Maseli 14:1-35
14 E patu te vahine haapao maitai mau i to ˈna fare,+Na te rima râ o te vahine maamaa e vavahi i to ˈna.
2 Te mǎtaˈu ra te taata haerea afaro ia Iehova,Te vahavaha ra râ te taata haerea tioioi* ia ˈna.
3 Tei roto te raau o te teoteo i te vaha o te maamaa,E paruru râ te vaha o te taata feruriraa paari ia ˈna.
4 I te vahi aita e puaatoro, mea mâ te vairaa maa,Tei te puai râ o te puaatoro oni e rahi ai te ootiraa.
5 Eita te hoê ite haapao maitai e haavare,E haavare râ te ite haavare i te mau taime atoa.+
6 E imi te taata faaooo i te paari, eita râ oia e ite mai i te reira,E noaa ohie noa râ te ite i te taata maramarama.+
7 A faaatea ê mai i te maamaa,Eita hoi oe e ite mai i te ite i nia i to ˈna utu.+
8 Ma te paari, ua ite te taata feruriraa haroˈaroˈa eaha te eˈa ta ˈna e haere ra,E vare râ te maamaa* i to ratou maamaa.+
9 E ata te maamaa i ta ratou hapa,*+I rotopu râ i te feia afaro, e hinaaro ratou e faatupu i te hau.*
10 Ua ite te aau i to ˈna hepohepo,E aita e taata e nehenehe e apiti i to ˈna oaoa.
11 E haamouhia te fare o te taata ino,+E ruperupe râ te fare ie o te taata afaro.
12 Te vai ra te tahi eˈa mea maitai i te manaˈo o te hoê taata,+I te hopea râ, e aratai te reira i te pohe.+
13 E nehenehe atoa te aau e mauiui a ata noa ˈi,E e nehenehe te oaoa e taui ei oto.
14 E ooti te taata aau taivaiva i te faahopearaa o to ˈna haerea,+E ooti râ te taata maitai i te haamaitairaa no ta ˈna mau raveraa.+
15 E tiaturi te taata vare hanoa* i te mau parau atoa,E haapao maitai râ te taata feruriraa haroˈaroˈa i to ˈna mau taahiraa tataitahi.+
16 E haapao maitai te taata feruriraa paari e e fariu ê oia i te ino,Mea tâuˈa ore* râ te maamaa e e tiaturi rahi roa oia ia ˈna.
17 E ohipa maamaa ta te taata o te riri oioi,+E haehia râ te taata o te feruri maite i te hoê tupuraa.*
18 E maamaa te faufaa te tutuuhia na te taata vare hanoa,*O te ite râ te hei upoo o te taata feruriraa haroˈaroˈa.+
19 E piˈo te feia ohipa ino i mua i te feia maitai,E e piˈo te feia ino i te uputa o te feia parau-tia.
20 Mea hae na te taata te feia veve, na to ratou atoa mau taata tapiri,+Mea rahi râ te hoa o te taata taoˈa rahi.+
21 E hara te taata e vahavaha i to ˈna taata tupu,Te taata atoa râ e aumihi i te feia riirii, e oaoa ïa.+
22 Eita anei te feia opuaraa ino e patore?
Te feia râ e faaoti e rave i te maitai, e herehia ïa ma te taiva ore e e tiaturihia.+
23 E faufaa noa te noaa ia ravehia te mau huru ohipa rohirohi atoa,O te veve râ te hopearaa ia paraparau noa.+
24 Te hei upoo o te feia feruriraa paari, o ta ratou ïa faufaa.Te maamaa râ o te maamaa, o to ratou noa iho â ïa maamaa.+
25 E faaora mai te hoê ite mau i te taata,E haavare râ te hoê taata haavarevare i te mau taime atoa.
26 Te taata e mǎtaˈu ia Iehova, e tiaturi papu ïa ia ˈna,+E e riro taua mǎtaˈu ra ei haapuraa no ta ˈna mau tamarii.+
27 E puna ora te mǎtaˈuraa ia Iehova,No te fariu ê mai i te mau marei o te pohe.
28 O te hanahana o te arii ia rahi to ˈna nunaa,+Ua ati râ te hoê faatere aita to ˈna e taata.
29 E haroˈaroˈa rahi to te taata e ore e riri oioi,+Area te taata faaoromai ore, e faaite ïa i to ˈna maamaa.+
30 Te hoê aau horuhoru ore, e ora* ïa no te tino,E pê râ te ivi i te pohehae.+
31 Te taata e taviri i te taata riirii, te tuhi ra ïa i Tei hamani ia ˈna,+Te taata râ e aumihi i te taata veve, te faahanahana ra ïa ia ˈna.+
32 E hurihia te taata ino i raro i to ˈna ino,E riro râ te hapa ore o te taata parau-tia ei haapuraa no ˈna.+
33 E parahi hau noa te paari i roto i te aau o te taata maramarama,+I rotopu râ i te feia maamaa, e faaite te paari ia ˈna.
34 E faateiteihia te hoê nunaa i te parau-tia,+Mea haama râ te hara no te hoê nunaa.
35 E mauruuru te arii i te hoê tavini haerea haroˈaroˈa,+E riri rahi râ oia i te taata haerea haama.+
Nota i raro i te api
^ Aore ra “piˈo.”
^ Huri-atoa-hia “E haavare râ te maamaa ia vetahi ê.”
^ Aore ra “te faaafaroraa i te fifi.”
^ Aore ra “e aau tae to ratou.”
^ Aore ra “maˈua.”
^ Aore ra “iria.”
^ Aore ra “te taata mea aravihi ia feruri.”
^ Aore ra “maˈua.”
^ Aore ra “maitai.”
