha a te Basileia, i reira e haapiihia ˈi ia faaohipa i ta te Bibilia e parau ra. E nehenehe te putuputuraa e tauturu ia oe:

•   ia haapii i te parau mau no nia i te Atua.

•   ia taa i te mau tupuraa o teie mahana.

•   ia riro mai ei taata maitai atu â.

•    ia ite mai i te mau hoa maitai.

 Ua ite anei oe? E parauhia Piha a te Basileia te vahi i reira te mau Ite no Iehova e putuputu ai, no te mea i reira e paraparau-pinepine-hia ˈi no nia i te Faatereraa arii a te Atua.—Mataio 6:9, 10; 24:14; Luka 4:43.

 Te mau haamaramaramaraa o te tauturu ia oe. E tauturu mai te mau faaueraa Bibilia e aparauhia i te mau putuputuraa a te mau Ite no Iehova ia oe ia noaa te paari. (Maseli 4:5) Te auraa ïa e e nehenehe ta te Bibilia e tauturu ia oe ia rave i te mau faaotiraa maitai i roto i te oraraa. E nehenehe atoa te reira e tauturu ia oe ia ite i te pahonoraa i te mau uiraa faufaa roa o te oraraa:

•   Eaha te tumu e ora ˈi tatou?

•   O te Atua anei te tumu o to tatou mau mauiui?

•   Eaha te tupu ia pohe tatou?

 Teie te tahi mau tumu parau o te mau oreroraa parau e horoahia i te mau putuputuraa i te hopea hebedoma:

•   No te aha e vaiiho ai i te Bibilia ia aratai ia tatou?

•   Ihea tatou e ite ai i te tauturu i te tau ahoaho?

•   Eaha ta te Faatereraa arii a te Atua e rave no tatou i teie nei â?

 “Ua haere mai hoê hoa haapiiraa i te hoê o ta matou putuputuraa. Ua parahi oia i pihai iho i to ˈu utuafare e ua horoa matou i ta matou mau buka ia ˈna ra. I muri aˈe, ua parau mai oia ia ˈu e ua faahiahia roa oia i te mau pahonoraa a tei apiti mai i te roaraa o te porotarama i reira e titauhia ˈi te taata ia pahono. Ua parau atoa oia e i roto i ta ˈna fare pure, aita ta te taata e buka haapiiraa mai ta matou.”—Brenda.

 Ua ite anei oe? Mea tamoni ore te tomoraa i te Piha a te Basileia, aita e titauraa moni.

 E faaitoito mai te feia i apiti ia oe. Te parau ra te Bibilia e hoê o te mau tumu e putuputu ai te mau Kerisetiano, no te “faaitoito . . . te tahi i te tahi.” (Hebera 10:24, 25) I roto i teie ao e haapao noa te rahiraa o te taata ia ratou iho, mea oaoa ia apiti i te feia o te haafaufaa ra i te Atua e i te tahi atu ia ratou.

 “Ia faaoti ta ˈu fare haapiiraa, aita vau e oaoa ra e e rohirohi atoa vau. Tera râ, maoti te feia i te Piha a te Basileia, e maitai noa ïa vau. Ia hoˈi au i te fare i muri aˈe i te mau putuputuraa, e oaoa vau e e itoitohia vau no te haamata i te hoê mahana apî.”—Elisa.

 Ua ite anei oe? Ua hau atu 120 000 amuiraa a te mau Ite no Iehova na te ao nei. E putuputu ratou i roto hau atu 60 000 vahi haamoriraa. I te mau matahiti atoa, ua patuhia 1 500 Piha a te Basileia no te rahi o te feia e apiti mai i te mau putuputuraa. a