E mirioni taata tariˈa turi te ora nei i te mau motu heeuri no Initonetia. No te tauturu ia ratou, ua faaineine te mau Ite no Iehova i te mau video e haapiiraa rau niuhia i nia i te Bibilia na roto i te reo apǎraa rima Initonetia. E ua haapopouhia ta ratou mau tutavaraa.

I 2016, ua faanaho te mau Ite no Iehova i te hoê tairururaa na roto i te reo apǎraa rima Initonetia i Medan, Sumatra apatoerau. Ua haere atu te hoê tia mana i te tairururaa e ua haapopou i te mau Ite no Iehova no te haapiiraa i te taata ma te tamoni ore. Ua putapû roa o ˈna i ta ˈna i ite e ua apiti i te himene ma te apǎ atoa i te rima mai te tahi atu.

Ua parau te taata haapao i te vahi tairururaa: “Ua tere maitai te reira e aita i peapea aˈe. Maitai e e tamau noa te mau Ite no Iehova i te faanaho i tera mau tupuraa tamoni ore no te tauturu i to tatou feia tariˈa turi.” Ua parau atoa o ˈna e i to te fatu o te vahi tairururaa faarooraa e no te feia tariˈa turi teie tupuraa, “ua hinaaro o ˈna e rave i te tahi mea maitai no te Ite no Iehova. Ua faaue mai ïa o ˈna ia opere i te maa no tei tae mai,” e 300 ïa taata.

E haere atoa te mau Ite no Iehova e farerei i te feia tariˈa turi no te faaite i te poroi Bibilia. E faaohipa pinepine ratou i te mau video na roto i te reo apǎraa rima Initonetia. E tauturu hoi te reira i te taata ia fanaˈo i te hoê oraraa manuïa e te oaoa.

Teie te mau parau a Mahendra Teguh Priswanto, e mono faatere o te Taatiraa Initonetia no te maitai o te feia tariˈa turi i Semarang, i Java no ropu: “E nehenehe e haapopouhia te ohipa ta outou e rave ra no te feia tariˈa turi. Ei hiˈoraa, e tauturu maitai te video E nehenehe to utuafare e oaoa. A tamau noa te ohipa ta outou e rave ra.”

Ua putapû roa Yanti, e vahine tariˈa turi, i te mau tutavaraa a te mau Ite no Iehova. Te faataa nei oia: “E pinepine e faaooohia te feia tariˈa turi. Area te mau Ite no Iehova, te faaite nei ratou i te here. Mea rahi te Ite no Iehova e ere i te tariˈa turi o te haapii nei i te reo apǎraa rima no te tauturu ia matou ia ite o vai te Atua poiete e ia maitai mai to matou oraraa. Putapû roa vau i ta ratou mau tutavaraa haavare ore.”

Ua riro mai Yanti ei Ite no Iehova e e mero o ˈna no te hoê pǔpǔ huri o te ohipa nei i nia i te mau video apǎraa rima Initonetia. Te na ô nei oia: “Te tauturu nei te reira i te feia tei ore i ite maitai i te reo apǎraa rima ia aravihi mai. E te haapii atoa nei i te taata ia fanaˈo i te hoê oraraa oaoa e te faufaa.”