Levitiko 5:1-19
5 “‘Ia ite mata, ia faaitehia mai aore ra ia faarooroo te hoê taata no nia i te tahi hara tei ravehia,*+ ua hara ïa taua taata ra ia ore oia ia faaite i ta ˈna i ite ua ani-anaˈe-hia te nunaa e faaite o vai tei hara, e e faautuahia oia no ta ˈna hape.
2 “‘Aore ra ia tapea te hoê taata i te tahi mea viivii, te tino pohe anei o te hoê animara oviri viivii, o te hoê animara rata viivii, aore ra o te hoê animara viivii o te aere,+ ua viivii ïa o ˈna, a hapa ˈtu ai noa ˈtu e aita oia i ite.
3 Aore ra ia tapea noa ˈtu te tahi ma te ite ore i te mea viivii o te hoê taata,+ te mau mea atoa e viivii ai oia, a ite atu ai oia i te reira i muri iho, ua hapa ïa oia.
4 “‘Aore ra ia ru te hoê taata i te horeo e rave i te tahi mea, e rave anei i te maitai aore ra e rave i te ino, noa ˈtu eaha taua mea ra, e taa ihora râ ia ˈna i muri iho e ua ru oia i te horeo, ua hapa ïa oia.*+
5 “‘Ia hapa oia i te hoê o teie mau mea, e faˈi oia+ i te aha o ˈna i hara ˈi.
6 E hopoi atoa mai oia i ta ˈna tusia no te hapa ia Iehova no te hara ta ˈna i rave,+ oia hoi te hoê fanauˈa mamoe ufa aore ra te hoê puaaniho ufa apî no roto i te nǎnǎ, ei tusia no te hara. E pûpû te tahuˈa i te tusia faahau* no te tapoˈi i ta ˈna hara.
7 “‘Ia ore râ e pee ia ˈna hoê mamoe, e hopoi mai oia ia Iehova e piti uupa aore ra e piti uuairao apî+ ei tusia no te hapa na ˈna no te hara, hoê no te tusia no te hara e hoê no te tusia taauahi.+
8 E hopoi mai oia i te reira i te tahuˈa, o te rave na mua i te manu no te tusia no te hara, a ofati atu ai i to ˈna afii i to ˈna aˈî, ma te ore e faataa ê roa.
9 E pîpî oia maa toto o te tusia no te hara i te pae fata, area te toea o te toto, e faatahehia ïa i te raroraa o te fata.+ E tusia ïa no te hara.
10 E pûpû oia i te tahi atu manu ei tusia taauahi ia au i te raveraa titauhia,+ e e pûpû te tahuˈa i te tusia faahau no te tapoˈi i te hara ta ˈna i rave e e faaorehia ta ˈna hara.+
11 “‘Ia ore râ e pee ia ˈna e piti uupa aore ra e piti uuairao apî, ia hopoi mai ïa oia ei tusia na ˈna no ta ˈna hara hoê tuhaa i nia ahuru o te hoê epha*+ faraoa ota oro-maitai-hia ei tusia no te hara. Eiaha oia e anoi i te hinu i roto aore ra e tuu i te tapau libano i nia iho, e tusia hoi te reira no te hara.
12 E hopoi mai oia i te reira i te tahuˈa, e e rave te tahuˈa i te reira ia î to ˈna rima ei tusia taipe,* a tutui atu ai ia au auahi i nia i te fata na nia iho i te mau tusia pûpûhia ia Iehova na roto i te auahi. E tusia ïa no te hara.
13 E pûpû te tahuˈa i te tusia faahau no te tapoˈi i te hara ta ˈna i rave, hoê o teie mau hara, e e faaorehia ta ˈna hara.+ E riro te toea o te tusia na te tahuˈa,+ mai to te tusia huero maa.’”+
14 Paraparau noa maira Iehova ia Mose, a na ô ai:
15 “Ia taiva te hoê taata a hara ˈi ma te opua ore i te mau mea moˈa a Iehova,+ ia hopoi mai ïa oia ia Iehova i te hoê mamoe oni oraora maitai no roto i te nǎnǎ ei tusia no te hapa,+ ua faataahia to ˈna hoo ei sekela* ario ia au i te sekela o te vahi moˈa.*+
16 E horoa oia i te tahi faahoˈiraa no to ˈna hararaa i te vahi moˈa e e horoa atoa mai oia hoê tuhaa i nia e pae o to ˈna hoo.+ E horoa oia i te reira i te tahuˈa, ia nehenehe te tahuˈa e pûpû i te tusia faahau+ no ˈna i te mamoe oni o te tusia no te hapa e e faaorehia ta ˈna hara.+
17 “Ia hara te hoê taata i te raveraa i ta Iehova i faaue eiaha e rave, noa ˈtu e aita oia i ite, ua hapa noa â oia e e faautuahia o ˈna no ta ˈna hape.+
18 E hopoi mai oia i te tahuˈa i te hoê mamoe oni oraora maitai no roto i te nǎnǎ ia au i te hoo faataahia, ei tusia no te hapa.+ I muri iho e pûpû te tahuˈa i te tusia faahau no ˈna no te hape opua ore ta ˈna i rave ma te ite ore e e faaorehia ta ˈna hara.
19 E tusia ïa no te hapa. Ua hapa mau â oia i te hararaa ia Iehova.”
Nota i raro i te api
^ Heb: “reo faautuaraa (horeo).” E faaararaa paha i te hoê hara apitihia e te hoê faautuaraa i tei rave i te hara aore ra tei ite i taua hara ra aita râ i faaite.
^ E au ra e aita oia i haapao i ta ˈna horeo.
^ 1/10 epha: 2,2 L. Hiˈo i te tuhaa hau B14.
^ Aore ra “ei tuhaa (taipe) haamanaˈoraa o te reira.”
^ 1 sekela: 11,4 g. Hiˈo i te tuhaa hau B14.
^ Aore ra “sekela moˈa.”
