A 35 senekele i teie nei, hou a tomo ai te nunaa Iseraela i roto i te fenua tǎpǔhia, ua parau te Atua e e paruru o ˈna ia ratou i “te mau maˈi ino mau” ta ratou i ite i Aiphiti. (Deuteronomi 7:15) Hoê ravea ta ˈna i faaohipa, o te horoaraa ïa i te mau aratairaa taa maitai i te pae o te ea e te vai-mâ-raa. Ei hiˈoraa:

•   Ia au i te mau ture horoahia, ua titauhia i te nunaa ia hopu i te pape e ia horoi i to ratou mau ahu.—Levitiko 15:4-27.

•   No nia i te faarueraa tutae taata, ua na ô te Atua: “E faataahia te tahi vahi moˈemoˈe i rapae i te puhapa, e i reira oe e haere ai. Ei ope nainai atoa to roto i ta oe mau mauhaa. Ia parahi oe no te haumiti i rapae, e ô oe i te hoê apoo i te ope nainai e e tapoˈi oe i to oe tutae.”—Deuteronomi 23:12, 13.

•   Ia manaˈohia e maˈi pee to te tahi taata, ua titauhia ia faataa ê ia ˈna maa taime i te toea o te nunaa. Hou a hoˈi ai i roto i te puhapa, ua titauhia i te taata tei ora mai i to ˈna maˈi, ia horoi i to ˈna mau ahu e ia hopu i te pape. I tera noa taime i nehenehe ai e parau e mea “viivii ore” o ˈna.—Levitiko 14:8, 9.

•   No te taata tei tapea i te hoê tino pohe, e faataa-ê-hia ïa o ˈna i te toea o te nunaa.—Levitiko 5:2, 3; Numera 19:16.

 To mua roa te mau ture a to Iseraela i te pae o te rapaauraa e te vai-mâ-raa.

 Mea ino roa râ te mau ture no nia i te vai-mâ-raa a te tahi atu mau fenua. Ei hiˈoraa:

•   E faarue ratou i te mau pehu i nia i te eˈa. No te mea ua viivii te pape e te maa, e rave rahi taata tei roohia i te maˈi e ua pohe atoa e rave rahi aiû.

•   Mea iti roa te ite o te mau taote i tahito ra no nia i te mau tirotiro aore ra te mau mea atoa e faatupu i te maˈi. E parau to Aiphiti e e nehenehe te taata e rapaauhia i te toto moo, te tutae kata, te iore pohe, te omaha e te faraoa ninaemoa. Pinepine atoa ratou i te faaohipa i te tutae taata aore ra animara i roto i ta ratou huru rapaauraa.

•   I tahito ra, ua maˈihia to Aiphiti no te mea ua viiviihia te pape o te anavai Nile e te mau faataheraa pape ta ratou i ô. Hau atu, e rave rahi tamarii i Aiphiti tei pohe no te maˈi hî e no te mea ua viiviihia te maa.

 I te tahi aˈe pae, mea maitai aˈe te ea o to Iseraela ia faaauhia i to te tahi atu mau nunaa, no te mea ua pee noa ratou i te mau ture haamauhia e te Atua.