O te Bibilia Moˈa te poroi a te Atua tei papaihia no tatou paatoa. Mea titauhia ia tatou ia haapii i te Bibilia no te ite o vai Tei papai i te reira. (Ioane 17:3; Timoteo 2, 3:16) I roto i te Bibilia e faaite ai te Atua ra o Iehova i ta ˈna opuaraa no te huitaata e no to ratou nohoraa, te fenua.—Genese 3:15; Apokalupo 21:3, 4.

Aita ˈtu e buka i ohipa aˈenei i roto i te oraraa o te taata. Te turai ra te Bibilia ia faatupu i te huru maitatai o Iehova mai te here, te aroha hamani maitai e te aumihi. E horoa mai te reira i te tiaturiraa no te tauturu i te taata ia faaruru atoa i te fifi ino mau. E te faaite noa ra te reira i te mau ohipa a teie nei ao aita e tuea ra i te hinaaro tia roa o te Atua.—Salamo 119:105; Hebera 4:12; Ioane 1, 2:15-17.

Ua papaihia te Bibilia na mua roa na roto i te reo Hebera, Arama e Heleni. Ua hurihia te Bibilia i roto i to ˈna taatoaraa aore ra te tahi noa tuhaa na roto hau atu i te 3 000 reo. Teie te buka huri-roa-hia e te opere-roa-hia na te ao mai te tau mai â. E ere i te mea maere, ua faaite hoi te hoê parau tohu Bibilia: “E e porohia te parau apî oaoa o te Faatereraa arii [te poroi tumu o te Bibilia] e ati aˈe te fenua ia ite te mau nunaa atoa, i reira ïa te hopea e tae mai ai.”—Mataio 24:14.

No te faufaaraa o te poroi o te Bibilia i opua ˈi matou e faaapî i teie huriraa ma te faatura maite i te Bibilia e te poroi i roto. Ua ite matou te rahi o te hopoia no te huri i tera poroi ma te tano. Ua piahia te Huriraa o te ao apî o te mau Papai Moˈa i 1950 na roto i te reo Beretane na mua. Tera râ, e taui noa te mau reo, ua hiˈo faahou ïa matou i te huriraa o te taatoaraa o te Bibilia. Ta matou fa, ia huri ïa i te mau papai tumu ia taa ohie i te taata e taio i te reira. E faataa te mau tuhaa hau “Aratairaa no te huri i te Bibilia,” “Tuhaa taa maitai o teie huriraa,” e “Mea nafea te Bibilia i te taeraa mai ia tatou?” i te tahi mau faatanoraa ta matou i rave i roto.

E hinaaro te feia mea here na ratou ia Iehova e o te haamori ra ia ˈna i te hoê huriraa o te Parau a te Atua tano e te ohie ia taa. (Timoteo 1, 2:4) No reira, te pia nei matou i teie huriraa hiˈo-faahou-hia na roto i te reo Beretane ma te manaˈo ia hurihia te reira na roto e rave rahi reo. Te pure nei matou no outou e imi nei i te Atua, e na roto i teie huriraa o te Bibilia, ia ite mau â outou ia ˈna.—Ohipa 17:27.