Mai te mau matahiti 1990 tae atu i 2015, i Marite, ua tataipitihia te mau faataaraa i rotopu i te feia e 50 matahiti to ratou e ua tataitoruhia te reira no te feia e hau atu i te 65 matahiti. Ua faaohipa te mau aivanaa i te hoê parau apî, te “faataaraa a te feia rouru hinahina,” no te faaite i te maraaraa o te mau faataaraa i rotopu i te feia paari roa. Eaha te tumu o tera “faataaraa a te feia rouru hinahina”? Nafea oe e nehenehe ai e paruru i to oe faaipoiporaa?

I roto i teie tumu parau

•  Eaha te tumu o te mau faataaraa a te feia rouru hinahina?

•  Eaha ta oe e rave?

•  Aratairaa no te aparauraa

•    Pinepine, te faataa ra te mau hoa faaipoipo paari roa no te mea ua atea ê mǎrû noa ratou te tahi i te tahi. I te roaraa o te tau, mea taa ê te mau mea ta ratou e anaanatae ra e mea iti roa te mau mea ta ratou e rave amui nei. Aore ra i to te mau tamarii faarueraa i te fare, aita na hoa faaipoipo e ite faahou ra nafea ia riro ei tane e ei vahine no te mea ua rave maoro roa raua i te hopoia ei papa e ei mama.

•    I te mau matahiti i mairi aˈenei, mea rahi te mau aivanaa e au ra e mea aravihi ratou i te pae o te faaipoiporaa. Te faaite ra ratou i te mau hoa faaipoipo ia tâuˈa i to ratou iho mau hinaaro e ia ani atoa ia ratou iho i to muri nei mau uiraa: “Te oaoa ra anei au i roto i to ˈu faaipoiporaa? Te tauturu ra anei te reira ia ˈu ia riro ei taata maitai aˈe? Te aupuru ra anei to ˈu hoa faaipoipo i ta ˈu e hinaaro mau ra i te pae o te mau huru aau?” Mai te peu e aita, tera ïa te manaˈo o te rahiraa: “A rave i te mea maitai roa no oe. A faataa i to oe hoa faaipoipo e a haamata i te hoê huru oraraa apî.”

•    Aita te taata e manaˈo faahou e mea ino ia faataa. Ua papai te aivanaa Eric Klinenberg e aita i maoro aˈenei, ia hinaaro te hoê taata e faataa i to ˈna hoa faaipoipo no te mea aita o ˈna i oaoa faahou, ua titauhia ia ˈna ia horoa i te mau tumu papu roa no te faataa ˈtu. I teie nei râ, mea taa ê roa. Peneiaˈe aita oe e oaoa faahou ra i roto i to oe faaipoiporaa, e titauhia ia oe ia horoa i te mau tumu papu roa no te faaite no te aha e titauhia ia oe ia faaea e to oe hoa faaipoipo. No te aha e ere tera faaotiraa i te mea ohie? No te mea i teie mahana, te tiaturi ra te rahiraa o te taata e te mea faufaa roa ˈˈe, ia imi na mua roa i to oe iho maitai. a

 Papu roa, e ere te faataaraa te hopea o te mau fifi atoa, e itehia te tahi atu mau fifi. Ei hiˈoraa, ia au i te hoê maimiraa, i roto i te mau “faataaraa a te feia rouru hinahina,” e ite-pinepine-hia te mau faahopearaa ino mau i te pae o te moni, no te mau vahine iho â râ.

 Teie te tahi atu fifi. Ia au i te buka Eiaha e faataa (Beretane), noa ˈtu e te haamata ra oe i te hoê huru oraraa apî, aita to oe huru mau i taui. Eaha ta oe i rave no te taui i te huru paraparauraa tei ore i tano i roto i to oe faaipoiporaa? Eaha ta oe i rave no te taui i to oe haerea i mua i te tatamaˈiraa? b

•   A farii i te mau tauiraa. Aita te hoê faaipoiporaa e vai mai tera noâ. Peneiaˈe ua atea ê paha orua no te mea ua faarue ta orua mau tamarii i te fare aore ra no te mea mea ê te mau mea ta orua e anaanatae ra. Eiaha e tiatonu i nia i to orua huru oraraa i na mua ˈtu, a feruri râ nafea ia haamaitai i to orua faaipoiporaa i teie nei.

   Aratairaa Bibilia: “Eiaha e parau: ‘No te aha mea au aˈe te mau mahana na mua ˈˈe i teie mau mahana nei?,’ e ere hoi na roto i te paari oe e ui ai i te reira.”—Koheleta 7:10.

•   Ia riro orua ei hoa piri. E nehenehe anei oe e anaanatae i te hoê mea apî ta to oe hoa faaipoipo e anaanatae ra? Aore ra e nehenehe anei oe e tauturu i to oe hoa faaipoipo ia anaanatae i te tahi mea apî ta oe e rave ra? E nehenehe anei oe e faaô i roto i to orua porotarama te hoê mea apî ta orua e au ra? Ta oe fa, ia rave i te taime no orua noa. E nehenehe ïa orua e faatupu i te auhoaraa ei hoa faaipoipo, eiaha râ ei hoa piha.

   Aratairaa Bibilia: “Ia imi te taata tataitahi, eiaha i to ˈna iho maitai, i to vetahi ê râ.”—Korinetia 1, 10:24.

•   A tamau i te faaite i te mau peu maitai te tahi i te tahi. E ere no te mea ua faaipoipo-maoro-hia orua, te auraa ïa e eita e titauhia faahou ia orua ia faaite i te mau peu maitai. A paraparau i to oe hoa faaipoipo ma te tura e a faaite i te mau peu maitai ta oe i faaite i te taime i haamatau na orua te tahi i te tahi. A parau, “Ee” e “Mauruuru.” A faaite tamau i to oe here, to oe mauruuru no te mau ohipa ta to oe hoa faaipoipo e rave ra no oe.

   Aratairaa Bibilia: “Ia hamani maitai râ outou te tahi i te tahi, ma te aumihi î i te here.”—Ephesia 4:32.

•   A haamanaˈo i te mau taime oaoa. A hiˈo na e to oe hoa faaipoipo i te mau hohoˈa o to orua faaipoiporaa aore ra i te mau hohoˈa o te tahi atu mau taime oaoa. Ia na reira orua, e puai atu â te here e te tura i roto i to orua faaipoiporaa.

   Aratairaa Bibilia: “Ia here te tane faaipoipo tataitahi i rotopu ia outou i ta ˈna vahine mai ta ˈna e here ia ˈna iho. Area te vahine faaipoipo ra, ia faatura maite ïa i ta ˈna tane e tia ˈi.”—Ephesia 5:33.