Numera 20:1-29
20 I te avaˈe matamua, haere atura te amuiraa taatoa o te ati Iseraela i te medebara o Zîna, e parahi ihora te nunaa i Kadesa.+ I reira to Miriama+ poheraa e hunaraahia.
2 Aita râ e pape na te amuiraa,+ e putuputu aˈera ratou no te patoi ia Mose raua Aarona.
3 Mârô maira te nunaa ia Mose+ a na ô ai: “Ahiri iho â matou i pohe i te poheraa to matou mau taeae i mua ia Iehova!
4 Eaha orua i aratai ai i te amuiraa o Iehova i teie medebara ia pohe matou e ta matou mau animara?+
5 Eaha orua i aratai ai ia matou i rapae i Aiphiti i teie vahi e roohia ˈi te ati?+ E ere i te vahi no te ueue i te huero maa, no te tanu i te suke, te vine e te remuna, e aita e pape no te inu.”+
6 Haere aˈera Mose raua Aarona mai mua mai i te amuiraa i te tomoraa o te tiahapa o te amuiraa, tipapa ihora raua e fa maira to Iehova hanahana ia raua.+
7 Na ô maira Iehova ia Mose:
8 “A rave i te raau e a titau i te amuiraa taatoa, orua Aarona to tuaana, e a paraparau i te mato i mua i to ratou mata ia horoa mai oia i to ˈna pape, e e pahi te pape no roto i te mato ia oe, ta oe e horoa na te amuiraa e ta ratou mau animara ia inu.”+
9 Rave maira ïa Mose i te raau mai mua ia Iehova,+ mai ta ˈna iho â i faaue ia ˈna.
10 Titau aˈera Mose raua Aarona i te amuiraa taatoa i mua i te mato, e parau atura oia ia ratou: “A faaroo mai outou, orure hau ma! E haapahi mai anei mâua i te pape no roto i teie mato no outou?”+
11 I muri iho, amo atura Mose i to ˈna rima i nia e tairi atura i te mato e piti taime i ta ˈna raau, e pahi maira e rave rahi pape, e inu aˈera te amuiraa e ta ratou mau animara i te pape.+
12 I muri iho, na ô maira Iehova ia Mose raua Aarona: “No te mea aita orua i faatupu i te faaroo ia ˈu e aita orua i haamoˈa ia ˈu i mua i te mata o te nunaa o Iseraela, e ere na orua e aratai i teie amuiraa i te fenua ta ˈu e horoa no ratou.”+
13 O te pape o Meriba*+ teie, i reira te ati Iseraela i mârô ai ia Iehova, ia haamoˈahia oia i rotopu ia ratou.
14 Tono ihora Mose i te vea mai Kadesa ˈtu i te arii o Edoma:+ “Teie ta to oe taeae o Iseraela+ e parau ra: ‘Ua ite maitai oe i te mau ati atoa ta matou i faaruru.
15 Ua haere to matou mau tupuna i Aiphiti,+ ua parahi matou i Aiphiti e rave rahi matahiti,*+ e ua rave ino to Aiphiti ia matou e to matou mau tupuna.+
16 Tiaoro aˈera matou ia Iehova.+ Faaroo maira oia ia matou, tono maira i te hoê melahi+ e aratai maira ia matou i rapae i Aiphiti. E teie matou i Kadesa, hoê oire i te otia o to oe tuhaa fenua.
17 A vaiiho na ia matou ia haere na to oe fenua. Eita matou e na roto atu i te tahi faaapu aore ra faaapu vine, e eita matou e inu i te pape o te tahi apoo. E na nia matou i te purumu o te arii ma te ore e tipuu i te pae atau aore ra aui, e faarue roa ˈtu ai matou i to oe tuhaa fenua.’”+
18 Tera râ, na ô maira Edoma ia ˈna: “Eiaha oe e haere na to matou tuhaa fenua. Ia na reira oe, e haere mai au e farerei ia oe ma te ˈoˈe.”
19 Pahono atura te ati Iseraela ia ˈna: “Na te purumu rahi matou ia pauma, e ia inu noa ˈtu matou e ta matou mau animara i ta oe pape, e aufau matou i te reira.+ Aita ˈtu e mea ta matou e hinaaro, e haere avae+ noa râ na to oe tuhaa fenua.”
20 Na ô noa maira râ oia: “Eiaha oe e haere na to matou tuhaa fenua.”+ I muri iho, haere maira Edoma e patoi ia ˈna ma te nahoa rahi e te hoê nuu* puai.
21 Aita aˈera ïa Edoma i faatia ia Iseraela ia haere na to ˈna tuhaa fenua. Haere ê atura ïa Iseraela ia ˈna.+
22 Faareva aˈera te nunaa o Iseraela, te amuiraa taatoa, mai Kadesa ˈtu e haere aˈera i te mouˈa Hora.+
23 Na ô maira Iehova ia Mose raua Aarona i nia i te mouˈa Hora na te otia fenua o Edoma:
24 “E amuihia Aarona i to ˈna mau taata.*+ Eita oia e tomo i te fenua ta ˈu e horoa no te ati Iseraela, no te mea ua patoi orua e piti i ta ˈu faaueraa no nia i te pape i Meriba.+
25 A rave ia Aarona raua ta ˈna tamaiti o Eleazara, e a aratai ia raua i nia i te mouˈa Hora.
26 A tatara i to Aarona mau ahu+ e a faaahu ia Eleazara+ ta ˈna tamaiti i te reira, e e pohe Aarona* i reira.”
27 Rave ihora ïa Mose mai ta Iehova i faaue, e pauma aˈera ratou i te mouˈa Hora i mua i te mata o te amuiraa taatoa.
28 Tatara ihora Mose i to Aarona mau ahu e faaahu atura ia Eleazara ta ˈna tamaiti i te reira. I muri iho, pohe ihora Aarona i nia i te tupuai o te mouˈa.+ Pou maira Mose raua Eleazara mai nia mai i te mouˈa.
29 I to te amuiraa taatoa o Iseraela iteraa e ua pohe Aarona, oto aˈera ratou ia ˈna e 30 mahana.+
Nota i raro i te api
^ “Tamaˈiraa” te auraa.
^ Heb: “mahana.”
^ Heb: “rima.”
^ E parau pehepehe teie no te pohe.
^ Heb: “e amuihia Aarona e e pohe oia.”
