I roto e rave rahi papai a te mau Ite no Iehova, e tuu-atoa-hia te mau hohoˈa e te ǔ nehenehe mau. Aita râ i na reira-noa-hia na mua ˈˈe. Aita hoê aˈe hohoˈa i roto i te vea matamua o Te Pare Tiairaa (parauhia na Le Phare de la Tour de Sion) piahia i 1879. A tau ahuru matahiti aˈenei, ua rahi aˈe te parau i te hohoˈa i roto i ta tatou mau papai. I te tahi noa hoi taime e itehia ˈi hoê faahohoˈaraa aore ra hohoˈa patahia e te ǔ ereere e uouo.

I teie nei, mea rahi te hohoˈa i roto i ta tatou mau papai. Na to tatou mau taeae peni e pata hohoˈa e hamani i te rahiraa o te reira, oia atoa te mau faahohoˈaraa e rave rahi tei tuuhia i roto i te mau papai neneihia e tei nia i teie reni natirara. Ma te haapao maitai i ta ratou ohipa e ma te rave i te mau maimiraa, e nehenehe e hamani i te hohoˈa e horoa i te mau haapapuraa faufaa i te pae o te tuatapaparaa e e haapii i te pue parau mau Bibilia.

A hiˈo na i teie hohoˈa, ua tuuhia te reira i roto i te pene 19 o te buka ‘Rends pleinement témoignage au sujet du Royaume de Dieu.’ Te faaite ra tera hohoˈa i te ohipa i tupu i te oire tahito i Korinetia. Mai tei faaitehia i te pene 18 o te buka Ohipa, tei mua te aposetolo Paulo i te tiripuna. Maoti te mau maimiraa i noaa mai i te pae o te ihipǎpǎ, ua ite te taeae peni hohoˈa mai te aha te huru e te ǔ o te mau paturaa i hamanihia e te maremora i te vahi paha i tia ˈi Paulo i mua ia Galio. Te itehia ra tera tiaau tiaraa teitei i ropu i te hohoˈa. No te faaite i te ahu o te tiaau Galio, ua rave-atoa-hia te mau maimiraa no nia i te ahu o te feia no Roma i te senekele matamua. E piti ïa ahu to ˈna, hoê i roto mai e te tahi atu na rapae e hiti vareau to nia iho. E tiaa parauhia calcei atoa to ˈna. Ia au i te mau maimiraa, a tia ˈi i te tiripuna, e au e mea fariu Galio i te pae apatoerau tooa o te râ. Ua haapao te taeae i te reira no te ite i te maramarama e titauhia no te peni i tera faahohoˈaraa.

Ua faanaho matou i te mau hohoˈa e maimiraa tei ravehia ia nehenehe te reira ia faaohipa-faahou-hia. A tau matahiti i teie nei, ia au i te papai i faaite i te reira, e tuu matou i te mau hohoˈa e faahohoˈaraa i roto i te mau vehî rahi. E faanahohia te mau hohoˈa ia au i te mau tumu parau. A rahi noa ˈi te reira, mea fifi roa ia imi aore ra ia faaohipa faahou i te tahi hohoˈa.

I 1991, ua oti te hamaniraa o te tahi ravea maimiraa roro uira e tano i ta matou ohipa (Image Services System). Ua hau atu 440 000 hohoˈa tei faanahohia ma tera ravea. Taa ê noa ˈtu i te mau hohoˈa i matara ê na i roto i ta tatou mau papai, ua tuu-atoa-hia tau tausani hohoˈa i roto no te faaohipa i roto i te mau papai apî.

Ma tera ravea, e ite-atoa-hia te tahi atu mau haamaramaramaraa. Inafea e roto teihea papai i matara ˈi tera e tera hohoˈa, te iˈoa o te mau taata atoa i nia i te hohoˈa, te faaite ra te reira i teihea tau aore ra matahiti. Mea ohie ia imi i te hohoˈa e tano ia faaineinehia te tahi papai apî.

I te tahi taime, e ani matou i te parau faatia no te tahi mau hohoˈa taa maitai. No te tahi tumu parau i roto i te A ara mai na!, peneiaˈe e titauhia hoê hohoˈa e faaite ra i te tapea e haaati ra i te paraneta Saturne. E imi to tatou mau taeae i te hohoˈa e tano, oia atoa te fatu o te reira no te ani i ta ˈna parau faatia. No to ratou ite i ta tatou ohipa haapiiraa Bibilia na te ao, e horoa mai vetahi i te parau faatia ma te tamoni ore. No te tahi atu, e titau mai ratou ia aufau i te tahi tino moni aore ra ia tuu hoê faaiteraa o ratou te fatu o te hohoˈa. Ia noaa mai te parau faatia, e faaohipahia te hohoˈa i roto i te papai e e faanahohia te reira i roto i ta tatou ravea maimiraa roro uira.

I teie mahana, te vai ra vetahi papai, e rahiraa hohoˈa anaˈe to roto. I nia i teie reni, ua faaitehia te mau hohoˈa o te mau aamu Bibilia. E hohoˈa nehenehe mau to roto i te mau buka rairai neneihia e tei tuuhia i nia i te reni, mai te papai Faaroo i te Atua o te faaite i te mau haapiiraa faufaa mau ma te tahi noa mau parau. Ua haafaufaahia te Bibilia i roto i te taatoaraa o teie mau papai neneihia, oia atoa te mau mea atoa i tuuhia i nia i te reni natirara.