Ieremia 29:1-32
29 Teie te mau parau o te rata ta Ieremia te peropheta i hapono mai Ierusalema mai i te mau matahiapo i rotopu i te feia tei hopoi-ê-hia, te mau tahuˈa, te mau peropheta e te nunaa taatoa, ta Nebukanesa i hopoi ê mai Ierusalema i Babulonia,
2 i muri aˈe i to te arii Iekonia,+ te metua vahine o te arii,+ te mau tia mana, te huiarii o Iuda e o Ierusalema, te feia rimaî e te feia tupai auri* faarueraa mai ia Ierusalema.+
3 Ua hapono oia i te rata i te rima o Elasa te tamaiti a Saphana+ e o Gemaria te tamaiti a Hilikia, ta Zedekia+ te arii o Iuda i tono i Babulonia ia Nebukanesa ra te arii o Babulonia. Te na ô ra tera rata:
4 “Teie ta Iehova o te mau nuu,* te Atua o Iseraela, e parau ra i te feia atoa tei hopoi-ê-hia, ta ˈu i hopoi ê mai Ierusalema i Babulonia:
5 ‘A hamani i te fare e a parahi i roto. A tanu i te mau tumu raau maa hotu e a amu i to ratou maa hotu.
6 A rave i te vahine faaipoipo na outou e ei tamaiti e ei tamahine ta outou. A rave i te vahine faaipoipo na ta outou mau tamaiti e a faaipoipo i ta outou mau tamahine, ia fanau atoa mai ratou i te tamaiti e te tamahine. Ia rahi outou i reira, e eiaha ia iti mai.
7 E a faatupu i te hau o te oire i hopoi ê ai au ia outou, e a pure ia Iehova no ˈna, inaha i to ˈna hau e hau atoa ˈi outou.+
8 Teie hoi ta Iehova o te mau nuu, te Atua o Iseraela, e parau ra: “Eiaha outou e vare i ta outou mau peropheta e taata peu hiˈohiˈo i rotopu ia outou,+ e eiaha e faaroo i te mau moemoeâ ta ratou e moemoeâ ra.
9 Inaha ‘e haavare ta ratou e tohu nei ia outou i to ˈu iˈoa. Aita vau i tono ia ratou,’+ te parau ra Iehova.”’”
10 “Teie hoi ta Iehova e parau ra: ‘Ua hope anaˈe e 70 matahiti i Babulonia, e haapao vau ia outou,+ e e faatupu vau i ta ˈu parau fafau a faahoˈi mai ai ia outou i teie vahi.’+
11 “‘Ua ite maitai hoi au i te mau manaˈo ta ˈu e manaˈo ra no outou,’ te parau ra Iehova, ‘e manaˈo hau, e ere i te manaˈo ati,+ no te horoa ˈtu i te tahi oraraa no a muri aˈe e te tahi tiaturiraa.+
12 E e pii e e pure mai outou ia ˈu, e e faaroo vau ia outou.’+
13 “‘E imi outou ia ˈu e e itehia vau e outou,+ ma to outou aau atoa hoi e imi ai outou ia ˈu.+
14 E vaiiho vau ia outou ia ite mai ia ˈu,’+ te parau ra Iehova. ‘E haaputuputu vau i to outou mau tîtî e e amui au ia outou pauroa mai roto mai i te mau nunaa e vahi atoa i haapurara ˈi au ia outou,’+ te parau ra Iehova. ‘E e faahoˈi mai au ia outou i te vahi mai reira vau i te hopoi-ê-raa ia outou.’+
15 “Ua parau râ outou: ‘Ua horoa mai Iehova i te peropheta na tatou i Babulonia.’
16 “Teie hoi ta Iehova e parau ra i te arii e parahi ra i nia i te terono o Davida+ e i te feia atoa e faaea ra i roto i teie oire, to outou mau taeae aita i hopoi-ê-hia na muri ia outou:
17 ‘Teie ta Iehova o te mau nuu e parau ra: “Teie au e faatae nei i nia ia ratou i te ˈoˈe, te oˈe e te maˈi pee,*+ e e faariro vau ia ratou mai te suke pê,* mea ino roa eita e nehenehe e amu.”’+
18 “‘E e aˈuaˈu vau ia ratou i te ˈoˈe,+ te oˈe e te maˈi pee, e e faariro vau ia ratou ei riariaraa no te mau faatereraa arii atoa o te fenua nei, ei ati,+ ei maereraa, ei hioraa faaooo,+ e ei faainoraa i rotopu i te mau nunaa atoa e haapurara ˈi au ia ratou,+
19 no te mea aita ratou i faaroo i ta ˈu mau parau i faatae ia ratou na roto i ta ˈu mau tavini te mau peropheta,’ te parau ra Iehova, ‘a tono noa ˈi au ia ratou.’*+
“‘Aita râ outou i faaroo,’+ te parau ra Iehova.
20 “No reira, a faaroo i te parau a Iehova, outou pauroa tei hopoi-ê-hia, ta ˈu i hopoi mai Ierusalema i Babulonia.
21 Teie ta Iehova o te mau nuu, te Atua o Iseraela, e parau ra no Ahaba te tamaiti a Kolaia e no Zedekia te tamaiti a Maaseia, o te tohu nei i te haavare ia outou i to ˈu iˈoa:+ ‘Teie au e tuu nei ia raua i te rima o Nebukanesa te arii o Babulonia, e e haapohe oia ia raua i mua i to outou mata.
22 E e riro te ati ta raua e faaruru ei parau faainoraa i rotopu i to Iuda atoa tei hopoi-ê-hia i Babulonia, o te na ô: “Ia faariro Iehova ia oe mai ia Zedekia e mai ia Ahaba, ta te arii o Babulonia i tunu paa i te auahi!”
23 E ohipa haama hoi ta raua i rave i Iseraela,+ ua faaturi raua i te mau vahine faaipoipo a to raua mau taata tupu e ua parau i te haavare i to ˈu iˈoa, aita hoi au i faaue i te reira.+
“‘“Ua ite au i ta raua i rave, e ua ite mata vau i te reira,”+ te parau ra Iehova.’”
24 “E e parau oe ia Semaia+ no Nehelama:
25 ‘Teie ta Iehova o te mau nuu, te Atua o Iseraela, e parau ra: “No te mea ua hapono oe i to Ierusalema taatoa, ia Zephania+ te tamaiti a Maaseia, te tahuˈa, e i te mau tahuˈa atoa, i te rata i to oe iˈoa e na ô ra:
26 ‘Ua faatoroa Iehova ia oe ei tahuˈa eiaha râ ia Iehoiada te tahuˈa ei tiaau o te fare o Iehova, e na oe e haapao i te maamaa o te haa mai te hoê peropheta, a haamau ai ia ˈna i roto i te raau tapearaa e te fifi arapoa auri.+
27 Eaha ïa oe i ore ai i tamaˈi ia Ieremia no Anatota,+ e haa ra mai te hoê peropheta i rotopu ia outou?+
28 Ua faatae atoa mai oia i te poroi ia matou ra i Babulonia, e na ô ra: “E maoro te reira! A hamani i te fare e a parahi i roto. A tanu i te mau tumu raau maa hotu e a amu i to ratou maa hotu,+ . . . ”’”’”
29 I to Zephania+ te tahuˈa taioraa i tera rata ia Ieremia te peropheta,
30 tae maira te parau a Iehova ia Ieremia e na ô ra:
31 “A hapono i teie poroi i te feia atoa tei hopoi-ê-hia: ‘Teie ta Iehova e parau ra no nia ia Semaia no Nehelama: “No te mea ua tohu Semaia ia outou, aita hoi au i tono ia ˈna, e ua tamata oia i te turai ia outou ia tiaturi i te haavare,+
32 teie ïa ta Iehova e parau ra: ‘Teie au e haapao nei ia Semaia no Nehelama e to ˈna huaai. Aita hoê o to ˈna huaai e ora ˈtu i rotopu i teie nunaa, e eita oia e ite i te maitai ta ˈu e rave no to ˈu nunaa,’ te parau ra Iehova, ‘ua turai hoi oia i te taata ia orure hau ia Iehova.’”’”
Nota i raro i te api
^ Huri-atoa-hia “feia hamani patu paruru.”
^ Aore ra “sabaota.”
^ Huri-atoa-hia “perehu.”
^ Aore ra “maˈi.”
^ Heb: “a tia ˈi au i te poipoi roa e a tono atu ai.”
