Te ahiahi ra i taua Mahana pae ra 14 no Nisana. I te toparaa te mahana, ua haamata te Sabati 15 no Nisana. Ua pohe ê na Iesu, te ora noa ra râ na taata eiâ i pihai iho ia ˈna. Ia au i te ture a Mose, eiaha te hoê tino pohe e vaiihohia i nia i te raau e ao noa ˈtu, ia hunahia râ “ei taua mahana ra.”—Deuteronomi 21:22, 23.

E parau-atoa-hia te Mahana pae i te taperaa mahana e Faaineineraa, e faaineine hoi te taata i te maa e e faaoti ratou i te tahi atu mau ohipa ia ravehia hou te Sabati. I te toparaa mahana, e haamata te hoê Sabati “rahi.” E piti Sabati to taua mahana ra. (Ioane 19:31) Te 15 no Nisana, o te mahana matamua ïa o te Oroa pane hopue ore e hitu mahana, e Sabati atoa. (Levitiko 23:5, 6) I tera matahiti, e topa taua mahana matamua ra o te Oroa i te hoê â mahana e te Sabati hebedoma, te hitu o te mahana.

No reira, ani atura te mau ati Iuda ia Pilato ia faaoioi i te pohe o Iesu e na taata eiâ ma te ofati i to ratou avae. E tarere to ratou tino a mau atu ai te hutiraa aho. Haere maira na faehau, e ofati aˈera i te avae o na taata eiâ. Ia hiˈohia ˈtu, e au ra e ua pohe Iesu, aita ïa ratou i ofati i to ˈna avae. Tupu ihora te Salamo 34:20: “Na Iehova e tiai i to ˈna ra mau ivi; e ore roa te hoê e ofatihia.”

Ia papu ia ratou e ua pohe iho â Iesu, patia  ˈtura te hoê faehau i to ˈna aoao i ta ˈna omore, i pihai iho i te mafatu. “Tahe maira te toto e te pape.” (Ioane 19:34) Tupu ihora ïa te tahi atu parau tohu: “Na ratou e hiˈo atu . . . ta ratou i patia.”—Zekaria 12:10.

I te haapoheraahia Iesu to reira atoa Iosepha no te oire o Arimataio, “te hoê taata taoˈa rahi” e mero faaturahia no te Sunederi. (Mataio 27:57) Te parauhia ra “e taata maitai oia e te parau-tia” o te tiai ra i te Faatereraa arii a te Atua. “E pǐpǐ oia na Iesu, aita râ i faaite no to ˈna mǎtaˈu i te ati Iuda.” I muri aˈe, aita oia i turu i te faaotiraa a te tiripuna tei haava ia Iesu. (Luka 23:50; Mareko 15:43; Ioane 19:38) Faaitoito atura Iosepha i te ani ia Pilato i te tino o Iesu. Titau ihora Pilato i te raatira faehau o tei haapapu mai e ua pohe iho â Iesu. Faatia ˈtura Pilato i te aniraa a Iosepha.

Hoo maira Iosepha i te ahu lino maitai e te mâ, e haapou maira i te tino o Iesu mai nia mai i te pou. Vehî ihora oia i te tino pohe i te ahu lino ei faaineineraa no te hunaraa. Tauturu atoa maira “Nikodemo, o tei haere aˈena mai ia Iesu ra i te po.” (Ioane 19:39) Ua afai mai oia hau i te 30 kilo mura anoihia i te aloe moni rahi. Vehîhia ˈtura te tino o Iesu i taua ahu ra ma teie mau raau noˈanoˈa, ia au i te peu a te ati Iuda no te hunaraa.

Na tera vahi, e menema apî to Iosepha tei paohia i roto i te mato, tuuhia ˈtura ïa te tino o Iesu i roto. Turaihia ihora te hoê ofai rahi i mua i te menema. Ua rave-oioi-hia te reira hou te Sabati. Eita e ore e ua tauturu atoa Maria Magadala e Maria te metua vahine o Iakobo iti i te faaineineraa i te tino o Iesu. Hoˈi oioi atura ratou i te fare “e faaineine i te mau raau noˈanoˈa” no te faaoti i te faaineineraa i te tino o Iesu i muri iho i te Sabati.—Luka 23:56.

Ananahi aˈe i te Sabati, haere maira te mau tahuˈa tiaau e Pharisea ia Pilato e na ô maira: “Te haamanaˈo ra matou e a ora noa ˈi tera taata haavare, ua parau oia: ‘E faatiahia mai au ua mairi anaˈe e toru mahana.’ A faaue na ïa ia tiaihia te menema e tae atu i te toru o te mahana, ia ore hoi ta ˈna mau pǐpǐ ia haere mai e eiâ i to ˈna tino, a na ô atu ai i te taata: ‘Ua faatiahia mai oia mai te pohe mai!’ Mea ino aˈe ïa teie haavare i te haavare matamua.” Parau atura Pilato: “A rave i te tahi mau faehau no te tiai maitai i te menema.”—Mataio 27:63-65.

I te poipoi roa i te Sabati, afai atura Maria Magadala, Maria te metua vahine o Iakobo, e te tahi na vahine i te raau noˈanoˈa i te menema no te faaineine i te tino o Iesu. Na ô aˈera te tahi i te tahi: “Na vai e turai ê i te ofai i te uputa o te menema no tatou?” (Mareko 16:3) I aueue na râ te fenua, i turai ê na te hoê melahi a te Atua i te ofai, ua reva te mau tiai, e aita e tino i roto i te menema!