5 NO TITEMA 2023
PANIORA
Faaiteiteraa a te mau Ite no Iehova “Tapeahia no to ratou tiaraa amui ore” i Paniora
Te feia mataitai e arataihia i te fare auri La Modelo
I te 14 no Atopa tae atu i te 16 no Titema 2023, ua faatupuhia te hoê faaiteiteraa “Tapeahia no to ratou tiaraa amui ore” i te fare auri La Modelo, i teie nei e fare manaha ïa i Barcelone i Paniora. E maha vahi o te horoa ra i te mau haamaramaramaraa no te feia e haere mai e mataitai, e te vai atoa ra te mau tia mana e te mau orometua. Ua faahiahia roa ratou i te faaroo ta te feia apî Ite no Iehova i faaite ma te tapea i to ratou tiaraa amui ore Kerisetiano.
Te faatia ra teie faaiteiteraa i te aamu o te mau taeae i Paniora, ua tapeahia ratou i 1930, no te mea ua faaoti ratou eiaha e rave i te tau faehau. I te roaraa o te matahiti 1960 e te 1970, ua tapeahia fatata 1 000 taeae. I rotopu ia ratou, e 40 tei tapeahia i La Modelo.
Te mau hohoˈa o te faaiteiteraa no tei tapea i to ratou tiaraa amui ore
Te faaite ra teie faaiteiteraa no te aha aita te mau Ite no Iehova e rave i te tau faehau no ta ratou tiaturiraa e eaha ta teie mau Ite apî i ora i roto i te fare auri. Maoti te itoito ta te mau taeae i faaite e rave rahi matahiti i te maoro, ua faaoti te faatereraa no Paniora i 1984, e tiaraa to ratou e maiti eiaha e rave i te tau faehau no ta ratou tiaturiraa.
Ua titau-manihini-hia te orometua tuatapapa o Miguel Ángel Plaza o tei omua i te faaiteiteraa. Ua paraparau rahi oia no te mau Ite no Iehova tei tapeahia i La Modelo. A paraparau ai no nia i tera tupuraa, ua tapao o ˈna: “Aita ratou i faaino noa ˈˈe no te mau mea ta ratou i ora i La Modelo e no nia atoa i te mau tiai. E mata ataata to ratou a faatia ˈi no nia i to ratou tupuraa.” Tei ǒ atoa o taeae Fernando Trepat hoê o te mau Ite no Iehova tei tapeahia i La Modelo. Ua na ô oia: “I teie nei, ua hau atu i te 50 matahiti i muri iho, ua papu ia ˈu e ua tauturu mai te mau aratairaa Bibilia ia rave i te faaotiraa maitai. E na reira faahou vau i teie mahana.”
Te na ô ra te taeae David Báidez, tei faanaho i teie tupuraa: “Noa ˈtu te faatia ra teie faaiteiteraa i te aamu o teie vahi, te tupu atoa ra te reira i teie mahana. I teie tau, 200 Ite no Iehova no e rave rau fenua tei tapeahia no ta ratou tiaturiraa.”
E rave rahi mau taeae e tuahine tei aratai i te faaiteiteraa La Modelo
Ua faahiahia matou i te taiva ore e te faaoromai tamau ta te mau taeae no Paniora i faaite e rave rahi matahiti i te maoro. E e tamau matou i te pure no tei tapeahia no to ratou faaroo i teie mahana.—Hebera 13:3.
E au atoa outou . . .
FAATIARAA
E pare o tei tamata i to ratou faaroo
Tau hanere Ite no Iehova tei tapeahia i roto i te hoê pare i Paniora no te mea aita to ratou manaˈo haava i farii ia rave i te tau faehau.