Te rata i to Philipi 4:1-23
4 No reira, to ˈu mau taeae ta ˈu e here e e ru nei i te ite atu, e oaoaraa e e hei upoo outou no ˈu,+ ia na reira noa outou i te mau papu+ i roto i te Fatu.
2 Te faaitoito nei au ia Euodia e te faaitoito nei au ia Sunetuhe e ei manaˈo hoê to raua i roto i te Fatu.+
3 Oia mau, e ani atoa vau ia oe, mai te hoê hoa ohipa mau, ia tamau i te tauturu i teie na vahine tei tutava* i pihai iho ia ˈu no te parau apî oaoa, e oia atoa ia Kalemeno e i te tahi atu o to ˈu mau hoa ohipa tei papaihia to ratou iˈoa i roto i te buka o te ora.+
4 A oaoa noa i roto i te Fatu. E parau atu â vau, a oaoa!+
5 Ia itehia to outou huru au noa+ e te taata atoa. Tei pihai iho nei te Fatu,
6 eiaha ïa e haapeapea noa ˈˈe,+ na roto râ i te pure e te taparuparuraa e te haamaitairaa, a faaite i ta outou mau aniraa i te Atua.+
7 E na te hau+ o te Atua, tei hau ê i te mau manaˈo atoa, e tiai i to outou aau+ e feruriraa na roto i te Mesia ra o Iesu.
8 Taeae ma, te mau mea e nehenehe e tiaturi, te mau mea tura, te mau mea tia, te mau mea viivii ore, te mau mea e faatupu i te here, te mau mea e au ia haapopouhia, te mau mea maitatai e te mau mea e au ia aruehia, a tamau noa i te haafaufaa* i teie mau mea atoa.+
9 Te mau mea ta outou i haapii mai, ta outou atoa i farii, i faaroo e i ite ia ˈu nei, a faaohipa i te reira,+ e ei pihai iho ïa te Atua o te hau ia outou.
10 E oaoa iti rahi to ˈu i roto i te Fatu, i te mea e te haapeapea faahou nei outou no ˈu.+ I haapeapea noa na hoi outou no ˈu, aita râ ta outou e ravea no te faaite mai.
11 Aita vau e na reira ra i te parau, no te mea te ere ra vau i te tahi mea, ua haapii hoi au i te mauruuru noa i te mea e vai ra ia ˈu i roto i te mau tupuraa atoa.+
12 Ua ite au e nafea ia ora i roto i te veve+ e i roto atoa i te fanaˈo. I te mau mea atoa e i roto i te mau tupuraa atoa, ua matau vau i te ora ma te paia e te poia atoa, ma te taoˈa rahi e te taoˈa ore atoa.
13 E puai to ˈu ia faaruru i te mau mea atoa maoti tei horoa mai i te puai.+
14 Tera râ, e ohipa maitai ta outou i te tautururaa mai ia ˈu a roohia ˈi au e te ati.
15 E ua ite maitai atoa outou, te mau taeae no Philipi, e i to outou haamataraa i te haapii i te parau apî oaoa, e ia ˈu i faarue ia Makedonia, aita hoê aˈe amuiraa i tauturu ia ˈu aore ra i farii i ta ˈu tauturu, o outou anaˈe râ.+
16 A parahi ai hoi au i Tesalonia, e ere hoê noa taime to outou tautururaa mai ia ˈu, e piti râ.
17 Aita vau e titau nei i te ô, te hinaaro nei râ vau ia rave outou i te maitai a apîhia ˈtu ai outou.
18 Tera râ, aita vau e ere nei i te tahi noa ˈˈe mea, e ua rahi roa atoa ta ˈu. Ua navai maitai, i te mea e ua faatae mai Epapherodito+ i ta outou i hapono mai, e au ïa i te hoê mea noˈanoˈa,+ te hoê tusia fariihia ta te Atua e mauruuru.
19 E na to ˈu ïa Atua e horoa rahi mai i te mau mea atoa e hinaaro-mau-hia e outou+ ia au i te rahi o to ˈna hanahana na roto i te Mesia ra o Iesu.
20 E teie nei, ei to tatou Atua e Metua te hanahana e a muri noa ˈtu. Amene.
21 A aroha maitai atu i te feia moˈa atoa i hoê e te Mesia ra o Iesu. Te aroha ˈtu nei te mau taeae i pihai iho ia ˈu.
22 Te aroha ˈtu nei te feia moˈa atoa, to te utuafare iho â râ o Kaisara.+
23 Ei ia outou te hamani maitai rahi o te Fatu ra o Iesu Mesia a faaite ai outou i te huru feruriraa tano.
