Te mau tavana 16:1-31
16 I te hoê mahana, haere ihora Samasona i Gaza, ite ihora i te tahi vahine taiata i reira, e tomo atura i ǒ ˈna.
2 Parauhia maira te ati Gaza: “Ua haere mai Samasona i ǒ nei.” Haaati aˈera ïa ratou ia ˈna e tamoemoe aˈera ia ˈna i te po taatoa i te uputa o te oire. Aita ratou i maniania aˈe i te po taatoa, a na ô ai ia ratou iho: “Ia ao, e haapohe tatou ia ˈna.”
3 Tera râ, ua taoto Samasona i reira tae roa i te tuiraa po. Tia aˈera oia i te tuiraa po. Haru ihora oia i na uputa o te oire e na piti pou e tatara ihora i te reira e te raau tarava atoa. Tuu ihora oia i te reira i nia i to ˈna tapono e amo atura i nia i te tupuai mouˈa i mua noa ia Heberona.
4 I muri aˈe, here roa ˈtura oia i te tahi vahine i te peho no Soreka o Delila+ te iˈoa.
5 Tapiri atura ïa te mau faatere Philiseti i taua vahine ra e na ô atura: “A haavarevare* ia ˈna+ ia itehia mai ia oe nohea mai teie puai rahi e e nafea matou e upootia ˈi i nia ia ˈna, e taamu ai e e tapea ˈi ia ˈna. E horoa ïa matou tataitahi 1 100 moni ario na oe.”
6 I muri iho, parau maira Delila ia Samasona: “A faaite mai na nohea mai to oe puai rahi e eaha te nehenehe e faaohipahia no te taamu e te tapea ia oe.”
7 Na ô atura Samasona ia ˈna: “Ia taamuhia vau i e hitu taura fana apî,* e paruparuhia vau mai te tahi atu mau taata.”
8 Hopoi maira ïa na faatere Philiseti ia ˈna e hitu taura fana apî, e taamu ihora oia ia ˈna i te reira.
9 Te tiai noa ra te tahi mau taata tamoemoe i roto i te hoê piha ê. Tuô ihora ïa Delila: “Tei nia ia oe te mau Philiseti, Samasona!” Mutu ihora na taura fana apî ia ˈna mai te taura lino ia papaa i te auahi.+ Aita i itehia nohea mai to ˈna puai.
10 Na ô maira Delila ia Samasona: “Inaha, ua haamaau oe ia ˈu e ua haavare oe ia ˈu. Teie nei, a parau mai na eaha te nehenehe e faaohipahia no te taamu ia oe.”
11 Na ô atura ïa oia ia ˈna: “Ia taamuhia vau i te taura apî aita i ravehia aˈenei no te ohipa, e paruparuhia vau mai te tahi atu mau taata.”
12 Rave maira ïa Delila i te taura apî, taamu ihora ia ˈna i te reira e tuô ihora: “Tei nia ia oe te mau Philiseti, Samasona!” (Te tiai noa ra te tahi mau taata tamoemoe i roto i te hoê piha ê.) Mutu ihora ia ˈna na taura i nia i to ˈna rima mai te taura ahu.+
13 I muri iho, na ô maira Delila ia Samasona: “Tae roa mai i teie nei, ua haamaau oe ia ˈu e ua haavare oe ia ˈu.+ A parau mai eaha te nehenehe e faaohipahia no te taamu ia oe.” Na ô atura oia ia ˈna: “Ia raraa oe i na hitu firi o to ˈu upoo i te taura raraa.”
14 Tamau ihora ïa oia i te reira i te tahi pine raraa e tuô ihora: “Tei nia ia oe te mau Philiseti, Samasona!” Ara maira ïa oia mai to ˈna taotoraa e tatara ihora i te pine raraa e te taura raraa.
15 Na ô ihora oia ia ˈna: “E nafea oe e nehenehe ai e parau: ‘Mea here na ˈu ia oe,’+ e aita to oe aau ia ˈu ra? Teie e toru taime ua haamaau oe ia ˈu e aita oe i faaite mai nohea mai to oe puai rahi.”+
16 No te mea ua onoono e ua faahepo noa Delila ia ˈna i te mau mahana atoa, fiu roa ihora Samasona.+
17 Haamahora ˈtura ïa oia i to ˈna aau ia ˈna, a na ô ai: “Aita to ˈu upoo i hahuhia aˈenei, no te mea e Nazira vau na te Atua mai to ˈu fanauraa mai.*+ Ia hahuhia to ˈu upoo, e faarue mai to ˈu puai ia ˈu, e paruparuhia vau a riro atu ai mai te tahi atu mau taata.”
18 I to Delila iteraa e ua haamahora mai oia i to ˈna aau, i reira iho titau maira oia i te mau faatere Philiseti,+ a na ô ai: “A haere mai i teie nei, ua haamahora hoi oia i to ˈna aau ia ˈu.” Haere maira ïa te mau faatere Philiseti ia ˈna, a hopoi mai ai i te moni.
19 Faataoto ihora oia ia ˈna i nia i to ˈna na turi. Pii ihora oia i te tahi taata e faaue ihora ia ˈna ia hahu i na hitu firi o to ˈna upoo. I muri iho, noaa ˈtura ia ˈna i te tapea ia ˈna, te faarue ra hoi to ˈna puai ia ˈna.
20 Tuô ihora oia: “Tei nia ia oe te mau Philiseti, Samasona!” Ara maira ïa oia mai to ˈna taotoraa e na ô ihora: “E haere au i rapae mai te tahi atu mau taime+ e e ora vau.” Aita râ oia i ite e ua faarue Iehova ia ˈna.
21 Haru maira ïa te mau Philiseti ia ˈna e paaro aˈera i to ˈna mata. Haapou ihora ratou ia ˈna i Gaza e tamau aˈera ia ˈna i e piti tapea veo. Riro atura oia ei taata taviri huero maa i roto i te fare tapearaa.
22 Tera râ, ua haamata te rouru o to ˈna upoo i te tupu faahou mai i muri iho i te hahuraahia te reira.+
23 Putuputu maira te mau faatere Philiseti no te pûpû i te tahi tusia rahi ia Dagona+ to ratou atua e no te arearea, ua parau hoi ratou: “Ua tuu mai to tatou atua ia Samasona to tatou enemi i to tatou rima!”
24 I te iteraa te mau taata ia ˈna,* arue aˈera ratou i to ratou atua e na ô aˈera: “Ua tuu mai to tatou atua i to tatou rima i to tatou enemi, oia tei tuino i to tatou fenua+ e tei haapohe e rave rahi o tatou.”+
25 No te oaoa o to ratou aau, na ô aˈera ratou: “A tii ia Samasona no te faaarearea ia tatou.” Tii aˈera ïa ratou ia Samasona i roto i te fare tapearaa no te faaarearea ia ratou. Faatia noa aˈera ratou ia ˈna i ropu i te mau pou.
26 Parau atura Samasona i te tamaroa e tapea ra ia ˈna na te rima: “A vaiiho na ia ˈu ia fafa i na pou e turu ra i te hiero,* ia nehenehe au e turui i nia iho.”
27 (Ua î hoi te hiero* i te tane e te vahine. To reira pauroa te faatere Philiseti, e piri i te 3 000 tane e vahine to nia i te tapoˈi fare o te hiˈo noa ra ia Samasona ia faaarearea ia ratou.)
28 Tiaoro ihora Samasona+ ia Iehova: “E te Arii hau ê e Fatu ra e Iehova, a haamanaˈo na ia ˈu, e a haapuai na ia ˈu,+ i teie noa taime e te Atua, e ia tahoo vau i te mau Philiseti no hoê o to ˈu mata e piti.”+
29 Tapea ihora Samasona i na piti pou i ropu o te turu ra i te hiero,* e turui ihora i nia i te reira, to ˈna rima atau i nia i te hoê pou, e to ˈna rima aui i nia i te tahi atu.
30 Tuô ihora Samasona: “Ia pohe au e te mau Philiseti!” Turai ihora oia ma to ˈna puai atoa, e marua ihora te hiero* i nia i te mau faatere e pauroa te taata i roto.+ Mea rahi aˈe ïa te taata ta ˈna i haapohe i to ˈna poheraa, i ta ˈna i haapohe a ora ˈi oia.+
31 I muri iho, pou maira to ˈna mau taeae e te utuafare taatoa o to ˈna metua tane e faahoˈi ia ˈna. Hopoi aˈera ratou ia ˈna e huna ihora ia ˈna i ropu ia Zora+ e ia Esetaola i te menema o Manoa+ to ˈna metua tane. Ua tavana oia i nia ia Iseraela e 20 matahiti.+
Nota i raro i te api
^ Aore ra “taparuparu.”
^ Aore ra “uaua animara aita â i mǎrô atura.”
^ Heb: “mai te opu mai â o to ˈu metua vahine.”
^ Oia hoi te idolo.
^ Heb: “fare.”
^ Heb: “fare.”
^ Heb: “fare.”
^ Heb: “fare.”
