Isaia 41:1-29
41 “A faaroo mai ia ˈu a mamû noa ˈi,* outou te mau motu.Ia puai faahou te mau nunaa.
Ia tapiri mai ratou, i reira ratou e paraparau ai.+
Ia haere mai tatou pauroa no te haavaraa.
2 Na vai i titau i te hoê aito no te hitiraa mai o te mahana,*+A pii mai ai ia ˈna i to ˈna pae avae* ma te parau-tia,No te tuu i te mau nunaa ia ˈnaE no te faaauraro i te mau arii ia ˈna?+
Na vai e faariro ia ratou ei repo puehu i mua i ta ˈna ˈoˈe,Mai te sitona mǎrô puhihia i te mataˈi i mua i ta ˈna fana?
3 E aˈuaˈu oia ia ratou, a haere ai ma te haafifi-ore-hiaI nia i te mau eˈa ta to ˈna avae i ore i haere aˈenei.
4 O vai tei na reira na e tei rave i te reira,A titau ai i te mau uˈi mai te haamataraa mai?
O vau, o Iehova, te Atua mai te haamataraa mai,+E oia atoa i te mau uˈi hopea ra, o vau â te Atua.”+
5 Ua ite te mau motu i te reira e ua mǎtaˈu.
Rûrû aˈera te feia e ora ra i te hopea o te fenua.
E tapiri mai e e haere mai ratou.
6 E tauturu te taata tataitahi i to ˈna hoaE e parau i to ˈna taeae: “Ia puai oe.”
7 E faaitoito ïa te rimaî i te taata tupai auri.+E faaitoito te taata e haamanina maoti ta ˈna hamaraI te taata e tupai ra i nia i te tupairaa auri.
E parau oia no te tapiriraa tapau: “Mea maitai.”
I reira e tamauhia te tii i te naero ia ore ia marua.
8 “O oe râ, e Iseraela, ta ˈu tavini,+O oe, e Iakoba, ta ˈu i maiti,+Te huaai o to ˈu hoa o Aberahama,+
9 O oe, o ta ˈu i rave mai te hopea mai o te fenua,+E o oe, o ta ˈu i pii mai te mau vahi atea roa ˈˈe.
Ua parau vau ia oe: ‘O oe ta ˈu tavini.+Ua maiti au ia oe. Aita vau i faarue ia oe.+
10 Eiaha e mǎtaˈu, tei pihai iho hoi au ia oe.+
Eiaha e haapeapea, o vau hoi to oe Atua.+
E haapuai au ia oe, oia mau, e tauturu vau ia oe,+E mau iho â oe ia ˈu i to ˈu rima atau parau-tia.’
11 Inaha, e haama e e faahaamahia te taata atoa e riri ia oe.+
E pohe e e haamouhia te feia e aro ia oe.+
12 E imi oe i te feia e taputô ia oe, eita râ oe e ite mai ia ratou.E riro te feia e tamaˈi ia oe mai te huru ra aita ratou, ei mea faufaa ore.+
13 Te haru nei hoi au, o Iehova to oe Atua, i to oe rima atau.O vau te parau nei ia oe: ‘Eiaha e mǎtaˈu. E tauturu vau ia oe.’+
14 Eiaha e mǎtaˈu, e tera ra toˈe* e Iakoba,+E Iseraela, e tauturu vau ia oe,” te parau ra Iehova, Tei hoo mai ia oe,+ Tei Moˈa o Iseraela.
15 Inaha, ua faariro vau ia oe ei mauhaa no te faataa i te huero maa i to ˈna tumu,+Ei mauhaa apî oi no te faataa i te huero maa i to ˈna tumu.
E taataahi oe i te mau mouˈa, e haaperehu oe i te reiraE e faariro oe i te mau aivi mai te ota.
16 E hue oe ia ratou i nia,E e pee ratou i te mataˈi.E purara ratou i te mataˈi vero.
E oaoa oe ia Iehova,+E e haapeu oe i Tei Moˈa o Iseraela.”+
17 “Te taata veve e tei ere ra, te imi ra ïa i te pape, aita hoê aˈe râ.
Ua mǎrô to ratou arero no te poihâ.+
O vau, o Iehova, te pahono ia ratou.+
Eita vau, te Atua o Iseraela, e faarue ia ratou.+
18 E faatahe au i te anavai na te mau aivi ruperupe ore+E te pape pihaa i te mau peho.+
E faariro vau i te medebara ei pape hopuna î i te opaeroE te fenua pape ore ei pape pihaa.+
19 I roto i te medebara, e tanu vau i te tumu arezi,Te tumu sitima e te tumu hedesa e te tumu paina.+
I te vahi papu pâpâmǎrô, e tanu vau i te tumu berusiHoê â tanuraa e te tumu tedara e te tumu tasura,+
20 Ia hiˈo mai te taata atoa e ia iteE ia haapao mai e ia taa ia ratouNa te rima o Iehova i rave i te reira,E na Tei Moˈa o Iseraela i poiete i te reira.”+
21 “A faaite mai i to outou tupuraa,” te parau ra Iehova.
“A tuu mai i ta outou mau parau haapapuraa,” te parau ra te arii o Iakoba.
22 “A tuu mai i te haapapuraa e a parau ia matou eaha te tupu.
A parau mai ia matou no nia i te mau mea tahito,*Ia feruri matou i te reira e ia ite i te hopearaa.
Aore ra a faaite ia matou i te mau mea e tupu.+
23 A parau mai ia matou eaha te tupu a muri aˈe,Ia nehenehe matou e ite e atua outou.+
Oia mau, a rave i te tahi mea, mea maitai aore ra mea ino,Ia maere matou a ite ai i te reira.+
24 Inaha, aita outou,E mea faufaa ore ta outou ohipa.+
Mea hairiiri te taata atoa e maiti ia outou.+
25 Ua titau vau i te tahi taata no apatoerau mai e e haere mai oia,+Hoê taata no te hitiraa mai o te mahana*+ e e tiaoro oia i to ˈu iˈoa.
E taataahi oia i te feia faatere* mai te huru ra e araea ratou,+Mai te potera e taataahi i te araea rarirari.
26 O vai tei parau mai i te reira mai te haamataraa mai, ia ite tatou,Aore ra mai tahito mai â, ia parau tatou: ‘Ua tano oia’?+
Inaha, aita hoê i poroi i te reira!
Aita hoê i faaite i te reira!
Aita i faaroohia aˈenei te tahi mea ia outou!”+
27 O vau na mua tei parau ia Ziona: “Inaha, to ǒ nei ratou!”+
E e tono vau i te hopoi parau apî oaoa i Ierusalema.+
28 Ua tamau râ vau i te hiˈo, e aita hoê aˈe taata.Aita hoê i rotopu ia ratou no te horoa mai i te aˈoraa.
E ua ani noa vau ia ratou ia pahono mai.
29 Inaha, e moemoeâ anaˈe ratou.
Mea faufaa ore ta ratou ohipa.
E mataˈi ta ratou mau tii faatôhia,* e mea faufaa ore.+
Nota i raro i te api
^ Aore ra “A mamû noa i mua ia ˈu.”
^ Aore ra “no hitia o te râ mai.”
^ Oia hoi no te tavini ia ˈna.
^ Oia hoi e taata haihai eita e haere ia ˈna ia paruru ia ˈna.
^ Heb: “matamua.”
^ Aore ra “no hitia o te râ mai.”
^ Aore ra “huitoofa.”
^ Aore ra “faatahehia.”
